ಅತಿಯಾಗಿ ಟಿವಿ ನೋಡುತ್ತಿದ್ದ ಮಗನಿಗೆ ಬೈದ ತಾಯಿ: 14 ವರ್ಷದ ಬಾಲಕ ಆತ್ಮಹತ್ಯೆಗೆ ಶರಣು!

ಪುಣೆ: ಅತಿಯಾಗಿ ಟಿವಿ ನೋಡುತ್ತಿದ್ದ ಮಗನಿಗೆ ತಾಯಿಯೊಬ್ಬಳು ಬೈದು ಬುದ್ದಿ ಹೇಳಿದ ಕಾರಣಕ್ಕೆ ನೊಂದ 14 ವರ್ಷದ ಬಾಲಕನೊಬ್ಬ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಮಹಾರಾಷ್ಟ್ರದ ಪುಣೆಯಲ್ಲಿ ನಡೆದಿದೆ. 

ಬಿಬ್ವೇವಾಡಿ ಎಂಬ ಪ್ರದೇಶದ ನಿವಾಸಿಯಾಗಿದ್ದ ಆದರ್ಶ್ ಚಾವ್ಲ್ ಎಂಬ ಬಾಲರಕ ಮಂಗಳವಾರ ಬೆಳಗ್ಗಿನಿಂದಲೂ ಟಿವಿ ಮುಂದೆಯೇ ಕುಳಿತುಕೊಂಡಿದ್ದ. ಇದನ್ನು ಕಂಡ ತಾಯಿ ಬೈದು ಬುದ್ದಿ ಹೇಳಿ, ಟಿವಿಯನ್ನು ಆಫ್ ಮಾಡಿದ್ದಾರೆ. 

ಇದರಿಂದ ನೊಂದ ಬಾಲಕ ಮಹಡಿ ಮೇಲೆ ತೆರಳಿ ಸೀಲಿಂಗ್ ಫ್ಯಾನ್'ಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದಾನೆಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. 

ಬಾಲಕ ನೇಣಿಗೆ ಶರಣಾಗುವ ವೇಳೆ ಆತನ ಸಹೋದರಿ ಕೂಡ ಮಹಡಿ ಮೇಲೆಯೇ ಇದ್ದು, ಕೂಡಲೇ ಕೂಗಾಡಿದ್ದಾಳೆ. ಈ ವೇಳೆ ಸ್ಥಳಕ್ಕೆ ಬಂದ ತಾಯಿ ಹಾಗೂ ಸ್ಥಳೀಯರು ಬಾಲಕನನ್ನು ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಬಾಲಕ ಸಾವನ್ನಪ್ಪಿದ್ದಾರೆಂದು ತಿಳಿದುಬಂದಿದೆ. ಘಟನೆ ಸಂಬಂಧ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.