ಸ್ಮೃತಿ ಇರಾನಿ ಮೋದಿ 2ನೇ ಪತ್ನಿ, ವಿವಾದಾತ್ಮಕ ಹೇಳಿಕೆ ಖಂಡಿಸಿದ ಅಸ್ಸಾಂ ಸಿಎಂ

ಗುವಾಹತಿ: ಕೇಂದ್ರ ಮಾನವ ಸಂಪನ್ಮೂಲ ಸಚಿವೆ ಸ್ಮೃತಿ ಇರಾನಿ ಅವರು ಪ್ರಧಾನಿ ನರೇಂದ್ರ ಮೋದಿ ಅವರ ಎರಡನೇ ಪತ್ನಿ ಎಂದಿದ್ದ ಕಾಂಗ್ರೆಸ್ ಶಾಸಕ ನೀಲಮಣಿ ಸೆಂಡೆಕಾ ಅವರ ವಿವಾದಾತ್ಮಕ ಹೇಳಿಕೆಯನ್ನು ಅಸ್ಸಾಂ ಮುಖ್ಯಮಂತ್ರಿ ತರುಣ್ ಗೊಗೊಯಿ ಅವರು ಸೋಮವಾರ ಖಂಡಿಸಿದ್ದಾರೆ. ಅಲ್ಲದೆ ಅದು 'ಅಸ್ಸಾಮಿ ಸಂಸ್ಕೃತಿ ಅಲ್ಲ' ಎಂದಿದ್ದಾರೆ.

'ನೀಲಮಣಿ ಸಂಡೇಕಾ ಅವರ ಹೇಳಿಕೆಯನ್ನು ನಾನು ಖಂಡಿಸುತ್ತೇನೆ. ಅವರು ತಪ್ಪು ಮಾಡಿದ್ದಾರೆ. ಹೀಗಾಗಿ ಕ್ಷಮೆ ಕೇಳುವಂತೆ ಸೂಚಿಸಿದ್ದೇನೆ. ಆದರೆ ಈಗಾಗಲೇ ಕ್ಷಮೆ ಕೇಳಿರುವುದಾಗಿ ಅವರು ಹೇಳಿದ್ದಾರೆ' ಎಂದು ಅಸ್ಸಾಂ ಸಿಎಂ ವರದಿಗಾರರಿಗೆ ತಿಳಿಸಿದರು.

'ಹಿಮಂತ್ ಬಿಸ್ವಾ ಶರ್ಮಾ(ಈಗ ಬಿಜೆಪಿಯಲ್ಲಿರುವ ಮಾಜಿ ಕಾಂಗ್ರೆಸ್ ನಾಯಕ) ಅವರು ಹಿಂದೆ ಇಂತಹದ್ದೇ ಹೇಳಿಕೆ ನೀಡಿದ್ದರು. ಅವರಿಗೂ ನಾನು ಕ್ಷಮೆ ಕೋರುವಂತೆ ಸೂಚಿಸಿದ್ದೇ. ಬಿಜೆಪಿ ಅಥವಾ ನಮ್ಮ ಪಕ್ಷ ಯಾವುದೇ ಪಕ್ಷದವರೂ ಇಂತಹ ಹೇಳಿಕೆ ನೀಡುವುದು ಸರಿಯಲ್ಲ ಮತ್ತು ಇದು ಅಸ್ಸಾಮಿ ಸಂಸ್ಕೃತಿ ಅಲ್ಲ' ಎಂದು ಗೊಗೊಯ್ ಹೇಳಿದ್ದಾರೆ.

ನಿನ್ನೆ ನಲ್ಬರಿಯ ಕಾರ್ಯಕ್ರಮವೊಂದರಲ್ಲಿ ಸೆಂಡೆಕಾ ಅವರು ಈ ವಿವಾದಾತ್ಮಕ ಹೇಳಿಕೆ ನೀಡಿದ್ದರು. ಸೆಂಡೆಕಾ ಹೇಳಿಕೆಯನ್ನು ಬಿಜೆಪಿ ತೀವ್ರವಾಗಿ ಖಂಡಿಸಿತ್ತು.