ಭಾರತ ಮತ್ತು ಇಟಲಿ ಬಲವಾದ ಆರ್ಥಿಕ ಸಂಬಂಧವನ್ನು ಹೊಂದಿವೆ: ಪ್ರಧಾನಿ ಗೆಂಟಿಲೊನಿ

ನವದೆಹಲಿ: ಆರ್ಥಿಕ ಸಂಬಂಧಗಳು, ಸಾಮಾನ್ಯ ಆಸಕ್ತಿ ವಿಷಯಗಳು ಮತ್ತು ಭಯೋತ್ಪಾದನೆ ವಿರುದ್ಧ ಹೋರಾಟ ವಿಷಯಗಳಲ್ಲಿ ಭಾರತ ಮತ್ತು ಇಟೆಲಿ ದೇಶಗಳು ದೃಢವಾಗಿವೆ ಎಂದು ಇಟೆಲಿ ಪ್ರಧಾನಿ ಪಾವೊಲೊ ಗೆಂಟಿಲೋನಿ ಹೇಳಿದ್ದಾರೆ.

ರಾಷ್ಟ್ರಪತಿ ಭವನದಲ್ಲಿ ಪ್ರಧಾನಿ ಮೋದಿಯವರಿಂದ ಭವ್ಯವಾದ ಸ್ವಾಗತ ಸಿಕ್ಕಿದ ನಂತರ ಮಾತನಾಡಿದ ಅವರು, ಎರಡೂ ದೇಶಗಳ ಮಧ್ಯೆ ಗಟ್ಟಿಯಾದ ಆರ್ಥಿಕ ಸಂಬಂಧವಿದೆ.

ಅದನ್ನು ಮತ್ತಷ್ಟು ಗಟ್ಟಿಗೊಳಿಸಲು ಇದೊಂದು ವೇದಿಕೆಯಾಗಿದೆ. ಜಾಗತಿಕ ಮಟ್ಟದಲ್ಲಿ ನಾವು ಸಮಾನ ಆಸಕ್ತಿಯನ್ನು ಹೊಂದಿದ್ದೇವೆ. ಭಾರತದಲ್ಲಿ ಸುಧಾರಣೆ ಕಾರ್ಯಗಳು ನಡೆಯುತ್ತಿವೆ. ಇದು ಇಟೆಲಿಯ ಉದ್ಯಮ ಸಮುದಾಯಕ್ಕೆ ಬಂಡವಾಳ ಹೂಡಿಕೆಗೆ ಒಳ್ಳೆಯ ಅವಕಾಶವಾಗಿದೆ. ಇಟೆಲಿಯಲ್ಲಿ ಕೂಡ ಭಾರತದ ಉತ್ತಮ ಕಂಪೆನಿಗಳು ಹೂಡಿಕೆ ಮಾಡಿವೆ ಎಂದು ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ ಹೇಳಿದರು.

ಭಯೋತ್ಪಾದನೆ ವಿರುದ್ಧ ಹೋರಾಡಲು ಮತ್ತು ಹವಾಮಾನ ಬದಲಾವಣೆಯನ್ನು ವಿರೋಧಿಸಿ ಕೆಲಸ ಮಾಡಲು ಬದ್ಧರಾಗಿದ್ದೇವೆ ಎಂದು ಕೂಡ ಪಾವೊಲ್ ಗೆಂಟಿಲೋನಿ ಹೇಳಿದರು. ಎರಡೂ ದೇಶಗಳು ಸಾಮಾನ್ಯ ಗುರಿಯನ್ನು ಹೊಂದಿದೆ ಅದು ಪ್ರಜಾಪ್ರಭುತ್ವ. ಈ ನಿಟ್ಟಿನಲ್ಲಿ ಸಂಬಂಧವನ್ನು ಪುನರ್ ಆರಂಭಿಸಲು ತಮ್ಮ ಭೇಟಿ ಒಂದು ವೇದಿಕೆಯಾಗಿದೆ ಎಂದರು.