ಇಂದೋರ್: ತನ್ನ 20 ವರ್ಷದ ಮಗಳ ಮೇಲೆ ಅತ್ಯಾಚಾರಕ್ಕೆ ಮುಂದಾದ ಪತಿಯನ್ನು ಪತ್ನಿಯೇ ಕೊಲೆ ಮಾಡಿರುವ ಘಟನೆ ಮಧ್ಯಪ್ರದೇಶದ ಇಂದೋರ್‌ನಲ್ಲಿ ನಡೆದಿದೆ.
ಪತ್ನಿ-ಪುತ್ರಿಯಿಂದ ದೂರವಾಗಿದ್ದ ಕ್ರಿಮಿನಲ್ ವ್ಯಕ್ತಿ ತನ್ನ ಮಗಳ ಮೇಲೆ ಅತ್ಯಾಚಾರವೆಸಗಲು ಮುಂದಾಗಿದ್ದಾನೆ. ಈ ವೇಳೆ ಪತ್ನಿ ಬಿಡಿಸಲು ಹೋದಾಗ ಆಕೆಯ ಮೇಲೆ ಹಲ್ಲೆ ನಡೆಸಿದ್ದಾನೆ.
ಇದರಿಂದ ಕುಪಿತಗೊಂಡ ಪತ್ನಿ ಆತನ ಕಣ್ಣಿಗೆ ಕಾರದ ಪುಡಿ ಎರಚಿ ಆತನನ್ನು ಚಾಕುವಿನಿಂದ ಇರಿದು ಹತ್ಯೆ ಮಾಡಿದ್ದಾಳೆ.
ಪತ್ನಿಯಿಂದ ಹತ್ಯೆಗೊಳಗಾದ ವ್ಯಕ್ತಿ ರವಿ ಅಲಿಯಾಸ್ ಚಾಂಪಿಯಾ ಕುಖ್ಯಾತ ಕ್ರಿಮಿನಲ್ ಆಗಿದ್ದು, ಆತನ ವಿರುದ್ಧ ವಿವಿಧ ಠಾಣೆಗಳಲ್ಲಿ 18 ಪ್ರಕರಣಗಳು ದಾಖಲಾಗಿವೆ.
ತನ್ನ ಗಂಡನ ಮನೆಯಲ್ಲಿ ಉಂಟಾದ ಕಲಹದಿಂದಾಗಿ ಮಗಳು ಇತ್ತೀಚೆಗಷ್ಟೇ ತಾಯಿ ಮನೆಗೆ ಬಂದು ಅಲ್ಲೇ ವಾಸ್ತವ್ಯವಿದ್ದಳು. ನಿನ್ನೆ ರಾತ್ರಿ ಮನೆಗೆ ಬಂದ ರವಿ ಮಗಳ ಮೇಲೆಯೇ ಅತ್ಯಾಚಾರ ಎಸಗಲು ಮುಂದಾಗಿದ್ದಾನೆ.
ಆಗ ಕೆರಳಿದ ಪತ್ನಿ 38 ವರ್ಷದ ಫಮೀದಾಬಿ ಅವನನ್ನು ಇರಿದು ಹತ್ಯೆ ಮಾಡಿದ್ದಾಳೆ. ಕೊಲೆ ಮಾಡಿದ ಬಳಿಕ ಮಧ್ಯರಾತ್ರಿವರೆಗೂ ಫಮೀದಾ ಮತ್ತು ಮಗಳು ರವಿ ಶವದ ಎದುರೇ ಕುಳಿತಿದ್ದಾರೆ.
ನಂತರ ಫಮೀದ ನೇರವಾಗಿ ಚಂದನ್‌ನಗರ್ ಪೊಲೀಸ್ ಠಾಣೆಗೆ ಹೋಗಿ ಶರಣಾಗಿದ್ದಾಳೆ. ಫಮೀದಾ ಮತ್ತು ರವಿ ಇಬ್ಬರೂ ಕೆಲ ಕಾಲದಿಂದ ಪರಸ್ಪರ ದೂರವಿದ್ದರು. ಆದರೆ ಇತ್ತೀಚೆಗೆ ರವಿ ಆಗಾಗ ಇವಳ ಮನೆಗೆ ಬಂದು ಹೋಗುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
