ತಿರುವನಂತಪುರ: ಪ್ರಮುಖ ಬರಹಗಾರರು ಒಬ್ಬರ ನಂತರ ಒಬ್ಬರಂತೆ ಸಾಹಿತ್ಯ ಪ್ರಶಸ್ತಿಗಳನ್ನು ಮರಳಿಸುವ ಕ್ರಮವನ್ನು ವಿರೋಧಿಸಿರುವ ಮಾಜಿ ಕೇಂದ್ರ ಸಚಿವ ಶಶಿ ತರೂರ್, ಸಾಹಿತಿಗಳಿಗೆ ಅಭಿವ್ಯಕ್ತಿ ಸ್ವಾತಂತ್ರ್ಯ ಇದ್ದರೂ ಕೂಡ ಅವರು ಪ್ರಶಸ್ತಿಯನ್ನು ಮರಳಿಸುವುದು ಆ ಪ್ರಶಸ್ತಿಗೆ ತೋರಿಸುವ ಅಗೌರವ ಎಂದು ಹೇಳಿದ್ದಾರೆ.
" ಕೆಲವು ಸಾಹಿತಿಗಳು ಪ್ರಶಸ್ತಿಗಳನ್ನು ಹಿಂತಿರುಗಿಸುವುದಕ್ಕೆ ವೈಯಕ್ತಿಕವಾಗಿ ನನಗೆ ವಿಷಾದವಿದೆ. ಬರಹಗಾರರ ಬುದ್ದಿವಂತಿಕೆ, ಸಾಹಿತ್ಯ ಜ್ಞಾನ, ಸೃಜನಶೀಲತೆ ಮತ್ತು ಶೈಕ್ಷಣಿಕ ಸಾಧನೆ ನೋಡಿ ಸಾಹಿತ್ಯ ಪ್ರಶಸ್ತಿಗಳನ್ನು ನೀಡಲಾಗುತ್ತದೆ. ಸಾಹಿತ್ಯ ಪ್ರಶಸ್ತಿ ನೀಡುವ ಅಕಾಡೆಮಿಯು ಸ್ವಾಯತ್ತ ಸಂಸ್ಥೆಯಾಗಿದೆ. ಪ್ರಶಸ್ತಿ ನೀಡುವ ಅದರ ಕೆಲಸವು ರಾಜಕಾರಣದ್ದಲ್ಲ. ನಮ್ಮ ಕಳವಳ, ಅತೃಪ್ತಿಗೆ ಕಾರಣವಾಗಿರುವ ಸಂಗತಿಗಳು ರಾಜಕೀಯವಾದವುಗಳೇ ಹೊರತು ಸಾಹಿತ್ಯಿಕವಾದವುಗಳಲ್ಲ ಎಂದು ಸಮಾರಂಭವೊಂದರ ಹೊರಗೆ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ ಹೇಳಿದರು.
ಈಗಿನ ರಾಜಕೀಯ ಸ್ಥಿತಿಗತಿಗಳ ಬಗ್ಗೆ, ರಾಜಕೀಯ ವಾತಾವರಣದ ಬಗ್ಗೆ ಯಾರೇ ಆದರೂ ವಿರೋಧ ವ್ಯಕ್ತಪಡಿಸಬಹುದು. ವ್ಯಕ್ತಿ ಸ್ವಾತಂತ್ರ್ಯಕ್ಕಾಗಿ ನಾವು ಸೆಟೆದು ನಿಲ್ಲಬಹುದು. ಆದರೆ ಸಾಹಿತ್ಯ ಪ್ರಶಸ್ತಿಗಳನ್ನು ಅಗೌರವಿಸುವುದು ಸರಿಯಲ್ಲ' ಎಂದು ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು.
ಆದರೆ ಅನೇಕ ಬರಹಗಾರರು ಒಗ್ಗಟ್ಟಿನಿಂದ ಸಮಾಜದಲ್ಲಿ ನಡೆಯುತ್ತಿರುವ ಅನ್ಯಾಯದ ವಿರುದ್ಧ ಧ್ವನಿ ಎತ್ತುತ್ತಿರುವುದು ಒಳ್ಳೆಯ ಬೆಳವಣಿಗೆ ಎಂದು ಹೇಳಿದರು.
