ಭಾರತೀಯ ನೌಕಾಪಡೆ ಅತಿಥಿ 'ಐರಿಸ್ ದೇನಾ' ಯುದ್ಧನೌಕೆಯನ್ನು ಅಮೆರಿಕ ಹೊಡೆದುರುಳಿಸಿದೆ: ಇರಾನ್

ಅಮೆರಿಕದ ಜಲಾಂತರ್ಗಾಮಿ ನೌಕೆಯೊಂದು ಇರಾನ್‌ನ ಯುದ್ಧನೌಕೆ ಐರಿಸ್ ದೇನಾವನ್ನು ಅಂತರರಾಷ್ಟ್ರೀಯ ನೀರಿನಲ್ಲಿ ಮುಳುಗಿಸಿದ್ದು, ಅಮೆರಿಕವು ಸಮುದ್ರದಲ್ಲಿ ಗಂಭೀರ ಮತ್ತು ಆಘಾತಕಾರಿ ಕೃತ್ಯ ಎಸಗಿದೆ ಎಂದು ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ ಆರೋಪಿಸಿದ್ದಾರೆ. ಅವರು ಈ ಘಟನೆಯನ್ನು 'ಸಮುದ್ರದಲ್ಲಿ ನಡೆದ ದೌರ್ಜನ್ಯ' ಎಂದು ಕರೆದಿದ್ದಾರೆ.

ಈ ಕುರಿತು X ನಲ್ಲಿ ಪೋಸ್ಟ್ ಮಾಡಿದ ಅರಘ್ಚಿ, ಇರಾನ್ ಯುದ್ಧನೌಕೆಯನ್ನು 'ಭಾರತೀಯ ನೌಕಾಪಡೆಯ ಅತಿಥಿ' ಎಂದು ಬಣ್ಣಿಸಿದರು ಮತ್ತು ಸುಮಾರು 130 ನಾವಿಕರನ್ನು ಹೊತ್ತೊಯ್ಯುತ್ತಿದ್ದ ನೌಕೆಯನ್ನು ಇರಾನ್ ತೀರದಿಂದ ಸುಮಾರು 2,000 ಮೈಲುಗಳು (3,219 ಕಿಮೀ) ದೂರದಲ್ಲಿ ಯಾವುದೇ ಎಚ್ಚರಿಕೆ ನೀಡದೆ ಹೊಡೆದುರುಳಿಸಲಾಗಿದೆ ಎಂದು ಹೇಳಿದರು.

ಇದರಿಂದ ಅಮೆರಿಕ ಗಂಭೀರ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದ ಅಬ್ಬಾಸ್ ಅರಘ್ಚಿ, ಇರಾನಿನ ಹಡಗಿನ ಮೇಲೆ ದಾಳಿ ಮಾಡುವ ಮೂಲಕ, ಅಮೆರಿಕವು ಅಪಾಯಕಾರಿ ಪೂರ್ವನಿದರ್ಶನವನ್ನು ಸೃಷ್ಟಿಸಿದೆ ಮತ್ತು ಈ ದಾಳಿಗೆ ಇರಾನ್ ತೀವ್ರವಾಗಿ ವಿಷಾದಿಸುತ್ತದೆ ಎಂದಿದ್ದಾರೆ. ಸದ್ಯ ನಡೆಯುತ್ತಿರುವ ಸಂಘರ್ಷದಿಂದಾಗಿ ಉದ್ವಿಗ್ನತೆಯ ಮಧ್ಯೆ ಈ ಹೇಳಿಕೆಗಳು ಬಂದಿವೆ.

ಅಮೆರಿಕದ ತೈಲ ಟ್ಯಾಂಕರ್ ಮೇಲೆ ದಾಳಿ

ಇರಾನ್ ಗುರುವಾರ ಕೊಲ್ಲಿಯಲ್ಲಿ ಅಮೆರಿಕದ ತೈಲ ಟ್ಯಾಂಕರ್ ಅನ್ನು ಕ್ಷಿಪಣಿಯಿಂದ ಹೊಡೆದಿದೆ ಎಂದು ಇರಾನ್ ಸರ್ಕಾರಿ ದೂರದರ್ಶನ ಎಂದು ವರದಿ ಮಾಡಿದೆ. ಇದು ಈ ಪ್ರದೇಶದ ಇಂಧನ ಉದ್ಯಮದ ಮೇಲೆ ಇರಾನ್ ನಡೆಸಿದ ಇತ್ತೀಚಿನ ದಾಳಿಯಾಗಿದೆ ಎಂದು ಎಎಫ್‌ಪಿ ವರದಿ ಮಾಡಿದೆ.

ಇರಾನ್‌ನ ರೆವಲ್ಯೂಷನರಿ ಗಾರ್ಡ್‌ಗಳ ಪ್ರಕಾರ, ಪರ್ಷಿಯನ್ ಕೊಲ್ಲಿಯ ಉತ್ತರ ಭಾಗದಲ್ಲಿ ಅಮೆರಿಕದ ತೈಲ ಟ್ಯಾಂಕರ್‌ಗೆ ಕ್ಷಿಪಣಿ ಡಿಕ್ಕಿ ಹೊಡೆದಿದ್ದು, ಈಗ ಬೆಂಕಿ ಹೊತ್ತಿಕೊಂಡಿದೆ ಎಂದು ಇರಾನಿನ ಸರ್ಕಾರಿ ದೂರದರ್ಶನ ವರದಿ ಮಾಡಿದೆ.

ಟ್ಯಾಂಕರ್ ಮೇಲೆ ವರದಿಯಾದ ಕ್ಷಿಪಣಿ ದಾಳಿಯನ್ನು ಸ್ವತಂತ್ರ ಮೂಲಗಳು ಪರಿಶೀಲಿಸಿಲ್ಲ. ಆದರೆ, ಕೊಲ್ಲಿಯನ್ನು ಹಿಂದೂ ಮಹಾಸಾಗರಕ್ಕೆ ಸಂಪರ್ಕಿಸುವ ಮತ್ತು ಪ್ರಮುಖ ತೈಲ ಮತ್ತು ಅನಿಲ ಸಾಗಣೆ ಮಾರ್ಗವಾಗಿರುವ ಹಾರ್ಮುಜ್ ಜಲಸಂಧಿಯ 'ಸಂಪೂರ್ಣ ನಿಯಂತ್ರಣ' ತಮ್ಮ ಬಳಿ ಇದೆ ಎಂದು ಗಾರ್ಡ್‌ಗಳು ಹೇಳಿದ್ದರಿಂದ ಈ ಹೇಳಿಕೆ ಮಹತ್ವ ಪಡೆದುಕೊಂಡಿದೆ.