ಬರ ಪರಿಹಾರ ನಿರ್ವಹಣೆಯಲ್ಲಿ ವೈಫಲ್ಯ: ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡ ಬಿಜೆಪಿ

ಬೆಳಗಾವಿ: ಬರ ಪರಿಹಾರಕ್ಕೆಂದು ನೀಡಲಾಗುತ್ತಿರುವ ರೂ.50 ಲಕ್ಷ ಯಾವುದಕ್ಕೂ ಸಾಲುತ್ತಿಲ್ಲ. ಕೂಡಲೇ ಮೊತ್ತ ಹೆಚ್ಚಿಸಬೇಕು. ಜೊತೆಗೆ ಬರ ನಿರ್ವಹಣೆಯಲ್ಲಿ ಸಚಿವರು ಹಾಗೂ ಅಧಿಕಾರಿಗಳು ಸಂಪೂರ್ಣ ವಿಫಲರಾಗಿದ್ದಾರೆಂದು ಪ್ರತಿಪಕ್ಷ ಬಿಜೆಪಿ, ರಾಜ್ಯ ಸರ್ಕಾರವನ್ನು ಗುರುವಾರ ತೀವ್ರ ತರಾಟೆಗೆ ತೆಗೆದುಕೊಂಡಿತ್ತು. 

ಬರ ಪರಿಸ್ಥಿತಿ ಕುರಿತು ಮಾತನಾಡಿದ ಬಿಜೆಪಿ ಸದಸ್ಯ ಪಿ.ರಾಜೀವ್, ಸರ್ಕಾರ ಸಾಲದ ಶೂಲದಲ್ಲಿ ಸಿಲುಕಿದೆ. ರೈತರು ಪ್ರಾಣಿಗಳು ಸೇರಿದಂತೆ ಜೀವಜಂತುಗಳು ಬರದಿಂದ ನಲುಗುತ್ತಿದ್ದು, ಪರಿಹಾರ ನೀಡಲು ಸರ್ಕಾರ ವಿಫಲವಾಗಿದೆ. ಬರದ ಕುರಿತು ಅಧ್ಯಯನ ನಡೆಸಲು ಜಿಲ್ಲಾಧಿಕಾರಿಗಳು, ನಿರ್ದೇಶಕರು, ಜಂಟಿ ನಿರ್ದೇಶಕರು, ತಹಶೀಲ್ದಾರರು, ಕೃಷಿ ವಿವಿಗಳ ವಿಜ್ಞಾನಿಗಳು ಹಳ್ಳಿಗಳಿಗೆ ಹೋಗಿ ಮಲಗಬೇಕು. 

ಅವರಿಗೆ ಅಧ್ಯಯನ ನಡೆಸಲು ಸರ್ಕಾರ ಸೂಚನೆ ಕೊಡಬೇಕು ಎಂದು ಆಗ್ರಹಿಸಿದರು. ರಾಯಭಾಗ ತಾಲೂಕಿನಲ್ಲಿ ಶೇ.98ರಷ್ಟು ಮಳೆಕೊರತೆಯಿಂದ ಬಿತ್ತನೆ ಶೇ.75ರಷ್ಟು ಆಗಿಲ್ಲ. ಆದರೆ, ಪರಿಹಾರ ಒದಗಿಸಬೇಕಾದ ಸರ್ಕಾರ ಸತ್ತ ಸರ್ಕಾರವಾಗಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.