ಆಧಾರ್ ದತ್ತಾಂಶ ಸಂಪೂರ್ಣ ಸುರಕ್ಷಿತವಾಗಿದೆ: ಸುಪ್ರೀಂಗೆ ಯುಐಡಿಎಐ

ನವದೆಹಲಿ: ಆಧಾರ್ ಪಡೆಯಲು ನೀಡಿದ ಬಯೋಮೆಟ್ರಿಕ್ ಮತ್ತು ಜನಸಂಖ್ಯಾ ಮಾಹಿತಿ ಸಂಪೂರ್ಣ ಸುರಕ್ಷಿತವಾಗಿದೆ ಮತ್ತು ಇದರ ಕೊರತೆಯಿಂದಾಗಿ ಸೌಲಭ್ಯಗಳಿಂದ ಯಾರೂ ವಂಚಿತರಾಗಬೇಕಾಗಿಲ್ಲ ಎಂದು ಭಾರತೀಯ ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರ(ಯುಐಡಿಎಐ) ಗುರುವಾರ ಸುಪ್ರೀಂ ಕೋರ್ಟ್ ಗೆ ಸ್ಪಷ್ಟಪಡಿಸಿದೆ.

ಆಧಾರ್ ಗೆ ಸಂಬಂಧಿಸಿದಂತೆ ಇದೇ ಮೊದಲ ಬಾರಿಗೆ ಕೋರ್ಟ್ ನಲ್ಲಿ ಪವರ್‌ ಪಾಯಿಂಟ್‌ ಪ್ರಸೆಂಟೇಷನ್‌ ಮೂಲಕ ಉತ್ತರ ನೀಡಿದ ಯುಐಡಿಎಐ ಸಿಇಒ ಅಜಯ್ ಭೂಷಣ್ ಪಾಂಡ್ಯ ಅವರು, ಆಧಾರ್ ಗಾಗಿ ಜನರಿಂದ ಸಂಗ್ರಹಿಸಿದ ದತ್ತಾಂಶ ಸಂಪೂರ್ಣ ಸುರಕ್ಷಿತವಾಗಿ ಎಂದು ಹೇಳಿದ್ದಾರೆ.

ಹುಟ್ಟಿದ ಮಗುವಿನಿಂದಲೂ ನಾವು ಮಾಹಿತಿ ಸಂಗ್ರಹಿಸುತ್ತಿದ್ದು, ಇದನ್ನು ಎರಡು ಬಾರಿ ನವೀಕರಿಸಬಹುದಾಗಿ. ಐದನೇ ವಯಸ್ಸಿನಲ್ಲಿ ಮತ್ತು 15ನೇ ವರ್ಷದಲ್ಲಿ ನವೀಕರಿಸಬಹುದಾಗಿದೆ. ಈಗಾಗಲೇ 1.2 ಬಿಲಿಯನ್ ಭಾರತೀಯರು ಆಧಾರ್ ಪಡೆದಿದ್ದಾರೆ ಎಂದು ಪಾಂಡ್ಯ ಅವರು ಮುಖ್ಯ ನ್ಯಾಯಮೂರ್ತಿ ದೀಪಕ್ ಮಿಶ್ರಾ ನೇತೃತ್ವದ ಸಂವಿಧಾನಿಕ ಪೀಠಕ್ಕೆ ವಿವರಿಸಿದರು.

ಒಂದು ಬಾರಿ ವಿಶಿಷ್ಟ ಗುರುತಿನ ಸಂಖ್ಯೆ ನೀಡಿದರೆ ಅದು ಆ ವ್ಯಕ್ತಿ ಮರಣದ ನಂತರವೂ ಪುನರಾವರ್ತಿತವಾಗುವುದಿಲ್ಲ ಎಂದು ಪಾಂಡ್ಯ ಹೇಳಿದ್ದಾರೆ.

ಆಧಾರ್ ನಿರ್ವಹಣಾ ವ್ಯವಸ್ಥೆ ಸರಿ ಇಲ್ಲ ಎಂಬ ಆರೋಪಕ್ಕೆ ಉತ್ತರಿಸಿದ ಪಾಂಡ್ಯ, ಆಧಾರ್ ಇಲ್ಲ ಎಂಬ ಕಾರಣಕ್ಕೆ ಯಾರೂ ಸೌಲಭ್ಯ ವಂಚಿತರಾಗಬಾರದು. ಐದು ವರ್ಷಗಳಿಗೊಮ್ಮೆ ಬಯೋಮೆಟ್ರಿಕ್ ವ್ಯವಸ್ಥೆಯನ್ನು ಬದಲಾಯಿಸಲಾಗುತ್ತದೆ ಮತ್ತು ಪ್ರತಿ ವರ್ಷ ನಾವು 25 ಕೋಟಿ ಆಧಾರ್ ಕಾರ್ಡ್ ಗಳ ಮಾಹಿತಿಯನ್ನು ನವೀಕರಿಸುತ್ತಿದ್ದೇವೆ ವಿವರಿಸಿದ್ದಾರೆ.

ಪ್ರತಿ ಸಮಸ್ಯೆಯನ್ನು ಯುಐಡಿಎಐ ಪರಿಹರಿಸಲು ಸಾಧ್ಯವಿಲ್ಲ. ಒಂದು ವೇಳೆ ವ್ಯಕ್ತಿಯೊಬ್ಬರಿಗೆ ಬಯೋಮೆಟ್ರಿಕ್ ವಿವರಗಳು ಹೊಂದಾಣಿಕೆಯಾಗುತ್ತಿಲ್ಲ ಎಂಬ ಕಾರಣಕ್ಕೆ ಪಡಿತರ ನೀಡಲು ನಿರಾಕರಿಸಿದರೆ ನೀವು ಏನು ಮಾಡುತ್ತೀರಾ? ಎಂದು ನ್ಯಾಯಮೂರ್ತಿ ಎಕೆ ಸಿಕ್ರಿ ಅವರು ಪ್ರಶ್ನಿಸಿದರು.

ಇದಕ್ಕೆ ಉತ್ತರಿಸಿದ ಪಾಂಡ್ಯ, ಇಂತಹ ಪ್ರಕರಣಗಳನ್ನು ಬೇರೆ ರೀತಿಯಲ್ಲಿ ನಿರ್ವಹಿಸುತ್ತೇವೆ. ಆ ವ್ಯಕ್ತಿ ಸೌಲಭ್ಯ ವಂಚಿತನಾಗಿದ್ದಾನೋ ಅಥವಾ ಆಧಾರ್ ಆಧಾರಿತ ಸೇವೆ ಸಿಗಲಿಲ್ಲವೋ ಎಂಬುದನ್ನು ಪರಿಶೀಲಿಸಲಾಗುತ್ತದೆ ಎಂದು ಹೇಳಿದ್ದಾರೆ.