ಪ್ರಾಣಿಗಳಿಗೂ ಹಬ್ಬಿದ ಸೋಂಕು: ಉತ್ತರ ಪ್ರದೇಶದ ಇಟಾವಾ ಸಫಾರಿ ಪಾರ್ಕ್ ನಲ್ಲಿ ಎರಡು ಸಿಂಹಗಳಿಗೆ ಕೊರೋನಾ!

ಇಟಾವಾ ಸಫಾರಿ ಪಾರ್ಕ್ (ಉತ್ತರ ಪ್ರದೇಶ): ಮನುಷ್ಯರ ನಂತರ ಇದೀಗ ಪ್ರಾಣಿಗಳಿಗೂ ಕೊರೋನಾ ಸೋಂಕು ತಗುಲುತ್ತಿದೆ. ಉತ್ತರ ಪ್ರದೇಶದ ಇಟಾವಾ ಸಫಾರಿ ಪಾರ್ಕ್ ನಲ್ಲಿರುವ ಎರಡು ಸಿಂಹಗಳಿಗೆ ಕೋವಿಡ್ ಪಾಸಿಟಿವ್ ಬಂದಿದ್ದು ಅವುಗಳನ್ನು ಪ್ರತ್ಯೇಕವಾಗಿ ಇರಿಸಲಾಗಿದೆ ಎಂದು ಪಾರ್ಕ್ ನ ನಿರ್ದೇಶಕರು ತಿಳಿಸಿದ್ದಾರೆ.

ಇದಕ್ಕೂ ಮುನ್ನ ಕೆಲ ದಿನಗಳ ಹಿಂದೆ ಹೈದರಾಬಾದ್ ನಲ್ಲಿ ಎಂಟು ಏಷ್ಯಾ ಸಿಂಹಗಳಿಗೆ ಸೋಂಕು ತಗುಲಿತ್ತು. ಇಟಾವಾ ಸಫಾರಿ ಪಾರ್ಕ್ ನ 14 ಏಷ್ಯಾಟಿಕ್ ಸಿಂಹಗಳ 16 ಮಾದರಿಗಳನ್ನು ಭಾರತೀಯ ಪಶುಸಂಗೋಪನಾ ಸಂಶೋಧನಾ ಸಂಸ್ಥೆಗೆ ಆರ್ ಟಿ-ಪಿಸಿಆರ್ ಪರೀಕ್ಷೆಗೆ ಕಳುಹಿಸಲಾಗಿದೆ.

ಮೊನ್ನೆ ಗುರುವಾರ ಒಂದು ಸಿಂಹಿಣಿಗೆ ಕೋವಿಡ್ ಸೋಂಕು ಪತ್ತೆಯಾಗಿತ್ತು. ಮತ್ತೊಂದಕ್ಕೆ ಸೋಂಕು ತಗುಲಿರುವ ಸಂಶಯವಿತ್ತು. ಉಳಿದ 12 ಸಿಂಹಗಳ ಕೊರೋನಾ ವರದಿ ನೆಗೆಟಿವ್ ಬಂದಿತ್ತು ಎಂದು ಐವಿಆರ್ ಐ ಜಂಟಿ ನಿರ್ದೇಶಕ ಡಾ ಕೆ ಪಿ ಸಿಂಗ್ ತಿಳಿಸಿದ್ದಾರೆ.

ನಿನ್ನೆ ದೆಹಲಿ ಮೃಗಾಲಯದ ಸಿಂಹದ ಮಾದರಿಯನ್ನು ಪರೀಕ್ಷೆಗೊಳಪಡಿಸಿದಾಗ ನೆಗೆಟಿವ್ ಬಂದಿತ್ತು. ಕೊರೋನಾ ಲಕ್ಷಣಗಳನ್ನು ಹೊಂದಿರದ ಆದರೆ ಸೋಂಕಿತರಾಗಿರುವ ಮೃಗಾಲಯದಲ್ಲಿ ಪಾಲನೆ, ಪೋಷಣೆ ಮಾಡುವವರಿಂದ ಸೋಂಕು ತಗುಲಿರಬಹುದು ಎಂದು ಡಾ ಸಿಂಗ್ ತಿಳಿಸಿದ್ದಾರೆ.