ಕಠ್ಮಂಡು: ನೇಪಾಳದಲ್ಲಿ ಸಂಭವಿಸಿದ ಮಹಾಭೂಕಂಪನಕ್ಕೆ ನೆಲಸಮವಾಗಿದ್ದ ಕಟ್ಟಡಗಳ ಅವಶೇಷಗಳಡಿಯಲ್ಲಿ ಸಿಲುಕಿ, 128 ಗಂಟೆಗಳ ಕಾಲ ಜೀವ ಹಿಡಿದುಕೊಂಡಿದ್ದ 24 ವರ್ಷದ ಯುವತಿಯನ್ನು ರಕ್ಷಿಸಲಾಗಿದೆ.
ನೇಪಾಳದ ರಕ್ಷಣಾ ಸಿಬ್ಬಂದಿ ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ ಅವಶೇಷಗಳಡಿಯಲ್ಲಿ ಸಿಲುಕಿದ್ದ ಕೃಷ್ಣ ದೇವಿ ಖಡ್ಕಾ ಎಂಬ ಯುವತಿಯನ್ನು ರಕ್ಷಿಸಲಾಗಿದೆ. ಈ ಮಹಿಳೆ ಗೆಸ್ಟ್ ಹೌಸ್ ನಲ್ಲಿದ್ದಾಗ ಭೂಕಂಪನವಾಗಿದ್ದು. ಗೆಸ್ಟ್ ಹೌಸ್ ಧ್ವಂಸವಾಗಿದೆ. ಇದರಡಿಯಲ್ಲಿ 128 ಗಂಟೆಗಳ ಕಾಲ ಸಿಲುಕಿದ್ದ ಮಹಿಳೆ ಅನ್ನ, ನೀರು ಬೆಳಕಿಲ್ಲದೇ ಜೀವಿಸಿದ್ದಾರೆ.
ಅವರನ್ನು ಹೊರತೆಗೆಯುವಲ್ಲಿ ರಕ್ಷಣಾ ಸಿಬ್ಬಂದಿಗಳು ಯಶಸ್ವಿಯಾಗಿದ್ದಾರೆ. ನೇಪಾಳದಲ್ಲಿ ಭೂಕಂಪನದಿಂದಾಗಿ ಮೃತಪಟ್ಟವರ ಸಾವಿನ ಸಂಖ್ಯೆ 6,166ಕ್ಕೆ ಏರಿದೆ. 10 ಸಾವಿರಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಅಲ್ಲದೇ, 12,064 ಮನೆಗಳು ಧ್ವಂಸಗೊಂಡಿವೆ.
117 ವಿದೇಶಿಗರನ್ನು ನೇರಾಳದಿಂದ ಕಳುಹಿಸಿಕೊಡಲಾಗಿದ್ದು, ರಕ್ಷಣಾ ಕಾರ್ಯಾಚರಣೆ ಮುಂದುವರೆಸಲಾಗಿದೆ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
