ಇಟಾರ್ಸಿ: ಸಹ ಪ್ರಯಾಣಿಕನೊಬ್ಬ ತಮ್ಮ ಅನುಮತಿ ಪಡೆಯದೇ ಬಾಟಲ್ ನಲ್ಲಿದ್ದ ನೀರು ಕುಡಿದಿದ್ದಕ್ಕೆ ಆಕ್ರೋಶಗೊಂಡ ಮೂವರು ಯುವಕರು ಆತನಿಗೆ ಚಲಿಸುತ್ತಿದ್ದ ರಾಲಿನ ಕಿಟಕಿಗೆ ಕಟ್ಟಿ ಹಿಗ್ಗಾ ಮುಗ್ಗಾ ಥಳಿಸಿರುವ ಘಟನೆ ಮಧ್ಯ ಪ್ರದೇಶದಲ್ಲಿ ನಡೆದಿದೆ. ಮಾರ್ಚ್ 25 ರಂದು ಈ ಅಮಾನವೀಯ ಘಟನೆ ನಡೆದಿದ್ದು ತಡವಾಗಿ ಬೆಳಕಿಗೆ ಬಂದಿದೆ.
ಆರೋಪಿಗಳ ಬಾಟಲಿಯಲ್ಲಿನ ನೀರನ್ನು ಹಲ್ಲೆಗೊಳಗಾದ ಮುಂಬಯಿಯಲ್ಲಿ ಕೆಲಸ ಮಾಡುತ್ತಿರುವ ಸುಮಿತ್ ಎಂಬಾತ ಕುಡಿದಿದ್ದ. ಇದರಿಂದ ಆಕ್ರೋಶಗೊಂಡ ಆರೋಪಿಗಳು ಯುವಕನನ್ನು ರೈಲಿನ ಕಿಟಕಿಗೆ ಕಟ್ಟಿ ಅಮಾನವೀಯವಾಗಿ ಹೊಡೆದಿದ್ದಾರೆ.
ಸುಮಾರು 4 ಗಂಟೆಗಳ ಕಾಲ ಸುಮಿತ್ ನನ್ನು ರೈಲಿನ ಕಿಟಕಿಗೆ ಕಟ್ಟಿ ಹಾಕಿದ್ದಾರೆ. ಮತ್ತೆ ರೈಲು ನಿಂತಾಗ ಪ್ಲಾಟ್ ಪಾರಂ ನಲ್ಲಿ ಮತ್ತೆ ಆತನಿಗೆ ಕರುಣೆಯಿಲ್ಲದೇ ತಮ್ಮ ಬೆಲ್ಟ್ ನಲ್ಲಿ ಹಿಗ್ಗಾ ಮುಗ್ಗಾ ಥಳಿಸಿದ್ದಾರೆ. ನಂತರ ಅಲ್ಲಿದ್ದ ಪ್ರಯಾಣಿಕರು ಸುಮಿತ್ ನನ್ನು ರಕ್ಷಿಸಿದ್ದಾರೆ.
ಹಲ್ಲೆ ಮಾಡಿದ ಯುವಕರು ಬಿಹಾರ ಮೂಲದವರಾಗಿದ್ದು, ಯಾವುದೋ ಸ್ಪರ್ಧಾತ್ಮಕ ಪರೀಕ್ಷೆ ಬರೆಯಲು ಮುಂಬಯಿಗೆ ರೈಲಿನಲ್ಲಿ ತೆರಳುತ್ತಿದ್ದರು. ರೈಲ್ವೆ ರಕ್ಷಣಾ ಪಡೆ ಎಫ್ ಐ ಆರ್ ದಾಖಲಿಸಿದ್ದು ತನಿಖೆ ಮುಂದುವರಿಸಿದೆ.
