ಬಿಲ್ ಪಾವತಿಸದಿದ್ದರೆ ಆಸ್ಪತ್ರೆಗಳು ರೋಗಿಯನ್ನು ಒತ್ತೆ ಇಟ್ಟುಕೊಳ್ಳುವಂತಿಲ್ಲ: ದೆಹಲಿ ಹೈಕೋರ್ಟ್

ನವದೆಹಲಿ:  ಬಿಲ್ ಪಾವತಿಸಲು ಶಕ್ತವಾಗಿಲ್ಲದಿದ್ದರೇ ರೋಗಿಗಳನ್ನು ಆಸ್ಪತ್ರೆಯಲ್ಲಿ ಒತ್ತೆಯಾಳಾಗಿಸಿಕೊಳ್ಳುವಂತಿಲ್ಲ ಎಂದು ದೆಹಲಿ ಹೈಕೋರ್ಟ್ ಸೂಚಿಸಿದೆ.

ರೋಗಿಗಳನ್ನು ಒತ್ತೆಯಾಗಿಸಿಕೊಳ್ಳುವುದು ಕಾರ್ಯ ನಿರ್ವಹಣೆಗೆ ವಿರೋಧವಾದದ್ದು (ಮೊಡಸ್ ಒಪೆರಾಂಡಿ) ಎಂದು ನ್ಯಾಯಮೂರ್ತಿ ವಿಪಿನ್ ಸಂಘಿ ಮತ್ತು ದೀಪಾ ಶರ್ಮಾ ಅವರನ್ನೊಳಗೊಂಡ ನ್ಯಾಯಪೀಠ ಅಭಿಪ್ರಾಯ ಪಟ್ಟಿದೆ.

ಒಂದು ವೇಳೆ ಬಿಲ್ ಪಾವತಿಸದಿದ್ದರೂ ರೋಗಿಯನ್ನು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಬೇಕು, ನೀವು ಯಾವುದೇ ಕಾರಣಕ್ಕೂ ರೋಗಿಯನ್ನು ಆಸ್ಪತ್ರೆಯಲ್ಲಿರಿಸಿಕೊಳ್ಳುವಂತಿಲ್ಲ ಅದರ ಮೊಡಸ್ ಒಪೆರಾಂಡಿ ಆಗುವುದಿಲ್ಲ ಎಂದು ಹೇಳಿದೆ.

ಆಸ್ಪತ್ರೆ ಬಾಕಿ ಉಳಿದಿದ್ದರೂ ರೋಗಿಯನ್ನು ಆಸ್ಪತ್ರೆಯಲ್ಲಿ ಉಳಿಸಿಕೊಳ್ಳುವ ಅಭ್ಯಾಸವನ್ನು ನಾವು ವಿರೋಧಿಸುತ್ತೇವೆ ಎಂದು ದೆಹಲಿಯ ಗಂಗಾ ರಾಮ್ ಆಸ್ಪತ್ರೆಗೆ ದೆಹಲಿ ಹೈಕೋರ್ಟ್ ಹೇಳಿದೆ. 

ಮಧ್ಯಪ್ರದೇಶದ ಮಾಜಿ ಪೊಲೀಸೊಬ್ಬರು ಫೆಬ್ರವರಿಯಲ್ಲಿ ಆಸ್ಪತ್ರೆಗೆ ದಾಖಲಾಗಿದ್ದರು, ಫಿಸ್ತೂಲದಿಂದ ನರಳುತ್ತಿದ್ದ ಪೊಲೀಸಪ್ಪನಿಗೆ ಸರ್ಜರಿ ಮಾಡಲಾಗಿತ್ತು. ಆಸ್ಪತ್ರೆಗೆ 13.45 ಲಕ್ಷ ಬಿಲ್ ಪಾವತಿ ಮಾಡಬೇಕಿತ್ತು. ಆದರೆ ಆಸ್ಪತ್ರೆ ತನ್ನ ತಂದೆಗೆ ಸರಿಯಾದ ಚಿಕಿತ್ಸೆ ನೀಡಲಿಲ್ಲ, ಜೊತೆಗೆ ಆಸ್ಪತ್ರೆಯಿಂದ ಕರೆದುಕೊಂಡು ಹೋಗಲು ಬಿಟ್ಟಿಲ್ಲ ಎಂದು ಆರೋಪಿಸಿದ್ದರು, ಬಿಲ್ ಪಾವತಿಸದ ಕಾರಣ ರೋಗಿಯನ್ನು ಖಾಸಗಿ ವಾರ್ಡ್ ನಿಂದ ಜನರಲ್ ವಾರ್ಡ್ ಗೆ ಶಿಫ್ಟ್ ಮಾಡಲಾಗಿತ್ತು. ಒಟ್ಟು 16.75 ಲಕ್ಷ ಬಿಲ್ ಆಗಿತ್ತು, ಆದರಲ್ಲಿ ಪೊಲೀಸಪ್ಪನ ಮಗ ಕೇವಲ 3.3 ಲಕ್ಷ ಮಾತ್ರ ಪಾವತಿಸಿದ್ದರು.

ಏಪ್ರಿಲ್ 21 ರಂದು ರೋಗಿಗೆ ಸರ್ಜರಿ ಮಾಡಲಾಗಿತ್ತು, ಆದರೆ ಏಪ್ರಿಲ್ 20 ರಂದು ರೋಗಿಯ ಪುತ್ರ ಪೊಲೀಸರಿಗೆ ದೂರು ದಾಖಲಿಸಿದ್ದರು.ಜೊತೆಗೆ ಹೇಬಿಯಲ್ ಕಾರ್ಪಸ್ ಅರ್ಜಿ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ನ್ಯಾಯಾಲಯ ತೀರ್ಪು ನೀಡಿದೆ.