ರಾಜಕೀಯ ಲಾಭಕ್ಕಾಗಿ ಮೋದಿಯಿಂದ ಯೋಗಕ್ಕೆ ಉತ್ತೇಜನ, ಯೋಗದಿಂದ ಆರ್ಥಿಕತೆ ಸುಧಾರಣೆಯಾಗಲ್ಲ: ಕಾಂಗ್ರೆಸ್

ಯೋಗಕ್ಕೆ ಸಂಬಂಧಿಸಿದಂತೆ ಪ್ರಧಾನಿ ನರೇಂದ್ರ ಮೋದಿ ಅವರ ಉದ್ದೇಶ ಶುದ್ಧಿಯನ್ನು ಕಾಂಗ್ರೆಸ್ ಪ್ರಶ್ನಿಸಿದ್ದು, ಮೋದಿ ಕೇವಲ ರಾಜಕೀಯ ಲಾಭಕ್ಕಾಗಿ ಯೋಗವನ್ನು ಉತ್ತೇಜಿಸುತ್ತಿದ್ದಾರೆ ಎಂದು ಆರೋಪಿಸಿದೆ. ಯೋಗ ದೇಶದ ಆರ್ಥಿಕತೆಯನ್ನು ಉತ್ತಮಗೊಳಿಸುವುದಿಲ್ಲ, ಅಷ್ಟೇ ಅಲ್ಲದೇ ಬಿಜೆಪಿ ಮತ್ತು ಮೋದಿ ಒಡೆಯುತ್ತಿರುವ ಸಮಾಜ ಯೋಗದಿಂದ ಒಟ್ಟುಗೂಡುವುದಕ್ಕೆ ಸಾಧ್ಯವಿಲ್ಲ ಎಂದು ಹೇಳಿದೆ. 

ಮೋದಿ ಹಾಗೂ ಅವರ ಪಕ್ಷ ಸಮಾಜವನ್ನು ಒಡೆಯುತ್ತಿದ್ದಾರೆ. ಯೋಗದ ಮೂಲಕ ಅದನ್ನು ಗುಣಪಡಿಸುವುದಕ್ಕೆ ಸಾಧ್ಯವಿಲ್ಲ, ಯೋಗದಿಂದ ನಿಮ್ಮ ದೇಹದ ಸ್ವಾಸ್ಥ್ಯ ಕಾಪಾಡಿಕೊಳ್ಳುವುದಕ್ಕೆ ಸಾಧ್ಯ, ಸಮಾಜದ ಸ್ವಾಸ್ಥ್ಯವನ್ನು ಕಾಪಾಡಲು ಸಾಧ್ಯವಿಲ್ಲ ಎಂದು ಕಾಂಗ್ರೆಸ್ ವಕ್ತಾರ ಪ್ರಮೋದ್ ತಿವಾರಿ ಹೇಳಿದ್ದಾರೆ. 

ಮೋದಿ ಸಮಾಜದ ಸ್ವಾಸ್ಥ್ಯವನ್ನು ಬಯಸುತ್ತಿದ್ದರೆ ಅವರು ತಮ್ಮ ಕಾರ್ಯವಿಧಾನವನ್ನು ಬದಲಾವಣೆ ಮಾಡಿಕೊಳ್ಳಬೇಕು ಎಂದು ಪ್ರಮೋದ್ ತಿವಾರಿ ಸಲಹೆ ನೀಡಿದ್ದಾರೆ. ಯೋಗದ ಮೊತ್ತ ಮೊದಲ ಅಂಶವೇ ಅದನ್ನು ಪ್ರದರ್ಶನಕ್ಕಿಡಬಾರದೆಂಬುದಾಗಿದೆ, ಯೋಗಾಭ್ಯಾಸ ಖಾಸಗಿ ವಿಷಯವಾಗಿರಬೇಕು, ಆದರೆ ಮೋದಿ ಈ ನಿಯಮವನ್ನು ಉಲ್ಲಂಘಿಸಿದ್ದಾರೆ ಎಂದು ಕಾಂಗ್ರೆಸ್ ಆರೋಪಿಸಿದೆ. 

ಯೋಗವನ್ನು ಮೋದಿ ಉತ್ತೇಜಿಸಲು ಆದರೆ ಮೋದಿ ಆ ಕೆಲಸವನ್ನು ಸರಿಯಾದ ಉದ್ದೇಶದಿಂದ ಮಾಡುತ್ತಿಲ್ಲ, ಕೇವಲ ರಾಜಕೀಯಕ್ಕಾಗಿ ಮಾಡುತ್ತಿದ್ದಾರೆ ಎಂದು ತಿವಾರಿ ಹೇಳಿದ್ದಾರೆ.