ಮಂಡ್ಯ: ಹಳ್ಳಿಗೆ ಭೇಟಿ ನೀಡದ ಶಾಸಕನನ್ನು ಕಾರಿನಿಂದ ಇಳಿಸಿ ತರಾಟೆ ತೆಗೆದುಕೊಂಡ ಗ್ರಾಮಸ್ಥರು

ಮಂಡ್ಯ: ಶ್ರೀರಂಗಪಟ್ಟಣ ವಿಧಾನಸಭಾ ಕ್ಷೇತ್ರದ ಗ್ರಾಮಕ್ಕೆ ಚುನಾವಣೆ ನಡೆದ ನಂತರ ಒಮ್ಮೆಯೂ ಭೇಟಿ ನೀಡದ ಜೆಡಿಎಸ್ ಬಂಡಾಯ ಶಾಸಕ ರಮೇಶ್ ಬಾಬು ಬಂಡಿಸಿದ್ದೇಗೌಡ ಅವರನ್ನು ಗ್ರಾಮಸ್ಥರು ಕಾರಿನಿಂದ ಇಳಿಸಿ ತರಾಟೆ ತೆಗೆದುಕೊಂಡ ಘಟನೆ ನಡೆದಿದೆ.

ಶ್ರೀರಂಗ ಪಟ್ಟಣದ ಮೇಲಪುರ ಗ್ರಾಮಕ್ಕೆ ರಮೇಶ್ ಬಾಬು 2013ರ ವಿಧಾನಸಭೆ ಚುನಾವಣೆ ನಂತರ ಒಮ್ಮೆಯೂ ಭೇಟಿ ನೀಡಿಲ್ಲ, ರಮೇಶ್ ಬಾಬು ಕಾರು ಗ್ರಾಮದ ಮೂಲಕ ಸಂಚರಿಸುವ ವೇಳೆ ತಡೆಗಟ್ಟಿದ ಗ್ರಾಮಸ್ಥರು, ಅವರನ್ನು ಕಾರಿನಿಂದ ಇಳಿಸಿ ತರಾಟೆಗೆ ತೆಗೆದು ಕೊಂಡಿದ್ದಾರೆ. ಈ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ.

ಗ್ರಾಮಕ್ಕೆ ಸರಿಯಾದ ರಸ್ತೆಯಿಲ್ಲ, ಹೀಗಾಗಿ ವಾಹನಗಳು ಸಂಚರಿಸಲು ತೊಂದರೆಯಾಗುತ್ತಿದೆ, ಚರಂಡಿಗಳು ಸೇರಿದಂತೆ ಊರಿಗೆ ಯಾವುದೇ ಮೂಲಭೂತ ಸೌಕರ್ಯ ಒದಗಿಸಿಲ್ಲ,  ಹಿರಿಯ ನಾಗರಿಕರು ರಸ್ತೆಗಳಲ್ಲಿ ನಡೆಯಲು ಸಾಧ್ಯವಾಗುತ್ತಿಲ್ಲ, ಕಳೆದ 4 ವರ್ಷಗಳಲ್ಲಿ ಒಂದು ಭಾರಿಯೂ ಗ್ರಾಮಕ್ಕೆ ಭೇಟಿ ತಮ್ಮ ಕುಂದುಕೊರತೆಗಳನ್ನು ಆಲಿಸಿಲ್ಲ ಎಂದು ಕಿಡಿ ಕಾರಿದ್ದಾರೆ. ಈಗ ವಿಧಾನ ಸಭೆ ಚುನಾವಣೆ ಸಮೀಪವಾಗುತ್ತಿರುವ ಹಿನ್ನೆಲೆಯಲ್ಲಿ ಗ್ರಾಮಕ್ಕೆ ಆಗಮಿಸಿರುವುದಕ್ಕೆ ಆಕ್ರೋಶ ವ್ಯಕ್ತ ಪಡಿಸಿದ್ದಾರೆ.