ಅಖಿಲೇಶ್'ರಂತೆ ಬೇರೆ ಯಾರೂ ನನಗೆ ಈ ರೀತಿ ಅವಮಾನಿಸಿರಲಿಲ್ಲ; ಮುಲಾಯಂ ಸಿಂಗ್

ಲಖನೌ: ಉತ್ತರಪ್ರದೇಶ ವಿಧಾನಸಭಾ ಚುನಾವಣಾ ಪೂರ್ವದಲ್ಲಿ ಉಂಟಾಗಿದ್ದ ಸಮಾಜವಾದಿ ಪಕ್ಷದ ಆಂತರಿಕ ಭಿನ್ನಾಭಿಪ್ರಾಯ ಮತ್ತೊಮ್ಮೆ ಭುಗಿಲೆದ್ದಿದೆ. 

ನಿನ್ನೆಯಷ್ಟೇ ಮೈನ್ ಪುರದಲ್ಲಿ ಪಕ್ಷದ ಕಾರ್ಯಕರ್ತರನ್ನುದ್ದೇಶಿ ಮಾತನಾಡಿರುವ ಸಮಾಜವಾದಿ ಪಕ್ಷದ ಸಂಸ್ಥಾಪಕ ಮುಲಾಯಂ ಸಿಂಗ್ ಯಾದವ್ ಅವರು, ಅಖಿಲೇಶ್ ಅವರ ಕುರಿತಾಗಿ ಅವರಲ್ಲಿರುವ ಅಸಮಾಧಾನವನ್ನು ಹೊರಹಾಕಿದ್ದಾರೆ. 

ಜನರಿಗೆ ಪ್ರಾಮಾಣಿಕನಾಗಿರುವ ವ್ಯಕ್ತಿ, ತನ್ನ ತಂದೆಗೆ ಮಗ ಈ ರೀತಿಯಾಗಿ ಅವಮಾನವನ್ನು ಹೇಗೆ ಮಾಡಲು ಸಾಧ್ಯ? ತಂದೆಗೆ ದ್ರೋಹ ಬಗೆದವರು ಯಾರಿಗೂ ನಿಷ್ಠರಾಗಿರಲಾರರು. ರಾಜಕೀಯ ಜೀವನ ಚಟುವಟಿಕೆಯಲ್ಲಿ ತೊಡಗಿಕೊಂಡಿದ್ದು, ತನ್ನ ಮಗನ ಹೆಸರನ್ನು ಮುಖ್ಯಮಂತ್ರಿ ಸ್ಥಾನಕ್ಕೆ ಸೂಚಿಸಿದ್ದು ಇತಿಹಾಸದಲ್ಲೇ ಇರಲಿಲ್ಲ. ಆದರೆ, ಅದನ್ನು ನಾನು ಮಾಡಿದ್ದೆ. 2012ರ ಚುನಾವಣೆಯಲ್ಲಿ ಜನರು ನನ್ನನ್ನು ನಂಬಿ ಮತಹಾಕಿದ್ದರು. ಆದರೆ, ನಾನು ಅಖಿಲೇಶ್ ನನ್ನು ಮುಖ್ಯಮಂತ್ರಿ ಮಾಡಿದೆ. ಇದಕ್ಕೆ ಪ್ರತಿಯಾಗಿ ಅಖಿಲೇಶ್ ನನಗೆ ನೀಡಿದ್ದೇನು. ನನ್ನ ಜೀವನದಲ್ಲಿಯೇ ನಾನೆಂದಿಗೂ ಈ ರೀತಿಯಾಗಿ ಅವಮಾನಕ್ಕೊಳಗಾಗಿರಲಿಲ್ಲ. 

ಇಷ್ಟೆಲ್ಲಾ ಆದರೂ ನಾನು ಎಲ್ಲಿಯೂ, ಯಾರ ಬಳಿಯೂ ನನ್ನ ರಕ್ತವೇ ಇಂದು ನನ್ನ ವಿರುದ್ಧ ನಿಂತಿದೆ ಎಂದು ಹೇಳಿರಲಿಲ್ಲ. ಪಕ್ಷವೊಂದು ನನ್ನ ಮೇಲೆ ಒಂದಲ್ಲ ಮೂರು ಬಾರಿ ಕೊಲೆ ಮಾಡಲು ಸಂಚು ರೂಪಿಸಿತ್ತು. ಇಂತಹ ಪಕ್ಷದೊಂದಿಗೆ ನನ್ನ ಮಗ ಕೈಜೋಡಿಸಿರುವುದು ನಿಜಕ್ಕೂ ದುರಂತವೇ ಸರಿ ಎಂದು ತಿಳಿಸಿದ್ದಾರೆ. 

ಸಮಾಜವಾದಿ ಪಕ್ಷದ ಅಧ್ಯಕ್ಷ ಅಖಿಲೇಶ್ ಯಾದವ್ ರನ್ನು ಮುಲಾಯಂ ಸಿಂಗ್ ಯಾದವ್ ಅವರು ಟೀಕಿಸುತ್ತಿರುವ ಸಂದರ್ಭದಲ್ಲಿ ಮುಲಾಯ ಸಹೋದರ ಶಿವಪಾಲ್ ಯಾದವ್ ಅವರ ಪಕ್ಕದಲ್ಲಿಯೇ ನಿಂತಿದ್ದರು. ಕಳೆದ ಬಾರಿಯ ಅಖಿಲೇಶ್ ಸಚಿವ ಸಂಪುಟದಿಂದ ಶಿವಪಾಲ್ ರಿಗೆ ಗೇಟ್ ಪಾಸ್ ನೀಡಿದ್ದಕ್ಕೆ ಮುಲಾಯಂ ಅವರು ಆಕ್ರೋಶ ವ್ಯಕ್ತಪಡಿಸಿದ್ದರು.