ನವದೆಹಲಿ: ನಿಯಮಬದ್ಧವಾದ ಪ್ರವಾಸಿ ದಾಖಲೆಗಳು ಇಲ್ಲದೇ ಸಮರಗ್ರಸ್ತ ಸಿರಿಯಾ ಪ್ರವೇಶಿಸಿದ್ದಕ್ಕಾಗಿ ಅಲ್ಲಿನ ಸರ್ಕಾರದಿಂದ ಬಂಧಿತರಾಗಿದ್ದ ನಾಲ್ವರು ಭಾರತೀಯರನ್ನು ಬಿಡುಗಡೆ ಮಾಡಿಸಿಕೊಳ್ಳುವಲ್ಲಿ ಭಾರತ ಯಶಸ್ವಿಯಾಗಿದೆ.
ವಿದೇಶಾಂಗ ವ್ಯವಹಾರಗಳ ಸಚಿವ ಸುಷ್ಮಾ ಸ್ವರಾಜ್ ಅವರು, ಬಿಡುಗಡೆಗೊಂಡಿರುವ ನಾಲ್ವರೂ ಭಾರತೀಯರನ್ನು ತಾಯ್ನೆಲಕ್ಕೆ ಸ್ವಾಗತಿಸಿ, ಅವರ ಬಿಡುಗಡೆ ನಿಟ್ಟಿನಲ್ಲಿ ಸಹಕರಿಸಿದ ಸಿರಿಯಾ ಸರ್ಕಾರಕ್ಕೆ ಕೃತಜ್ಞತೆ ಸಲ್ಲಿಸಿದ್ದಾರೆ.
‘ಕಳೆದ ಜನವರಿಯಲ್ಲಿ ಭಾರತಕ್ಕೆ ಭೇಟಿ ನೀಡಿದ್ದ ಸಿರಿಯಾದ ಪ್ರಧಾನಿ ವಲೀದ್ ಅಲ್ ಮೌಲೆಮ್ ಅವರಲ್ಲಿ ನಾನು ನಾಲ್ವರು ಭಾರತೀಯರನ್ನು ಬಿಡುಗಡೆ ಮಾಡುವಂತೆ ಕೋರಿಕೊಂಡಿದ್ದೆ. ಧನ್ಯವಾದಗಳು ಸಿರಿಯಾ. ಅರುಣ್ ಕುಮಾರ್ ಸೈನಿ, ಸರ್ವಜಿತ್ ಸಿಂಗ್, ಕುಲದೀಪ್ ಸಿಂಗ್ ಮತ್ತು ಜೋಗಾ ಸಿಂಗ್- ನಿಮಗೆಲ್ಲರಿಗೂ ಭಾರತೀಯ ನೆಲಕ್ಕೆ ಸ್ವಾಗತ. ಸಿರಿಯಾದಿಂದ ಭಾರತಕ್ಕೆ ಪಯಣಿಸುವ ನಿಟ್ಟಿನಲ್ಲಿ ಇವರಿಗೆ ಸಹಕರಿಸಿದ ಸಿರಿಯಾದ ಎಲ್ಲಾ ಅಧಿಕಾರಿಗಳಿಗೂ ಧನ್ಯವಾದಗಳು’ ಎಂದು ಸುಷ್ಮಾ ಟ್ವೀಟ್ ಮಾಡಿದ್ದಾರೆ.
