ನೆಹರೂ, ಸೋನಿಯಾ ಕುರಿತು ವಿವಾದಾತ್ಮಕ ಲೇಖನ, ನಿರುಪಮ್ ಗೆ ನೋಟಿಸ್

ನವದೆಹಲಿ: ಮಾಜಿ ಪ್ರಧಾನಿ ದಿ. ಜವಾಹರಲಾಲ್ ನೆಹರೂ ಹಾಗೂ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರ ಕುರಿತು ವಿವಾದಾತ್ಮಕ ಲೇಖನ ಪ್ರಕಟಿಸಿದ್ದ ಕಾಂಗ್ರೆಸ್ ಮುಖವಾಣಿ ‘ಕಾಂಗ್ರೆಸ್ ದರ್ಶನ’ದ ಸಂಪಾದಕ ಮತ್ತು ಮುಂಬೈ ಕಾಂಗ್ರೆಸ್ ಅಧ್ಯಕ್ಷ ಸಂಜಯ್ ನಿರುಪಮ್ ಅವರಿಗೆ ಕಾಂಗ್ರೆಸ್ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ.

ಮಾಜಿ ಕೇಂದ್ರ ಸಚಿವ ಎ.ಕೆ.ಆಂಟನಿ ಅಧ್ಯಕ್ಷತೆಯ ಶಿಸ್ತು ಪಾಲನಾ ಸಮಿತಿ ನಿರುಪಮ್ೆ ಅವರಿಗೆ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ.

ಕಳೆದ ವರ್ಷ ಡಿಸೆಂಬರ್ 28ರಂದು ಕಾಂಗ್ರೆಸ್​ನ 131ನೇ ಸ್ಥಾಪನಾ ದಿನದ ಅಂಗವಾಗಿ ಕಾಂಗ್ರೆಸ್ ಮುಖವಾಣಿ ‘ಕಾಂಗ್ರೆಸ್ ದರ್ಶನ’ದಲ್ಲಿ ಲೇಖನ ಪ್ರಕಟವಾಗಿತ್ತು. ಈ ಲೇಖನವು ಕಾಶ್ಮೀರ, ಚೀನಾ ಮತ್ತು ಟಿಬೆಟ್ ವಿವಾದಗಳಿಗೆ ಮಾಜಿ ಪ್ರಧಾನಿ ದಿ. ನೆಹರೂ ಅವರೇ ಕಾರಣ ಎಂದು ತಿಳಿಸಿತ್ತು. ಅಲ್ಲದೆ ಸೋನಿಯಾ ಗಾಂಧಿ ತಂದೆ ಸ್ಟೀಫನೋ ಮೈನೋ ಅವರು ‘ಫ್ಯಾಸಿಸ್ಟ್ ಯೋಧ’ರಾಗಿದ್ದರು ಎಂದು ಹೇಳಿತ್ತು.

ಲೇಖನ ಪ್ರಕಟವಾದ ನಂತರ ಶಿಸ್ತು ಕ್ರಮ ಜರುಗಿಸಲು ಮುಂದಾದ ಕಾಂಗ್ರೆಸ್ ಕಂಟೆಂಟ್ ಎಡಿಟರ್ ಸುಧೀರ್ ಜೋಷಿ ಅವರನ್ನು ಅಮಾನತು ಮಾಡಲಾಗಿತ್ತು. ಈ ಘಟನೆ ಸಂಬಂಧ ನಿರುಪಮ್ ಕ್ಷಮೆ ಕೇಳಿದ್ದರು.