ಕೋವಿಡ್-19 ಸವಾಲಿನ ನಡುವೆಯೂ ರಾಫೆಲ್ ಜೆಟ್ ಗಳು ಸೂಕ್ತ ಸಮಯಕ್ಕೆ ತಲುಪಲಿವೆ: ರಾಜನಾಥ್ ಸಿಂಗ್ 

ನವದೆಹಲಿ: ಕೋವಿಡ್-19 ರ ಸವಾಲಿನ ನಡುವೆಯೂ ಫ್ರಾನ್ಸ್ ರಾಫೆಲ್ ಜೆಟ್ ಗಳನ್ನು ಸೂಕ್ತ ಸಮಯಕ್ಕೆ ತಲುಪಿಸಲಿದೆ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಹೇಳಿದ್ದಾರೆ. 

ಫ್ರಾನ್ಸ್ ನ ರಕ್ಷಣಾ ಸಚಿವರೊಂದಿಗೆ ದೂರವಾಣಿ ಮಾತುಕತೆ ನಡೆಸಿದ ನಂತರ ರಾಜನಾಥ್ ಸಿಂಗ್ ಈ ಹೇಳಿಕೆ ನೀಡಿದ್ದಾರೆ. ದೂರವಾಣಿ ಸಂಭಾಷಣೆಯಲ್ಲಿ ಉಭಯ ನಾಯಕರೂ ಕೋವಿಡ್-19, ಪ್ರಾದೇಶಿಕ ಭದ್ರತೆ ಸೇರಿಂದತೆ ಪರಸ್ಪರ ಕಾಳಜಿಯ ವಿಷಯಗಳ ಬಗ್ಗೆ ಚರ್ಚಿಸಿದ್ದಾರೆ. 

ಫ್ರಾನ್ಸ್ ನ ರಕ್ಷಣಾ ಸಚಿವರೊಂದಿಗೆ ಮಾತುಕತೆ ನಡೆಸಿದ್ದೇನೆ, ದ್ವಿಪಕ್ಷೀಯ ರಕ್ಷಣಾ ಸಹಕಾರವನ್ನು ಉತ್ತಮಗೊಳಿಸುವ ಬಗ್ಗೆ ಚರ್ಚೆ ನಡೆಸಿದ್ದೇವೆ ಎಂದು ರಾಜನಾಥ್ ಸಿಂಗ್ ಹೇಳಿದ್ದಾರೆ. 

ಫ್ರಾನ್ಸ್ ಕೋವಿಡ್-19 ಸವಾಲಿನ ಸಂದರ್ಭದಲ್ಲೂ ಸೂಕ್ತ ಸಮಯಕ್ಕೆ ರಾಫೆಲ್ ಜೆಟ್ ಗಳನ್ನು ಭಾರತಕ್ಕೆ ತಲುಪಿಸಲು ಬದ್ಧವಾಗಿದೆ. ಮೊದಲ ನಾಲ್ಕು ರಾಫೆಲ್ ಫೈಟರ್ ಜೆಟ್ ಗಳು ಜುಲೈ ಅಂತ್ಯದ ವೇಳೆಗೆ ಭಾರತಕ್ಕೆ ಬರಲಿವೆ. ಮೇ ಅಂತ್ಯಕ್ಕೆ ಬರಬೇಕಿತ್ತಾದರೂ ಕೋವಿಡ್-19 ಕಾರಣದಿಂದ ವಿಳಂಬವಾಗಿದೆ.