ಚೆನ್ನೈ: ಭಾರತದ ಹಿರಿಯ ಟೆನಿಸ್ ಆಟಗಾರ ಮಹೇಶ್ ಭೂಪತಿ, ಚೆನ್ನೈ ಓಪನ್‌ನ ಪುರುಷರ ಡಬಲ್ಸ್ ವಿಭಾಗದಲ್ಲಿ ದ್ವಿತೀಯ ಸುತ್ತನ್ನು ಪ್ರವೇಶಿಸಿದ್ದಾರೆ. ಬುಧವಾರ ನಡೆದ ಪಂದ್ಯದಲ್ಲಿ, ಭಾರತದವರೇ ಆದ ಸಾಕೇತ್ ಮೈನೇನಿ ಜೊತೆ ಕಣಕ್ಕಿಳಿದಿದ್ದ ಮಹೇಶ್, ಭಾರತದ ಜೋಡಿಯಾದ ಚಂದ್ರಿಲ್ ಸೂದ್ ಹಾಗೂ ಲಕ್ಷಿತ್ ಸೂದ್ ಜೋಡಿ ವಿರುದ್ಧ 6-7 (4), 6-4, 10-6 ಸೆಟ್‌ಗಳಲ್ಲಿ ಜಯ ಸಾಧಿಸಿತು.
ಡಬಲ್ಸ್ ವಿಭಾಗದ ಮತ್ತೊಂದು ಪಂದ್ಯದಲ್ಲಿ ಭಾರತದ ಪುರವ್ ರಾಜಾ ಹಾಗೂ ಕೆನಡಾದ ಆದಿಲ್ ಶಮಸ್ದಿನ್ ಜೋಡಿ, ಸ್ಲೋವೇಕಿಯಾದ ಅಲ್ಜಾಜ್ ಬೆಡೇನ್ ಹಾಗೂ ಬೋಸ್ನಿಯಾದ ಡಾಮಿರ್ ಡಿಝುಮ್‌ಹುರ್ ಜೋಡಿ ವಿರುದ್ಧ 6-1, 6-2 ನೇರ ಸೆಟ್‌ಗಳಲ್ಲಿ ಜಯ ಸಾಧಿಸಿತು.
ವಾವ್ರಿಂಕಾಗೆ ಜಯ:
ಸ್ವಿಡ್ಜರ್ಲೆಂಡ್‌ನ ಸ್ಟಾನಿಸ್ಲಾಸ್ ವಾವ್ರಿಂಕಾ ಚೆನ್ನೈ ಓಪನ್ ಪುರಷರ ಸಿಂಗಲ್ಸ್ ವಿಭಾಗದಲ್ಲಿ 3ನೇ ಸುತ್ತು ಪ್ರವೇಶಿಸಿದ್ದಾರೆ. ಬುಧವಾರ ನಡೆದ ಮೊದಲ ಸುತ್ತಿನ ಪಂದ್ಯದಲ್ಲಿ ಕ್ರೊವೇಶಿಯಾದ ಬೊರ್ನಾಕೋರಿಕ್ ವಿರುದ್ಧ 6-1, 6-4 ಸೆಟ್‌ಗಳಲ್ಲಿ ಜಯ ಸಾಧಿಸಿ, ಮುನ್ನಡೆ ಪಡೆದರು.
ಇನ್ನುಳಿದಂತೆ, ಪುರುಷರ ಸಿಂಗಲ್ಸ್‌ನಲ್ಲಿ ಬುಧವಾರ ನಡೆದ ಇನ್ನಿತರ ಮೂರು ಪಂದ್ಯಗಳಲ್ಲಿ ಆಸ್ಟ್ರೀಯಾದ ಆ್ಯಂಡ್ರಿಯಾಸ್ ಹೈದರ್-ಮೌರರ್, ಬೆಲ್ಜಿಯಂನ ಡೇವಿಡ್ ಗಾಫಿನ್ ಹಾಗೂ ಲಕ್ಸೆಂಬರ್ಗ್‌ನ ಗಿಲ್ಸ್ ಮುಲ್ಲರ್ ಗೆಲುವು ಪಡೆದಿದ್ದಾರೆ.
ಚೆಕ್ ಗಣರಾಜ್ಯದ ಜಿರಿ ವ್ಯಾಸೆಲಿ ವಿರುದ್ಧ ಸೆಣಸಿದ ಆ್ಯಂಡ್ರಿಯಾಸ್ 6-7 (3-7), 6-4, 6-4 ಸೆಟ್‌ಗಳ ಜಯ ಸಾಧಿಸಿದರೆ, ರಿಕಾರ್ಡಸ್ ಬೆರಾಂಕಿಸ್ ವಿರುದ್ಧದ ಪಂದ್ಯದಲ್ಲಿ ಗಾಫಿನ್ 6-0, 4-6, 7-6 (7-1) ಗೆಲವು ಪಡೆದರು. ಇನ್ನು, ಸ್ವೀಡನ್‌ನ ಎಲಿಯಾಸ್ ಎಮರ್ ವಿರುದ್ಧ ಮುಲ್ಲರ್ 6-4, 6-3 ಸೆಟ್‌ಗಳ ಜಯ ಸಂಪಾದಿಸಿದರು.
