ರಷ್ಯಾ ಜತೆ ಬಾಂಧವ್ಯ ಮತ್ತಷ್ಟು ವೃದ್ಧಿ

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ 2 ದಿನಗಳ ರಷ್ಯಾ ಪ್ರವಾಸ ಬುಧವಾರ ಆರಂಭವಾಗಿದೆ. ಮಾಸ್ಕೋದಲ್ಲಿ 16ನೇ ಭಾರತ-ರಷ್ಯಾ ವಾರ್ಷಿಕ ಸಮ್ಮೇಳನದಲ್ಲಿ ಅವರು ಭಾಗವಹಿಸಲಿದ್ದಾರೆ. 

ಉಭಯ ರಾಷ್ಟ್ರಗಳ ನಡುವಿನ ಆರ್ಥಿಕ, ಇಂಧನ ಹಾಗೂ ರಕ್ಷಣಾ ವಲಯದ ದ್ವಿಪಕ್ಷೀಯ ಸಹಕಾರವನ್ನು ಈ ಭೇಟಿ ಇನ್ನಷ್ಟು ಗಟ್ಟಿಗೊಳಿಸಲಿದೆ ಎಂದು ನಿರೀಕ್ಷಿಸಲಾಗಿದೆ. ಅದರಲ್ಲೂ ರಕ್ಷಣೆ, ಅಣು ವಿದ್ಯುತ್, ವಿಜ್ಞಾನ-ತಂತ್ರಜ್ಞಾನ ಕ್ಷೇತ್ರಕ್ಕೆ ಸಂಬಂಧಪಟ್ಟಂತೆ ಮಹತ್ವದ ಮಾತುಕತೆಯ ನಿರೀಕ್ಷೆ ಇದೆ. 

ಇದನ್ನು ಬಹುನಿರೀಕ್ಷೆಯ ಮಾತುಕತೆಗಳ ಭೇಟಿ ಎಂದಿರುವ ಮೋದಿ, ಭಾರತದ ಅತ್ಯಂತ ವಿಶ್ವಾಸಾರ್ಹ, ಗೌರವಾನ್ವಿತ ಮಿತ್ರನಾದ ರಷ್ಯಾದೊಂದಿಗಿನ ಮಾತುಕತೆಗಳು ದ್ವಿಪಕ್ಷೀಯ ಬಾಂಧವ್ಯ ಹಾಗೂ ಸಹಕಾರಕ್ಕೆ ಹೊಸ ಭಾಷ್ಯ ಬರೆಯುವ ನಿರೀಕ್ಷೆ ಇದೆ ಎಂದಿದ್ದಾರೆ. ಜತೆಗೆ, ತಮ್ಮ ಹಾಗೂ ರಷ್ಯಾ ಅಧ್ಯಕ್ಷ ಪುಟಿನ್‍ರ ರಾಜಕೀಯ ಬೆಳವಣಿಗೆ ಒಂದೇ ಬಗೆಯದು ಎಂದೂ ಹೇಳಿದ್ದಾರೆ.