ನವದೆಹಲಿ: ಡಿಡಿಸಿಎ ಹಗರಣದ ಮತ್ತಷ್ಟು ಆಳಕ್ಕೆ ಇಳಿಯುತ್ತಿರುವ ಆಮ್ ಆದ್ಮಿ ಪಕ್ಷವು ವಿತ್ತ ಸಚಿವ ಅರುಣ್ ಜೇಟ್ಲಿಗೆ ಶುಕ್ರವಾರ ಪಂಚಪ್ರಶ್ನೆಗಳ ಪಾಟಿ ಸವಾಲು ಹಾಕಿದೆ.
ಒಎನ್‍ಜಿಸಿಯಿಂದ ಹಾಕಿ ಇಂಡಿಯಾಗೆ ಒತ್ತಾಯ ಪೂರ್ವಕವಾಗಿ ರು.5 ಕೋಟಿ ದೇಣಿಗೆ ಕೊಡಿಸಿದ ಹೊಸ ಆರೋಪವನ್ನು ಜೇಟ್ಲಿ ಅವರ ಮೇಲೆಳೆದಿದೆ.
ಜೇಟ್ಲಿ, ``ಅರ್ಧಸತ್ಯಗಳ ಮತ್ತು ಸುಂದರ ಸುಳ್ಳುಗಳ ಪರಿಣಿತ'' ಎಂದು ಆಪ್ ನಾಯಕ ಅಶುತೋಷ್ ಬಣ್ಣಿಸಿದ್ದಾರೆ. ಕೋಟ್ಲಾ ಕ್ರಿಡಾಂಗಣದ ಕಾರ್ಪೊರೇಟ್ ಬಾಕ್ಸ್ ಬಗ್ಗೆ ನಾವು ಪ್ರಶ್ನಿಸಿದ್ದೆವು. ಈ ಬಗ್ಗೆ ಜೇಟ್ಲಿ ಏನೂ ಉತ್ತರಿಸಿಲ್ಲ.
ಆದರೆ, ತಮ್ಮ ಕುಟುಂಬದ ಆಪ್ತರಿಗೆ ಸೇರಿದ ಟ್ವೆಂಟಿ ಫಸ್ಟ್ ಸೆಂಚುರಿ ಸಂಸ್ಥೆಗೆ ಈ ಬಾಕ್ಸ್ ಗಳನ್ನು ಸಬ್ ಲೀಸ್ ಮತ್ತು ಮಾರಾಟ ಮಾಡಲು ನೀಡಲಾಗಿದ್ದು, ಇದಕ್ಕಾಗಿ ಕಮಿಷನ್ ನೀಡಲಾಗಿದೆ.
