ಆಗಸ್ಟಾ ವೆಸ್ಟ್ ಲ್ಯಾಂಡ್ ಗೆ ಸಂಬಂಧಿಸಿದ ಪ್ರಕರಣ: ಸಾಕ್ಷ್ಯ ಇಲ್ಲದ ಕಾರಣ ಮಾಜಿ ಬ್ರಿಗೆಡಿಯರ್ ವಿರುದ್ಧ ಕೇಸ್ ಕೈಬಿಟ್ಟ ಸಿಬಿಐ

ನವದೆಹಲಿ: ಆಗಸ್ಟಾ ವೆಸ್ಟ್ ಲ್ಯಾಂಡ್ ಹಗರಣಕ್ಕೆ ಸಂಬಂಧಿಸಿದ ಪ್ರಕರಣವೊಂಡರಲ್ಲಿ ಸಾಕ್ಷ್ಯ ಇಲ್ಲದ ಕಾರಣ ಸಿಬಿಐ ಮಾಜಿ ಬ್ರಿಗೆಡಿಯರ್ ವಿರುದ್ಧ ಇದ್ದ ಪ್ರಕರಣವನ್ನು ಕೈಬಿಟ್ಟಿದೆ.

ಚಾಪರ್ ಹಗರಣದಕ್ಕೆ ಸಂಬಂಧಿಸಿದಂತೆ ಎಫ್ಐಆರ್ ದಾಖಲಾದ 7 ವರ್ಷಗಳ ಬಳಿಕ ಸಿಬಿಐ ವಿಶೇಷ ನ್ಯಾಯಾಲಯಕ್ಕೆ ಪ್ರಕರಣ ಕೈಬಿಡುತ್ತಿರುವುದರ ಬಗ್ಗೆ ವರದಿ ನೀಡಿದ್ದು, 

"ಸಿಬಿಐ ಎಂದಿಗೂ ತನ್ನ ತನಿಖಾ ವಿಧಾನದಲ್ಲಿ ವೃತ್ತಿಪರತೆಯನ್ನು ಕಾಯ್ದುಕೊಂಡಿದೆ. ಎಂದಿಗೂ ಸಾಕ್ಷ್ಯ ಇಲ್ಲದೇ ಚಾರ್ಜ್ ಶೀಟ್ ಹಾಕುವುದಿಲ್ಲ" ಎಂದು ಪ್ರಕರಣವನ್ನು ಕೈಬಿಟ್ಟಿರುವ ಸಿಬಿಐ ಹೇಳಿದೆ.

ಬ್ರಿಗೆಡಿಯರ್ ವಿಎಸ್ ಸೈನಿ ವಿರುದ್ಧ ದಾಖಲಾಗಿದ್ದ ಪ್ರಕರಣ ಆಗಸ್ಟಾ ಕೇಸ್ ಗೆ ಸಂಬಂಧಪಟ್ಟಿದ್ದಾಗಿದ್ದು ಇಟಾಲಿಯಿಂದ ಲಭ್ಯವಾಗಿದ್ದ ದಾಖಲೆಗಳನ್ನು ಆಧರಿಸಿ ಸಿಬಿಐ 2014 ರಲ್ಲಿ ಹೊಸ ಪ್ರಕರಣ ದಾಖಲಿಸಿತ್ತು. ಹೊಸ ಕೇಸ್ ನ ಪ್ರಕಾರ ಬ್ರಿಗೆಡಿಯರ್ ವಿಎಸ್ ಸೈನಿ ಆಗಸ್ಟಾಗೆ ಸಹಾಯ ಮಾಡಲು 5 ಮಿಲಿಯನ್ ಯೂರೋಗಳ ಬೇಡಿಕೆ ಇಟ್ಟಿದ್ದರು ಎಂಬ ಆರೋಪವಿತ್ತು.

ಇದನ್ನೂ ಓದಿ: ಆಗಸ್ಟಾ ವೆಸ್ಟ್ ಲ್ಯಾಂಡ್ ಹಗರಣ: ಮಾಜಿ ರಕ್ಷಣಾ ಕಾರ್ಯದರ್ಶಿ ವಿರುದ್ಧ ಸಿಬಿಐ ಚಾರ್ಜ್ ಶೀಟ್

ಬ್ರಿಗೇಡಿಯರ್ ಸೈನಿ ಸರ್ಕಾರ ಖರೀದಿಸಬೇಕೆಂದಿದ್ದ  ಸರ್ವೇಕ್ಷಣೆ ಹಾಗೂ ವಿಚಕ್ಷಣ ಹೆಲಿಕಾಫ್ಟರ್ ಹಾರಾಟದ ಪ್ರಯೋಗವನ್ನು ತಪ್ಪಿಸಿದ್ದ ಆರೋಪ ಎದುರಿಸುತ್ತಿದ್ದರು.

ಸೈನಿ ಅವರಷ್ಟೇ ಅಲ್ಲದೇ ಎಫ್ಐಆರ್ ನಲ್ಲಿ ಇನ್ನಿತರ ಸೇನಾ ಅಧಿಕಾರಿಗಳು, ರಕ್ಷಣಾ ಸಚಿವಾಲಯದ ಅಧಿಕಾರಿಗಳು, ಖಾಸಗಿ ಸಂಸ್ಥೆಗಳ ಅಧಿಕಾರಿಗಳ ಹೆಸರೂ ಇತ್ತು.