ನವದೆಹಲಿ: ಬೇಲಿಯೇ ಎದ್ದು ಹೊಲ ಮೇಯ್ದಂತೆ ದೆಹಲಿಯಲ್ಲಿ ಪೊಲೀಸ್ ಅಧಿಕಾರಿಯೇ ಗನ್‍ನಿಂದ ಹೆದರಿಸಿ ಮಹಿಳೆಯೊಬ್ಬರ ಮೇಲೆ ಅತ್ಯಾಚಾರ ಎಸಗಿದ ಘಟನೆ ನಡೆದಿದೆ. ಗುರುವಾರ ರಾತ್ರಿ ನಡೆದ ಪ್ರಕರಣ ಶನಿವಾರ ಬೆಳಕಿಗೆ ಬಂದಿದ್ದು, ಸಹಾಯಕ ಸಬ್‍ಇನ್ಸ್‍ಪೆಕ್ಟರ್ (ಎಎಸ್‍ಐ) ಜಗವೀರ್ ಸಿಂಗ್‍ರನ್ನು ಬಂಧಿಸಲಾಗಿದೆ.
ಗುರುವಾರ ರಾತ್ರಿ ಸಿಂಗ್ ಅವರು ಪಶ್ಚಿಮ ದೆಹಲಿಯಲ್ಲಿರುವ ತಮ್ಮ ಸ್ನೇಹಿತನ ಮನೆಗೆ ತೆರಳಿದ್ದರು. ಅಲ್ಲಿ ಪಾನಮತ್ತನಾದ ಸಿಂಗ್ ಅವರು ಸ್ನೇಹಿತನ ಮನೆಯ ಕೆಲಸದಾಕೆ(23)ಗೆ ಪಿಸ್ತೂಲ್ ನಿಂದ ಬೆದರಿಸಿ, ಆಕೆಯ ಮೇಲೆ ಅತ್ಯಾಚಾರವೆಸಗಿದ್ದಾರೆ. ಈ ಎಲ್ಲ ದೃಶ್ಯಾವಳಿಗಳಿರುವ ವಿಡಿಯೋ ಶನಿವಾರ ಮಾಧ್ಯಮಗಳಿಗೆ ಲಭ್ಯವಾಗಿದೆ. ಈ ಬಗ್ಗೆ ಮಹಿಳೆಯು ಪೊಲೀಸರಿಗೆ ದೂರು ನೀಡಿದ್ದು,
ಅತ್ಯಾಚಾರವಾಗಿರುವುದು ವೈದ್ಯಕೀಯ ಪರೀಕ್ಷೆಯಿಂದ ದೃಢವಾಗಿದೆ. ಈ ಹಿನ್ನೆಲೆಯಲ್ಲಿ ಶನಿವಾರ ಸಿಂಗ್‍ರನ್ನು ಬಂಧಿಸಲಾಗಿದೆ. ಪ್ರಕರಣದ ಕುರಿತು ತನಾಡಿರುವ ದೆಹಲಿ ಪೊಲೀಸ್ ಆಯುಕ್ತ ಬಿ.ಎಸ್.ಬಸ್ಸಿ, ``ನಾವು ಇಲಾಖಾ ತನಿಖೆಗಾಗಿ ಕಾಯುವುದಿಲ್ಲ. ಆತನನ್ನು ಈ ಕೂಡಲೇ ವಜಾ ಮಾಡುತ್ತೇವೆ. ಮಹಿಳೆಯರ ಮೇಲಿನ ಯಾವುದೇ ದೌರ್ಜನ್ಯವನ್ನೂ ನಾವು ಸಹಿಸುವುದಿಲ್ಲ'' ಎಂದಿದ್ದಾರೆ.
ಇದೇ ವೇಳೆ, ಆಪ್ ಕೂಡ ಪ್ರಕರಣಕ್ಕೆ ಸಂಬಂಧಿಸಿ ದೆಹಲಿ ಪೊಲೀಸರ ವಿರುದ್ಧ ಹರಿಹಾಯ್ದಿದೆ. ``ಒಂದು ಕಡೆ ಪೊಲೀಸರು ಆಪ್ ನಾಯಕರನ್ನು ಬಂಧಿಸುವ ಕೆಲಸದಲ್ಲಿ ತೊಡಗಿದ್ದರೆ, ಮತ್ತೊಂದೆಡೆ ಅದೇ ಪೊಲೀಸರು ಹೀನ ಕೃತ್ಯದಲ್ಲಿ ತೊಡಗಿದ್ದಾರೆ. ನಗರದ ಕಾನೂನು ಸುವ್ಯವಸ್ಥೆ ನೋಡಿ ಕೊಳ್ಳಲಾಗದ ಬಸ್ಸಿ ಅವರು ರಾಜಿನಾಮೆ ನೀಡುವುದು ಉತ್ತಮ'' ಎಂದು ಆಪ್ ನಾಯಕ ಆಶಿಶ್ ಖೇತಾನ್ ಹೇಳಿದ್ದಾರೆ.
Advertisement