ಇಸ್ರೋದ ಚಂದ್ರಯಾನ-3ಗೆ ಎಲ್ ಅಂಡ್ ಟಿ ಸಾಥ್; ಭಾರತದ ಅತಿದೊಡ್ಡ ನಿರ್ಮಾಣ ಸಂಸ್ಥೆ ಮಾಡಿದ್ದೇನು? ಅಂತಿಮ ಸಿದ್ಧತೆ ಹೇಗಿದೆ ಗೊತ್ತಾ?

ಬೆಂಗಳೂರು: ಭಾರತದ ಹೆಮ್ಮೆಯ ಬಾಹ್ಯಾಕಾಶ ಸಂಸ್ಥೆ ಇಸ್ರೋ ತನ್ನ ಮೂರನೇ ಚಂದ್ರಯಾನ ಯೋಜನೆ ಚಂದ್ರಯಾನ-3 ಸಕಲ ರೀತಿಯಲ್ಲೂ ಅಂತಿಮ ಸಿದ್ದತೆ ನಡೆಸಿದ್ದು, ಇಸ್ರೋದ ಈ ಮಹತ್ವಾಕಾಂಕ್ಷಿ ಯೋಜನೆಯಲ್ಲಿ ಭಾರತದ ಅತಿದೊಡ್ಡ ನಿರ್ಮಾಣ ಸಂಸ್ಥೆ ಎಲ್ ಅಂಡ್ ಟಿ ಕೂಡ ಕೈ ಜೋಡಿಸಿದೆ.

ಇದೇ ಶುಕ್ರವಾರ ಅಂದರೆ ಜುಲೈ 14ರಂದು ಇಸ್ರೋ ಚಂದ್ರಯಾನ-3 ಅನ್ನು ಉಡಾವಣೆ ಮಾಡಲಿದ್ದು, ಈ ಉಡಾವಣೆಗಾಗಿ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ ವಿಜ್ಞಾನಿಗಳು ಮತ್ತು ಸಿಬ್ಬಂದಿಗಳು ಮಾತ್ರವಲ್ಲದೇ ಮುಂಬೈನ ಪೊವಾಯಿ ಮತ್ತು ಕೊಯಮತ್ತೂರಿನಲ್ಲಿರುವ ಲಾರ್ಸೆನ್ ಮತ್ತು ಟೂಬ್ರೊ ಕಾರ್ಖಾನೆಗಳಲ್ಲಿ ಕೆಲಸಗಾರರೂ ಕೂಡ ತುದಿಗಾಲಲ್ಲಿ ನಿಂತು ಕಾಯುತ್ತಿದ್ದಾರೆ. ಅವರ ಈ ಕುತೂಹಲಕ್ಕೆ ಕಾರಣ ಅವರೂ ಕೂಡ ಇಸ್ರೋದ ಈ ಮಹತ್ವಾಕಾಂಕ್ಷಿ ಯೋಜನೆಯಲ್ಲಿ ತೊಡಗಿಸಿಕೊಂಡಿರುವುದು.

ಇದನ್ನೂ ಓದಿ: ಮಹತ್ವಾಕಾಂಕ್ಷಿಯ ಚಂದ್ರಯಾನ-3 ಉಡಾವಣೆಗೆ ಇಸ್ರೋ ಸಜ್ಜು: ಮಾಡೆಲ್ ಜೊತೆ ತಿರುಪತಿ ತಿಮ್ಮಪ್ಪನ ದರ್ಶನ ಪಡೆದ ವಿಜ್ಞಾನಿಗಳ ತಂಡ!

ಭಾರತದ ಅತಿದೊಡ್ಡ ನಿರ್ಮಾಣ ಕಂಪನಿ ಎಲ್ ಅಂಡ್ ಟಿ ಸಂಸ್ಥೆ ಚಂದ್ರಯಾನ-3 ರ ಪ್ರಮುಖ ಘಟಕಗಳನ್ನು ನಿರ್ಮಿಸಿದೆ. ಉಡಾವಣಾ ವಾಹನದ ನಿರ್ಣಾಯಕ ಬೂಸ್ಟರ್ ವಿಭಾಗಗಳು - ಹೆಡ್-ಎಂಡ್ ವಿಭಾಗ, ಮಧ್ಯದ ವಿಭಾಗ ಮತ್ತು ನಳಿಕೆ ಬಕೆಟ್ ಫ್ಲೇಂಜ್ ಗಳು ಪೊವೈನಲ್ಲಿರುವ L&T ಕಾರ್ಖಾನೆಗಳಲ್ಲಿ ತಯಾರಿಸಲ್ಪಟ್ಟವಾಗಿವೆ. ಅದೇ ರೀತಿ ತಮಿಳುನಾಡಿನ ಕೊಯಮತ್ತೂರಿನಲ್ಲಿರುವ L&T ಯ ಹೈಟೆಕ್ ಏರೋಸ್ಪೇಸ್ ಉತ್ಪಾದನಾ ಘಟಕವು ಚಂದ್ರಯಾನ-3ನ ನೆಲದ ಮತ್ತು ಹಾರಾಟದ ಹೊಕ್ಕುಳಿನ ಫಲಕ (ground and flight umbilical plates)ಗಳಂತಹ ಘಟಕಗಳನ್ನು ಒದಗಿಸಿದೆ.

ಸಾಮಾನ್ಯವಾಗಿ ಕಾರ್ಖಾನೆಗಳು, ರಸ್ತೆಗಳು ಮತ್ತು ಇತರ ನಾಗರಿಕ ಮೂಲಸೌಕರ್ಯಗಳ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿರುವ L&T, ಬಾಹ್ಯಾಕಾಶ ಉದ್ಯಮದಲ್ಲಿ ಹೆಚ್ಚಿನ ಅವಕಾಶಗಳನ್ನು ನಿರೀಕ್ಷಿಸುತ್ತಿದೆ. ಮೂರು ವರ್ಷಗಳ ಹಿಂದೆ ಭಾರತೀಯ ಬಾಹ್ಯಾಕಾಶ ಉದ್ಯಮವನ್ನು ಖಾಸಗಿ ವಲಯಕ್ಕೆ ಮುಕ್ತಗೊಳಿಸುವ ನಿರ್ಧಾರವನ್ನು ಪ್ರಧಾನಿ ಮೋದಿ ನೇತೃತ್ವದ ಎನ್ ಡಿಎ ಸರ್ಕಾರ ತೆಗೆದುಕೊಂಡಿತ್ತು.

ಈ ಬಗ್ಗೆ ಮಾತನಾಡಿರುವ ಎಲ್ & ಟಿ ರಕ್ಷಣಾ ವಿಭಾಗದ ಮುಖ್ಯಸ್ಥ ಎಟಿ ರಾಮಚಂದಾನಿ ಅವರು, "ಭವಿಷ್ಯದ ಬಾಹ್ಯಾಕಾಶ ಕಾರ್ಯಕ್ರಮಗಳಲ್ಲಿ ದೊಡ್ಡ ಪಾತ್ರವನ್ನು ವಹಿಸಲು ನಾವು ಇಸ್ರೋ ಜೊತೆಗಿನ ಈ ಸುದೀರ್ಘ ಸಂಬಂಧವನ್ನು ಬಳಸಿಕೊಳ್ಳುತ್ತೇವೆ" ಎಂದು ಹೇಳಿದರು.

ಇದನ್ನೂ ಓದಿ: ಜುಲೈ 14 ರಂದು ಮಧ್ಯಾಹ್ನ 2.35ಕ್ಕೆ ಭಾರತದ ಚಂದ್ರಯಾನ-3 ಉಡಾವಣೆ

ಚಂದ್ರಯಾನ-3 ಅಲ್ಲದೆ, ಚಂದ್ರಯಾನ-1 ಮತ್ತು 2, ಗಗನ್ಯಾನ್ ಮತ್ತು ಮಂಗಳಯಾನದಂತಹ ಇತರ ISRO ಮಿಷನ್‌ಗಳ ಉತ್ಪಾದನೆಯಲ್ಲಿ L&T ತೊಡಗಿಸಿಕೊಂಡಿದೆ. ಈ ಹಿಂದೆ ಇಸ್ರೋ ತನ್ನ ಉಡಾವಣಾ ವಾಹನಗಳನ್ನು ಜೋಡಿಸಲು ಸಹಾಯ ಮಾಡುವಲ್ಲಿ ಇದು ಪಾತ್ರವನ್ನು ವಹಿಸಿದೆ ಎಂದು ಎಲ್ & ಟಿ ಹೇಳಿದೆ.

ಉದಾಹರಣೆಗೆ, ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಲ್ಲಿ ಸ್ಥಾಪಿಸಲಾದ ನಿಖರ ಮೊನೊಪಲ್ಸ್ ಟ್ರ್ಯಾಕಿಂಗ್ ರಾಡಾರ್ (ಪಿಎಂಟಿಆರ್) ಎಂಬ ರಾಡಾರ್ ವ್ಯವಸ್ಥೆಯನ್ನು ಎಲ್ ಅಂಡ್ ಟಿ ಮಾಡಿದೆ ಮತ್ತು ಇಸ್ರೋ ಕಳುಹಿಸುವ ವಿವಿಧ ರಾಕೆಟ್‌ಗಳ ಟ್ರ್ಯಾಕಿಂಗ್‌ಗೆ ಬಳಸಲಾಗಿದೆ. ಎಲ್ & ಟಿ ಬೆಂಗಳೂರು ಸಮೀಪದ ಬೈಲಾಳು ಗ್ರಾಮದಲ್ಲಿ ಡೀಪ್ ಸ್ಪೇಸ್ ನೆಟ್‌ವರ್ಕಿಂಗ್ ಆಂಟೆನಾವನ್ನು ಸಹ ನಿರ್ಮಿಸಿದೆ. 

ಚಂದ್ರನ ಪರಿಸರ ವ್ಯವಸ್ಥೆಯ ಬಗ್ಗೆ ಭಾರತದ ತಿಳುವಳಿಕೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿರುವ ಚಂದ್ರಯಾನ-3 ಜುಲೈ 14 ರಂದು ಮಧ್ಯಾಹ್ನ 2:35 ಕ್ಕೆ ಶ್ರೀಹರಿಕೋಟಾದಿಂದ ಉಡಾವಣೆಯಾಗಲಿದೆ. ಈ ಕಾರ್ಯಾಚರಣೆಯು ಇಸ್ರೋದ LVM3 ಲಾಂಚರ್‌ ನೌಕೆಯಿಂದ ಚಾಲಿತವಾಗುತ್ತದೆ, ಇದು ಲ್ಯಾಂಡರ್ ಮತ್ತು ರೋವರ್ ಅನ್ನು ಒಯ್ಯುತ್ತದೆ ಮತ್ತು S-200 ಘನ ಪ್ರೊಪೆಲ್ಲಂಟ್‌ನಿಂದ ಚಾಲಿತವಾಗುತ್ತದೆ ಎಂದು ಇಸ್ರೋ ಮೂಲಗಳು ತಿಳಿಸಿವೆ.