2019 ರ ಸಾರ್ವತ್ರಿಕ ಚುನಾವಣೆಗೂ ಮೋದಿಯೇ ನೆಚ್ಚಿನ ನಾಯಕ: ಅಮೆರಿಕಾ ತಜ್ಞರು

ವಾಷಿಂಗ್ ಟನ್: ಪಂಚ ರಾಜ್ಯಗಳ ಚುನಾವಣಾ ಫಲಿತಾಂಶದಲ್ಲಿ ದಿಗ್ವಿಜಯ ಸಾಧಿಸಿದ್ದ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ದಿ ಮ್ಯಾನ್ ಆಫ್ ಆಕ್ಷನ್ ಎಂದು ಬಣ್ಣಿಸಿದ್ದ ಅಮೆರಿಕ ತಜ್ಞರು ಈಗ 2019 ರ ಸಾರ್ವತ್ರಿಕ ಚುನಾವಣೆಗೂ ಪ್ರಧಾನಿ ನರೇಂದ್ರ ಮೋದಿಯೇ ನೆಚ್ಚಿನ ಜನ ನಾಯಕ ಎನ್ನುತ್ತಿದ್ದಾರೆ. 

ಉತ್ತರ ಪ್ರದೇಶ, ಉತ್ತರಾಖಂಡ, ಪಂಜಾಬ್, ಗೋವಾ, ಮಣಿಪುರದ ವಿಧಾನಸಭಾ ಚುನಾವಣೆಗಳ ಫಲಿತಾಂಶದ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಅಮೆರಿಕಾದ ಓರ್ವ ತಜ್ಞ 2014 ರ ಲೋಕಸಭಾ ಚುನಾವಣಾ ಫಲಿತಾಂಶ ಸಾಮಾನ್ಯವಾಗಿ ರಾಜಕೀಯದಲ್ಲಿರುವ ಏರಿಳಿತವಾಗಿರಲಿಲ್ಲ ಎಂದಿದ್ದರೆ ಮತ್ತೋರ್ವ ತಜ್ಞ 2019 ರಲ್ಲೂ ಮೋದಿಯೇ ಪ್ರಧಾನಿಯಾಗಲಿದ್ದಾರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. 

2014 ರ ಲೋಕಸಭಾ ಚುನಾವಣೆಗೂ ಪಂಚ ರಾಜ್ಯಗಳ ಚುನಾವಣಾ ಫಲಿತಾಂಶಗಳಿಗೂ ಹೆಚ್ಚಿನ ವ್ಯತ್ಯಾಸವಿಲ್ಲ ಎಂದು ಜಾರ್ಜ್ ವಾಷಿಂಗ್ ಟನ್ ವಿವಿಯ ಸಹಾಯಕ ಪ್ರಾಧ್ಯಾಪಕ ಆಡಮ್ ಜೆಗ್ಫೀಲ್ಡ್ ಅಭಿಪ್ರಾಯಪಟ್ಟಿದ್ದಾರೆ. ಪಂಚ ರಾಜ್ಯಗಳ ಚುನಾವಣೆ ಮೂಲಕ 2019 ರಲ್ಲಿಯೂ ತಮ್ಮ ನೇತೃತ್ವದ ಪಕ್ಷವೇ ಗೆಲ್ಲಲಿದೆ ಎಂಬುದನ್ನು ಸ್ಪಷ್ಟಪಡಿಸಿದ್ದಾರೆ ಎಂದು ಅಮೆರಿಕಾ ತಜ್ಞರು ಹೇಳಿದ್ದಾರೆ.