ಡ್ರಗ್ಸ್ ಪ್ರಕರಣ: ಜಾರಿ ನಿರ್ದೇಶನಾಲಯ ಎದುರು ನಟ ರಾಣಾ ದಗ್ಗುಬಾಟಿ ಹಾಜರು

ಹೈದರಾಬಾದ್: ಡ್ರಗ್ಸ್ ಪ್ರಕರಣದಲ್ಲಿ ತೆಲುಗು ನಟ ರಾಣಾ ದಗ್ಗುಬಾಟಿ ಜಾರಿ ನಿರ್ದೇಶನಾಲಯದ ಎದುರು ವಿಚಾರಣೆಗೆ ಹಾಜರಾಗಿದ್ದಾರೆ.

2017 ರಲ್ಲಿ ಹೈ-ಎಂಡ್ ಡ್ರಗ್ ಜಾಲವನ್ನು ಪತ್ತೆ ಮಾಡಿದ್ದ ಪ್ರಕರಣದಲ್ಲಿ ಅಕ್ರಮ ಹಣ ವರ್ಗಾವಣೆ ತನಿಖೆಗಾಗಿ ಹಾಜರಾಗಲು ರಾಣಾ ದಗ್ಗುಬಾಟಿಗೆ ಜಾರಿ ನಿರ್ದೇಶನಾಲಯ ಸಮನ್ಸ್ ಜಾರಿಗೊಳಿಸಿತ್ತು. ಬಾಹುಬಲಿ ಸಿನಿಮಾದ ನಟ ಇಡಿ ಸಮನ್ಸ್ ಪಡೆದ 10 ಟಾಲಿವುಡ್ (ತೆಲುಗು ಸಿನಿಮಾ ರಂಗ)ದ ನಟ- ನಿರ್ದೇಶಕರ ಪೈಕಿ ಒಬ್ಬರಾಗಿದ್ದಾರೆ.

ಈ ವರ್ಷದ ಆ.31 ರಿಂದ ನಿರ್ದೇಶಕ ಪುರಿ ಜಗನ್ನಾಥ್, ನಟಿ ಚಾರ್ಮಿ ಕೌರ್, ರಾಕುಲ್ ಪ್ರೀತ್ ಸಿಂಗ್, ನಟಿ ನಂದು ಕೇಂದ್ರೀಯ ಏಜೆನ್ಸಿಯ ಎದುರು ತನಿಖೆಗೆ ಹಾಜರಾಗಿದ್ದರು.

2017 ರ ಜುಲೈ ನಲ್ಲಿ ತೆಲಂಗಾಣದ ನಿಷೇಧ ಮತ್ತು ಅಬಕಾರಿ ಇಲಾಖೆ ಡ್ರಗ್ಸ್ ಜಾಲವನ್ನು ಪತ್ತೆ ಮಾಡಿ ಎಲ್ ಎಸ್ ಡಿ ಹಾಗೂ ಎಂಡಿಎಂಎ ಡ್ರಗ್ಸ್ ಪೆಡ್ಲಿಂಗ್ ನಲ್ಲಿದ್ದವರ ಪೈಕಿ 3 ಮಂದಿಯನ್ನು ಬಂಧಿಸಿತ್ತು. ಡ್ರಗ್ಸ್ ಸೇವನೆ- ಮಾರಾಟದಲ್ಲಿ ತೊಡಗಿದ್ದವರ ವಿರುದ್ಧ ಪ್ರಕರಣ ದಾಖಲಿಸಿ 20 ಮಂದಿಯನ್ನು ಬಂಧಿಸಿದ್ದರು.