ಕಾಶ್ಮೀರದಲ್ಲಿ ಹಿಜ್ಬುಲ್ ಮುಜಾಹಿದ್ದಿನ್ ಕಮಾಂಡರ್ ಮೃತದೇಹ ಪತ್ತೆ
ಶ್ರೀನಗರ: ಹಿಜ್ಬುಲ್ ಮುಜಾಹಿದೀನ್ ಭಯೋತ್ಪಾದಕ ಸಂಘಟನೆಯ ಕಮಾಂಡರ್ ಉಗ್ರ ಫಯಾಜ್ ಅಹ್ಮದ್ ನ ದೇಹ ಗುಂಡುಗಳಿಂದ ಸಂಪೂರ್ಣ ಛಿದ್ರವಾಗಿದ್ದು, ಕಾಶ್ಮೀರದ ತಂಗ್ ಮಾರ್ಗ್ ನಲ್ಲಿ ಪೊಲೀಸರು ಶವವನ್ನು ವಶಕ್ಕೆ ಪಡೆದಿದ್ದಾರೆ.
ವೈಲೂ(ಪಟ್ವಾನ್) ನಿವಾಸಿಯಾಗಿರುವ ಉಗ್ರ ಫಯಾಜ್ ಅಹ್ಮದ್ ಮೇಲೆ ಯಾರೋ ದುಷ್ಕರ್ಮಿಗಳು ಗುಂಡಿನ ದಾಳಿ ನಡೆಸಿದ್ದಾರೆ. ದಾಳಿಯ ರಭಸಕ್ಕೆ ಫಯಾಜ್ ದೇಹ ಸಂಪೂರ್ಣ ಛಿದ್ರಗೊಂಡಿದೆ. ತಂಗ್ ಮಾರ್ಗ್ ಪಟ್ಟಣದ ದೇವಬಗ್ ಗ್ರಾಮದಲ್ಲಿ ಶನಿವಾರ ಪತ್ತೆಯಾಗಿದ್ದು, ಶವವನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಕಳೆದ ಆರು ವರ್ಷಗಳಿಂದ ಉಗ್ರ ಫಯಾಜ್ ಹಿಜ್ಬುಲ್ ಮುಜಾಹಿದ್ದಿನ್ ಭಯೋತ್ಪಾದಕ ಸಂಘಟನೆಯಲ್ಲಿ ಸಕ್ರಿಯನಾಗಿದ್ದು ಕಮಾಂಡರ್ ಹುದ್ದೆಯಲ್ಲಿದ್ದ. ದೇಹವನ್ನು ಸೂಕ್ತ ಪೊಲೀಸ್ ತಪಾಸಣೆ ನಂತರ ಅಂತಿಮ ವಿಧಿ ವಿಧಾನಗಳನ್ನು ಪೂರ್ಣಗೊಳಿಸಲು ಆತನ ಕುಟುಂಬದ ವಶಕ್ಕೆ ನೀಡಲಾಗುವುದು ಎಂದು ಅಧಿಕಾರಿಗಳು ಹೇಳಿದ್ದಾರೆ.
ವಾರದ ಹಿಂದೆ ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯ ಸೇಬು ಹಣ್ಣಿನ ತೋಟದಲ್ಲಿ ಮೂವರು ಯುವಕರ ಶವಗಳು ಅದೇ ರೀತಿ ಪತ್ತೆಯಾಗಿದ್ದು, ಇದು ನಾಲ್ಕನೇ ಪ್ರಕರಣವಾಗಿದೆ.
ಉಗ್ರರ ನಡುವಿನ ಬಿಕ್ಕಟ್ಟಿನ ಕಾರಣಕ್ಕೆ ಈ ಮೂವರ ಹತ್ಯೆ ನಡೆದಿದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಹಿಜ್ಬುಲ್ ಮುಜಾಹಿದ್ದಿನ್ ಹಾಗೂ ಅದರಿಂದ ಒಡೆದು ಪ್ರತ್ಯೇಕವಾಗಿರುವ ಲಷ್ಕರ್ ಇ ಇಸ್ಲಾಂ ಸಂಘಟನೆಗಳ ನಡುವಿನ ಪೈಪೋಟಿಯ ಪರಿಣಾಮ ಇದು ಎಂದು ಹೇಳಲಾಗಿದೆ. ಆದರೆ ಲಷ್ಕರ್ ಇ ಇಸ್ಲಾಂ ಎಂಬ ಸಂಘಟನೆಯೇ ಇಲ್ಲ ಎಂದು ಹಿಜ್ಬುಲ್ ಕಮಾಂಡರ್ ಸೈಯದ್ ಸಲಾಹುದ್ದೀನ್ ಹೇಳಿದ್ದಾನೆ.