ಕತ್ತು ಸೀಳಿ ಭಾರತೀಯ ಸೇನೆಯ ಮೇಜರ್​ ಅಮಿತ್​ ದ್ವಿವೇದಿ ಪತ್ನಿಯ ಭೀಕರ ಕೊಲೆ

ನವದೆಹಲಿ: ಭಾರತೀಯ ಸೇನೆ ಮೇಜರ್​ ಅಮಿತ್​ ದ್ವಿವೇದಿ ಪತ್ನಿ ಶೈಲಜಾ ಅವರನ್ನು ದೆಹಲಿಯಲ್ಲಿ ಭೀಕರವಾಗಿ ಕೊಲೆ ಮಾಡಲಾಗಿದ್ದು, ಅವರ ಕತ್ತು ಸೀಳಿ, ದೇಹದ ಮೇಲೆ ಹಲವು ಬಾರಿ ಕಾರು ಚಲಾಯಿಸಲಾಗಿದೆ.

ದೆಹಲಿಯ ಮೆಟ್ರೋ ನಿಲ್ದಾಣದ ಬಳಿ ಶೈಲಜಾ ಅವರ ಮೃತದೇಹ ಪತ್ತೆಯಾಗಿದ್ದು, ಈ ಬಗ್ಗೆ ದಾರಿ ಹೋಕರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪ್ರಸ್ತುತ ಘಟನಾ ಸ್ಥಳಕ್ಕೆ ದೌಡಾಯಿಸಿರುವ ಪೊಲಿೀಸರು ಶವಪತ್ತೆಯಾದ ಸ್ಥಳದ ಮಹಜರು ಮಾಡಿದ್ದು, ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.

ಪೊಲೀಸರು ಈ ಪ್ರಕರಣದ ಪ್ರಾಥಮಿಕ ತನಿಖೆಯ ನಂತರ ಇನ್ನೊಬ್ಬ ಮೇಜರ್​ ಮೇಲೆ ಅನುಮಾನ ವ್ಯಕ್ತಪಡಿಸಿದ್ದು, ಅವರು ಶೈಲಜಾ ಹಾಗೂ ಆಕೆಯ ಪತಿಗೆ ಇಬ್ಬರಿಗೂ ಸ್ನೇಹಿತರಾಗಿದ್ದಾರೆ ಎಂದು ತಿಳಿದುಬಂದಿದೆ. ಅಲ್ಲದೆ ಈ ಸಂಬಂಧ ಅವರನ್ನು ಸಂಪರ್ಕಿಸಲು ಪೊಲೀಸರು ಯತ್ನಿಸಿದ್ದು, ಈಗ ಅವರು ಸಂಪರ್ಕಕ್ಕೆ ಸಿಗುತ್ತಿಲ್ಲ. ಅಲ್ಲದೆ ಫೋನ್​ ಕೂಡ ಸ್ವಿಚ್​ ಆಫ್​ ಬರುತ್ತಿದೆ. ಹೀಗಾಗಿ ಪೊಲೀಸರು ಅವರ ಮೇಲೆಯೇ ಬಲವಾದ ಅನುಮಾನ ವ್ಯಕ್ತಪಡಿಸಿದ್ದಾರೆ. 

ಈ ಬಗ್ಗೆ ಮಾಹಿತಿ ನೀಡಿರುವ ಪೊಲೀಸ್​ ಜಂಟಿ ಕಮಿಷನರ್​ ಮಧುಪ್​ ತಿವಾರಿ, 'ಶೈಲಜಾ ಕೊಲೆ ಪ್ರಕರಣ ಮೊದಲು ನೋಡಿದರೆ ಅದೊಂದು ಅಪಘಾತವೆಂದೆನಿಸುತ್ತದೆ. ಆದರೆ ಪ್ರಾಥಮಿಕ ತನಿಖೆಯಿಂದ ಇದು ಕೊಲೆಯೆಂಬುದು ಸಾಬೀತಾಗಿದೆ ಎಂದಿದ್ದಾರೆ.

ಮೂಲಗಳ ಪ್ರಕಾರ ಶೈಲಜಾ ಅವರು ಶನಿವಾರ ಬೆಳಗ್ಗೆ 10 ಗಂಟೆ ಸುಮಾರಿಗೆ ಆರ್ಮಿ ವಾಹನದಲ್ಲಿ ದೆಹಲಿ ಬೇಸ್​ ಆಸ್ಪತ್ರೆಯಲ್ಲಿ ಫಿಸಿಯೋಥೆರಪಿ ಸೆಶನ್​ಗೆಂದು ತೆರಳಿದ್ದರು. ಅದು ಮುಗಿದ ಬಳಿಕ ಡ್ರೈವರ್​ ಆಕೆಯನ್ನು ಕರೆತರಲು ಹೋದಾಗ ಶೈಲಜಾ ಸೆಶನ್​ನಲ್ಲಿ ಪಾಲ್ಗೊಂಡಿಲ್ಲ ಎಂಬ ಮಾಹಿತಿ ತಿಳಿದಿದೆ. ಆಕೆ ಆಸ್ಪತ್ರೆಯಲ್ಲಿ ಇಲ್ಲವೆಂದು ತಿಳಿದ ಬಳಿಕ ವಾಪಸ್​ ಪರೇಡ್​ ಮೈದಾನಕ್ಕೆ ಹೋಗಿ ಅಮಿತ್​ ದ್ವಿವೇದಿಗೆ ಮಾಹಿತಿ ನೀಡಿದ್ದಾರೆ. ಆಗ ಅಮಿತ್​ ಅವರು ಪತ್ನಿಯನ್ನು ಹುಡುಕಲು ಪ್ರಾರಂಭಿಸಿದ್ದು, ಮೆಟ್ರೋ ಸ್ಟೇಶನ್​ ಬಳಿ ದಾರಿಹೋಕರೊಬ್ಬರು ಮಹಿಳೆಯ ಶವವಿದೆ ಎಂದು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. 

ಅದಾದ ಬಳಿಕ ಮಧ್ಯಾಹ್ನ 4.30ಕ್ಕೆ ನಾರೈನ ಪೊಲೀಸ್​ ಠಾಣೆಯಲ್ಲಿ ಅಮಿತ್​ ತಿವಾರಿ ಪತ್ನಿ ಕಾಣೆಯಾದ ಬಗ್ಗೆ ದೂರು ನೀಡಲು ಹೋದಾಗ ಅನುಮಾನಗೊಂಡ ಪೊಲೀಸರು ಮೃತಪಟ್ಟ ಮಹಿಳೆಯನ್ನು ತೋರಿಸಿದ್ದಾರೆ. ಶೈಲಜಾ ಆಸ್ಪತ್ರೆಗೆಂದು ಹೋದರೂ ಅಲ್ಲಿಗೆ ಹೋಗಿಲ್ಲ. ಅಲ್ಲಿಂದ ಇನ್ಯಾರೋ ಪರಿಚಯದವರೇ ಬೇರೆ ವಾಹನದಲ್ಲಿ ಆಕೆಯನ್ನು ಕರೆದೊಯ್ದು ಕೊಲೆ ಮಾಡಿದ್ದಾರೆ. ನಂತರ ಆಕ್ಸಿಡೆಂಟ್​ ಎಂದು ತೋರಲು ಕಾರಿನಿಂದ ಡಿಕ್ಕಿ ಹೊಡೆಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.