ಮತ್ತೆ ಬಂತು ಕಿಸಾನ್ ವಿಕಾಸ್ ಪತ್ರ

ನವದೆಹಲಿ: ಬಡವರಿಗೆ ಉಳಿತಾಯದ ಹಾದಿ ತೋರಿಸಿದ್ದ ಕಿಸಾನ್ ವಿಕಾಸ್ ಪತ್ರ (ಕೆವಿಪಿ) ಮತ್ತೆ ಅವರ ಮಡಿಲು ಸೇರುತ್ತಿದೆ. ದೇಶದಲ್ಲಿ ಉಳಿತಾಯವನ್ನು ವೃದ್ಧಿಸುವ ನಿಟ್ಟಿನಲ್ಲಿ ಕೆವಿಪಿ ಯೋಜನೆಯನ್ನು ಪುನರಾರಂಭಿಸಲಾಗಿದೆ. ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಕಳೆದ 2-3 ವರ್ಷಗಳಲ್ಲಿ ದೇಶದಲ್ಲಿ ಉಳಿತಾಯವು ಶೇ.36.8ರಿಂದ ಶೇ.30ಕ್ಕೂ ಕಡಿಮೆಗೆ ಇಳಿದಿದೆ. ಹಾಗಾಗಿ ಈಗ ಜನರಿಗೆ ಹೆಚ್ಚು ಉಳಿತಾಯ ಮಾಡುವಂತೆ ಉತ್ತೇಜಿಸುವುದು ಅನಿವಾರ್ಯ ಎಂದಿರುವ ಕೇಂದ್ರ ವಿತ್ತ ಸಚಿವ ಅರುಣ್ ಜೇಟ್ಲಿ, ಕೆವಿಪಿ ಯೋಜನೆಗೆ ಮಂಗಳವಾರ ಮರುಚಾಲನೆ ನೀಡಿದ್ದಾರೆ.

ಕಿಸಾನ್ ವಿಕಾಸ ಪತ್ರ

• ಆರಂಭದಲ್ಲಿ ಇದನ್ನು ಅಂಚೆ ಕಚೇರಿಗಳಲ್ಲಿ ಮಾತ್ರವೇ ನೀಡಲಾಗುತ್ತದೆ. ಮುಂದಿನ ದಿನಗಳಲ್ಲಿ ರಾಷ್ಟ್ರೀಕೃತ ಬ್ಯಾಂಕುಗಳ ಶಾಖೆಗಳಲ್ಲಿಯೂ ಲಭ್ಯವಿರಲಿದೆ.
• ಕೆವಿಪಿಯಲ್ಲಿ ಉಳಿತಾಯ ಮೂಡುವವರು ಯಾವುದೇ ತೆರಿಗೆ ವಿನಾಯಿತಿ ಪಡೆಯುವುದಿಲ್ಲ.
• ಒಬ್ಬ ಹೆಸರಲ್ಲಿ ಅಥವಾ ಜಂಟಿಯಾಗಿ ಕಿಸಾನ್ ವಿಕಾಸ ಪತ್ರ ಸರ್ಟಿಫಿಕೇಟ್ ಪಡೆಯಬಹುದು. ಒಬ್ಬ ವ್ಯಕ್ತಿಯು ಇದನ್ನು ಮತ್ತೊಬ್ಬ ವ್ಯಕ್ತಿಗೆ ವರ್ಗಾಯಿಸುವ ಅವಕಾಶವೂ ಇದೆ.
• ಭಾರತದಲ್ಲಿನ ಯಾವುದೇ ಒಂದು ಅಂಚೆ ಕಚೇರಿಯಿಂದ ಮತ್ತೊಂದಕ್ಕೆ ವರ್ಗಾಯಿಸಬಹುದು.
• ಬ್ಯಾಂಕುಗಳಿಂದ ಸಾಲ ಪಡೆಯುವಾಗ ಕೆವಿಪಿ ಸರ್ಟಿಫಿಕೇಟ್ ಅನ್ನು ಭದ್ರತೆಯಾಗಿ ನೀಡಬಹುದು.
• ಮೊದಲು 1988ರಲ್ಲಿ ಇದನ್ನು ಆರಂಭಿಸಲಾಗಿತ್ತು. ಆಗ ಇದರ ಮೆಚ್ಯೂರಿಟಿ ಅವಧಿ ಐದೂವರೆ ವರ್ಷ ಆಗಿತ್ತು.

• ಯಾರದೋ ವಂಚನೆಗೆ ಬಲಿಯಾಗುವ ಬದಲು, ವಿಶ್ವಾಸಾರ್ಹ ಸರ್ಕಾರಿ ಯೋಜನೆಯಲ್ಲಿ ಹಣವನ್ನು ತೊಡಗಿಸಲು ಸಾಧ್ಯವಾಗುತ್ತದೆ.
• ದೇಶದಲ್ಲಿ ಉಳಿತಾಯ ಹೆಚ್ಚಿಸುವ ತುರ್ತು ಅಗತ್ಯವಿದೆ. ಈ ಹಣವನ್ನು ನಂತರ ದೇಶ ಕಟ್ಟುವ ಕಾರ್ಯಕ್ಕೆ ಬಳಸಬಹುದು.
• ಇದು ಕೇವಲ ಬಡ್ಡಿಯನ್ನು ಆಕರ್ಷಿಸುವುದು ಮಾತ್ರವಲ್ಲ, ದೇಶದ ಅಭಿವೃದ್ಧಿಗೂ ನೆರವಾಗುತ್ತದೆ.