ಶೀಘ್ರದಲ್ಲೇ ಪ್ರಧಾನಿಯಿಂದ ನಿಮಗೆ ನೇರ ಎಸ್ಎಂಎಸ್, ಇ ಮೇಲ್!

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರೇ ಟ್ವಿಟರ್ ಹಾಗೂ ಫೇಸ್ ಬುಕ್ ಖಾತೆ ನಿರ್ವಹಿಸುತ್ತಾರೆ ಎಂಬುದು ಈಗ ಹಳೆಯ ಸುದ್ದಿ. ಹೊಸ ಸುದ್ದಿ ಏನಪ್ಪ ಅಂದರೆ ರಾಷ್ಟ್ರದ ಹಿತಾಸಕ್ತಿಗೆ ಸಂಬಂಧಿಸಿದ ತುರ್ತು ಸಂದೇಶ, ಹೊಸ ನೀತಿಗಳ ಬಗ್ಗೆ ಇನ್ಮುಂದೆ ನಿಮಗೆ ಪ್ರಧಾನಿಯವರೇ ಇ ಮೇಲ್ ಅಥವಾ ಎಸ್ಎಂಎಸ್ ಮಾಡುತ್ತಾರೆ.

ಡಿಜಿಟಲ್ ಇಂಡಿಯಾದ ಅಂಗವಾಗಿ ಕಳೆದ ವರ್ಷವೇ ಚಾಲನೆಗೊಂಡಿದ್ದ ಇ ಸಂಪರ್ಕ್ ಆಂದೋಲನವನ್ನು ಈಗ ಖಾಸಗಿ ನಾಗರಿಕರಿಗೂ ವಿಸ್ತರಿಸುತ್ತಿದ್ದು, ಅದರಲ್ಲೂ ಉದ್ಯೋಗಿಗಳಿಗೆ ಹೆಚ್ಚಿನ ಗಮನ ಕೊಡಲು ಮುಂದಾಗಿದೆ. ದೇಶದ ವಿವಿಧ ವಿಷಯಗಳು, ನೀತಿ, ನಿಯಮ ಹಾಗೂ ಯೋಜನೆಗಳಿಗೆ ಸಂಬಂಧಿಸಿದಂತೆ ನಾಗರಿಕರೊಂದಿಗೆ ನೇರ ಸಂಪರ್ಕ ಸಾಧಿಸಲು ಪ್ರಧಾನಿ ಮೋದಿ ಮುಂದಾಗಿದ್ದಾರೆ. 

ಇ ಸಂಪರ್ಕ ದಾಖಲೆಯಲ್ಲಿ ಕೇಂದ್ರ ಹಾಗೂ ರಾಜ್ಯ ಸರ್ಕಾರಿ ನೌಕರರ 80 ಲಕ್ಷ ಇ ಮೇಲ್ ವಿಳಾಸ ಹಾಗೂ ಒಂದು ಕೋಟಿ ಮೊಬೈಲ್ ಸಂಖ್ಯೆಗಳಿವೆ ಎಂದು ಮೂಲಗಳು ತಿಳಿಸಿವೆ. ಪ್ರಧಾನಮಂತ್ರಿ ಸಚಿವಾಲಯದಿಂದ ಇದುವರೆಗೆ 42 ಕೋಟಿ ಇ ಮೇಲ್ಸ್ ಮತ್ತು ಎಸ್ಎಂಎಸ್ ಕಳುಹಿಸಲಾಗಿದೆ.