ನವದೆಹಲಿ: ದೆಹಲಿ ಸಿಎಂ ಅರವಿಂದ್ ಕೇಜ್ರಿವಾಲ್ ಕೇಂದ್ರ ಸರ್ಕಾರವನ್ನು ಸೇನಾ ವಿರೋಧಿ ಎಂದಿದ್ದು, ಸೇನಾ ಕಾರ್ಯಾಚರಣೆಗಳನ್ನು ಕೇಂದ್ರ ಸರ್ಕಾರ ರಾಜಕೀಯ ಲಾಭಕ್ಕಾಗಿ ಬಳಸಿಕೊಳ್ಳುತ್ತಿದೆ ಎಂದು ಆರೋಪಿಸಿದ್ದಾರೆ.
ಟ್ವಿಟರ್ ನಲ್ಲಿ ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿರುವ ಕೇಜ್ರಿವಾಲ್, ಕ್ಷೀಣಿಸಿದ ಒಆರ್ ಒಪಿ, ಅಂಗವೈಕಲ್ಯ ಪಿಂಚಣಿಯಲ್ಲಿ ಕಡಿತ, ಈಗ ಸೇನಾ ಕಾರ್ಯಾಚರಣೆಯನ್ನು ರಾಜಕೀಯಕ್ಕಾಗಿ ಬಳಸಿಕೊಳ್ಳುತ್ತಿರುವುದು, ಇವೆಲ್ಲವೂ ಕೇಂದ್ರ ಸರ್ಕಾರ ಸೇನಾ ವಿರೋಧಿ ಎಂಬುದನ್ನು ತೋರುತ್ತಿಲ್ಲವೇ? ಎಂದು ಕೇಜ್ರಿವಾಲ್ ಪ್ರಶ್ನಿಸಿದ್ದಾರೆ.
ಶ್ರೇಣಿ ತಾರತಮ್ಯದ ಬಗ್ಗೆ ರಕ್ಷಣಾ ಸಚಿವಾಲಯದ ಪತ್ರ ಉಲ್ಲೇಖಿಸಿ ಮಾಧ್ಯಮ ವರದಿ ಪ್ರಕಟವಾದ ಬೆನ್ನಲ್ಲೇ ಅರವಿಂದ್ ಕೇಜ್ರಿವಾಲ್ ಕೇಂದ್ರ ಸರ್ಕಾರವನ್ನು ಸೇನಾ ವಿರೋಧಿ ಎಂದು ಟೀಕಿಸಿದ್ದಾರೆ. ಈಗ ನಿವೃತ್ತಿ ಪಡೆಯುವ ಯೋಧರಿಗೆ ಸರಿಸಮನಾದ ಪಿಂಚಣಿಯನ್ನು ಈಗಾಗಲೇ ನಿವೃತ್ತರಾದ ಯೋಧರಿಗೆ ನೀಡುವುದು ಒಆರ್ ಒಪಿ ಉದ್ದೇಶವಾಗಿದೆ. ಶೇ.100 ರಷ್ಟು ಅಂಗವೈಕಲ್ಯ ಹೊಂದಿರುವ ಯೋಧರು ಸೇವೆಯಲ್ಲಿದ್ದಾಗಿನಷ್ಟೇ ಪಿಂಚಣಿ ಪಡೆಯಲಿದ್ದಾರೆ. ಆದರೆ ಕೇಂದ್ರ ಸರ್ಕಾರ ಇತ್ತೀಚೆಗಷ್ಟೇ ಜಾರಿಗೊಳಿಸಿದ ಸ್ಲಾಬ್ ವ್ಯವಸ್ಥೆಯ ಅನುಗುಣವಾಗಿ ಅಂಗವೈಕಲ್ಯಕ್ಕೀಡಾದ ಯೋಧರಿಗೆ ಪಿಂಚಣಿ ಕಡಿಮೆಯಾಗಲಿದೆ ಎಂಬ ವರದಿಗಳು ಪ್ರಕಟವಾಗಿದ್ದವು. ನಂತರ ಹಿಂದಿನ ವ್ಯವಸ್ಥೆಯನ್ನೇ ಮುಂದುವರೆಸುವಂತೆ ರಕ್ಷಣಾ ಸಚಿವಾಲಯ 7 ನೇ ವೇತನ ಆಯೋಗಕ್ಕೆ ಸೂಚನೆ ನೀಡಿತ್ತು.
