ನೆರೆಯಲ್ಲಿ ಅರಳಿದ ಮಾನವೀಯತೆ

ಚೆನ್ನೈ: ಇಡೀ ತಮಿಳುನಾಡನ್ನೇ ನಡುಗಿಸಿದ ಮಳೆ ಒಂದೆಡೆ ಅಪಾರ ಪ್ರಮಾಣದ ಹಾನಿ ಮಾಡಿದ್ದರೆ, ಮತ್ತೊಂದೆಡೆ ಅದ್ಭುತ ಮಾನವೀಯತೆಯ ಮುಖವನ್ನೂ ಅನಾವರಣಗೊಳಿಸಿತು.

ಚೆನ್ನೈ ನಗರವನ್ನೇ ಮುಳುಗಿಸಿದ ಮಳೆ ನೀರು ಬದುಕನ್ನೂ ಮುಳುಗಿಸುತ್ತಿದೆ ಎನ್ನುವಾಗ ಜನತೆ ಪರಸ್ಪರ ನೆರವಾಗುತ್ತಿದ್ದಾರೆ. ಆದರೆ, ಯಾರು ಕೂಡ ನೀನು ತಮಿಳನೋ, ಕನ್ನಡಿಗನೋ, ತೆಲುಗನೋ, ಬಿಹಾರಿಯೋ ಎಂದು ಪ್ರಶ್ನಿಸುತ್ತಿಲ್ಲ. 

ಹಿಂದೂ, ಮುಸ್ಲಿಂ, ಕ್ರೈಸ್ತ, ಜೈನ ಎಂಬ ಮಾತುಗಳು ಅಲ್ಲಿ ಉದ್ಭವಿಸಿಲ್ಲ. ಬಡವ ಸಿರಿವಂತ, ಮೇಲು ಕೀಳು ಎಂಬ ಭಾವನೆ ಅಲ್ಲಿ ಸುಳಿಯುತ್ತಿಲ್ಲ. ಅಲ್ಲಿದ್ದ ಎಲ್ಲರ ಮನಸ್ಸು ಹೇಳುತ್ತಿದ್ದುದು ಒಂದೇ ನಾವೆಲ್ಲರೂ ಮನುಷ್ಯರು ಎಂದು. 

ಹೌದು. ತಮಿಳುನಾಡು ಕಂಡ ಭೀಕರ ದುರಂತವು ಪರೋಕ್ಷವಾಗಿ ಪ್ರೀತಿ, ಸಹಬಾಳ್ವೆ, ಭ್ರಾತೃತ್ವ, ಹೃದಯ ವೈಶಾಲ್ಯತೆಯ ಮೌಲ್ಯವನ್ನು ಮುಂದಿಟ್ಟಿತು. ಸಂಕಷ್ಟದ ಸಮಯದಲ್ಲಿ ಜಾತಿ, ಮತ, ಭೇದವನ್ನು ಮರೆತು ಒಂದಾದ ಜನ, ಪರಸ್ಪರ ಸಹಾಯಹಸ್ತ ಚಾಚುವ ಮೂಲಕ, ಎಂತಹ ಭೀಕರ ಪ್ರಾಕೃತಿಕ ವಿಕೋಪವನ್ನೂ ಮೆಟ್ಟಿ ನಿಲ್ಲುವ ಶಕ್ತಿ ಮಾನವೀಯತೆಗೆ ಇದೆ ಎಂಬುದನ್ನು ತೋರಿಸಿಕೊಟ್ಟರು.