ಚೆನ್ನೈ: ತಮಿಳುನಾಡಿನಿಂದ ಮಲೇಶಿಯಾಗೆ ಕದ್ದು ಸಾಗಣೆ ಮಾಡುತ್ತಿದ್ದ ಸುಮಾರು 500 ನಕ್ಷತ್ರ ಆಮೆಗಳನ್ನು ವನ್ಯಜೀವಿ ಅಪರಾಧ ನಿಯಂತ್ರಣ ಅಧಿಕಾರಿಗಳು ಚೆನ್ನೈ ವಿಮಾನ ನಿಲ್ದಾಣದಲ್ಲಿ ವಶಪಡಿಸಿಕೊಂಡಿದ್ದಾರೆ.
ಈ ನಕ್ಷತ್ರ ಆಮೆ ಮರಿಗಳಿಗೆ ಪ್ರಪಂಚಾದ್ಯಂತ ವಿಶಿಷ್ಟ ಬೇಡಿಕೆಯಿದೆ. ಔಷಧಿಗೆ ಹಾಗೂ ಮನೆಯಲ್ಲಿ ಸಾಕುವ ಉದ್ದೇಶದಿಂದ ಈ ಆಮೆಗಳನ್ನು ಕದ್ದು ಸಾಗಿಸಲಾಗುತ್ತದೆ.
ಥರ್ಮಕೋಲ್ ಬಾಕ್ಸ್ ನಲ್ಲಿ ಆಮೆಗಳನ್ನು ಸಾಗಿಸಲಾಗುತ್ತಿತ್ತು. ಅನುಮಾನ ಗೊಂಡ ದಿ ಥಾಯ್ ಏರ್ ವೇಸ್ ಅಧಿಕಾರಿಗಳು ಕಸ್ಟಮ್ಸ್ ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದಾರೆ. ಅಧಿಕಾರಿಗಳು ಬಂದು ಬಾಕ್ಸ್ ತೆರೆದಾಗ ಅದರಲ್ಲಿ 500 ಆಮೆಗಳು ಪತ್ತೆಯಾಗಿವೆ.
ಇವು ನಕ್ಷತ್ರ ಆಮೆಗಳಾಗಿದ್ದು, ಇವುಗಳ ರಪ್ತನ್ನು ನಿಷೇಧಿಸಲಾಗಿದೆ ಎಂದು ವನ್ಯಜೀವಿ ಅಪರಾಧ ನಿಯಂತ್ರಣ ಅಧಿಕಾರಿಗಳು ಸ್ಪಷ್ಟ ಪಡಿಸಿದ್ದಾರೆ.ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಇವುಗಳ ಮೌಲ್ಯ ಸುಮಾರು 50 ಲಕ್ಷ ರೂಪಾಯಿ ಆಗಿದೆ.
Advertisement