ವಾಷಿಂಗ್ಟನ್: ಚೀನಾ ಸರ್ಕಾರದ ಭದ್ರತಾ ಸಚಿವಾಲಯದ (MSS) ಪರವಾಗಿ ಕಾರ್ಯನಿರ್ವಹಿಸುತ್ತಿರುವ ಶಂಕಿತ ಗೂಢಚಾರಿಕೆ ಎಂದು ಅಮೆರಿಕ ಸರ್ಕಾರ ಗುರುತಿಸಿದೆ ಎನ್ನಲಾದ ಮೆಗಾಸ್ಪೀಡ್ ಕಂಪನಿಯ ಕಾರ್ಯನಿರ್ವಾಹಕಿ ಆಲಿಸ್ ಹುವಾಂಗ್ ಅವರೊಂದಿಗಿನ ಎನ್‌ವಿಡಿಯಾ ಮುಖ್ಯಸ್ಥ ಜೆನ್ಸನ್ ಹುವಾಂಗ್ ಅವರ ಸಂಬಂಧ, 2023ರಿಂದ ಚೀನಾದ ಕಂಪನಿಗಳ ಮೂಲಕ ಕನಿಷ್ಠ 7.5 ಬಿಲಿಯನ್ ಡಾಲರ್ ಮೌಲ್ಯದ ಎನ್‌ವಿಡಿಯಾ ಚಿಪ್‌ಗಳ ಸಾಗಣೆಗೆ ನೆರವಾಗಿದೆ ಎಂದು ದಿ ಇನ್ಫರ್ಮೇಷನ್ ವರದಿ ಮಾಡಿದೆ.
ತನ್ನ ತನಿಖೆಯಲ್ಲಿ, ಚೀನಾದ ಗುಪ್ತಚರ ಸಂಸ್ಥೆಯ ಆಸ್ತಿಯಾಗಿ ಅಮೆರಿಕ ಸರ್ಕಾರ ಗುರುತಿಸಿದೆ ಎನ್ನಲಾದ ಆಲಿಸ್ ಹುವಾಂಗ್, ಅವರ ಸಹೋದರಿ ಮತ್ತು ಪತಿ ಚೀನಾ ಹಾಗೂ ಸಿಂಗಾಪುರದಲ್ಲಿ ಕಂಪನಿಗಳ ಸಂಕೀರ್ಣ ಜಾಲವನ್ನೇ ನಿರ್ಮಿಸಿ ಎನ್‌ವಿಡಿಯಾ ಚಿಪ್‌ಗಳನ್ನು ಖರೀದಿಸಿದ್ದಾರೆ ಎಂದು ಪತ್ರಿಕೆ ಪತ್ತೆಹಚ್ಚಿದೆ.
ಮೆಗಾಸ್ಪೀಡ್‌ನ ಕಾರ್ಯನಿರ್ವಾಹಕಿಯನ್ನು ಬಲ್ಲ ಮೂಲಗಳನ್ನು ಉಲ್ಲೇಖಿಸಿ ವರದಿ ಮಾಡಿರುವ ದಿ ಇನ್ಫರ್ಮೇಷನ್, ಈ ಕಾರ್ಪೊರೇಟ್ ಜಾಲದ ಕೇಂದ್ರಬಿಂದುವಾಗಿ ಚೀನಾ ಮೂಲದ ಶಾಂಘೈ ಸೆಂಚುರಿ ಲಿಟಾಂಗ್ ಕಂಪನಿ ಕಾರ್ಯನಿರ್ವಹಿಸಿದೆ ಎಂದು ತಿಳಿಸಿದೆ.
2023ರ ಜೂನ್‌ನಲ್ಲಿ ಸ್ಥಾಪನೆಯಾದ ಈ ಕಂಪನಿಯನ್ನು ಅದೇ ವರ್ಷದ ಅಕ್ಟೋಬರ್ ವೇಳೆಗೆ ಎನ್‌ವಿಡಿಯಾ ತನ್ನ ಆದ್ಯತೆಯ ಕ್ಲೌಡ್ ಪಾಲುದಾರರ ಪಟ್ಟಿಗೆ ಸೇರಿಸಿತ್ತು. ಈ ಸ್ಥಾನಮಾನದಿಂದ ಎನ್‌ವಿಡಿಯಾದ ಚಿಪ್‌ಗಳನ್ನು ಆದ್ಯತೆಯ ಮೇರೆಗೆ ಪಡೆಯುವ ಅವಕಾಶ ದೊರೆಯುತ್ತದೆ.
ಎರಡು ವರ್ಷಗಳಿಗೂ ಹೆಚ್ಚು ಅವಧಿಯಲ್ಲಿ ಹುವಾಂಗ್ (ಹುವಾಂಗ್ ಲೆ ಎಂದೂ ಪರಿಚಿತರು) ನಿಷೇಧಿತ 2.4 ಲಕ್ಷ ಚಿಪ್‌ಗಳನ್ನು ಚೀನಾಕ್ಕೆ ಸಾಗಿಸಲು ನೆರವಾಗಿದ್ದಾರೆ. ಇವುಗಳಲ್ಲಿ ಬಹುತೇಕ ಎಚ್100 ಮತ್ತು ಎಚ್200 ವ್ಯವಸ್ಥೆಗಳಾಗಿದ್ದು, 7.5 ಬಿಲಿಯನ್ ಡಾಲರ್ ಮೌಲ್ಯದ ಎಐ ಜಿಪಿಯುಗಳ ಆಮದು ವ್ಯವಸ್ಥೆ ಮಾಡುವಲ್ಲಿಯೂ ಅವರು ಪ್ರಮುಖ ಪಾತ್ರ ವಹಿಸಿದ್ದಾರೆ ಎಂದು ವರದಿಯಲ್ಲಿ ಹೇಳಲಾಗಿದೆ.
ವ್ಯಾಪಾರ ದತ್ತಾಂಶ ಪೂರೈಕೆದಾರ ಇಂಪೋರ್ಟ್‌ಜೀನಿಯಸ್‌ನ ಸಾಗಣೆ ದಾಖಲೆಗಳನ್ನು ಪರಿಶೀಲಿಸಿರುವ ಸುದ್ದಿ ಸಂಸ್ಥೆ ರಾಯಿಟರ್ಸ್ ಕೂಡ, ಮೆಗಾಸ್ಪೀಡ್‌ನ ಇಂಡೋನೇಷ್ಯಾ ಅಂಗಸಂಸ್ಥೆಯು 2024ರಿಂದ 2026ರ ನಡುವೆ ಎಚ್100 ಪ್ರೊಸೆಸರ್‌ಗಳು ಮತ್ತು ಸಂಬಂಧಿತ ಬಿಡಿಭಾಗಗಳು ಸೇರಿದಂತೆ ಎನ್‌ವಿಡಿಯಾ ಹಾರ್ಡ್‌ವೇರ್‌ಗಳನ್ನು ಆಮದು ಮಾಡಿಕೊಂಡಿರುವುದನ್ನು ಪತ್ತೆಹಚ್ಚಿದೆ. ಗಿಗಾಬೈಟ್‌ನ ಅಂಗಸಂಸ್ಥೆ ಗಿಗಾ ಕಂಪ್ಯೂಟಿಂಗ್ ಸೇರಿದಂತೆ ವಿವಿಧ ಪೂರೈಕೆದಾರರಿಂದ ಈ ಸರಕುಗಳನ್ನು ಆಮದು ಮಾಡಿಕೊಳ್ಳಲಾಗಿದೆ.
ಎಚ್100 ಎನ್‌ವಿಡಿಯಾದ ಅತ್ಯಾಧುನಿಕ ಪ್ರೊಸೆಸರ್‌ಗಳಲ್ಲಿ ಒಂದಾಗಿದ್ದು, ಚೀನಾಕ್ಕೆ ರಫ್ತು ಮಾಡುವುದರ ಮೇಲೆ ನಿರ್ಬಂಧ ವಿಧಿಸಲಾಗಿದೆ. ಆದರೆ, ಇಂಡೋನೇಷ್ಯಾಕ್ಕೆ ಈ ಸರಕುಗಳನ್ನು ಸಾಗಿಸಿರುವುದರಿಂದಲೇ ಅಮೆರಿಕದ ರಫ್ತು ನಿಯಂತ್ರಣ ನಿಯಮಗಳ ಉಲ್ಲಂಘನೆಯಾಗಿದೆ ಎಂದು ಹೇಳಲು ಸಾಧ್ಯವಿಲ್ಲ.
ವರದಿಯ ಪ್ರಕಾರ, ಎನ್‌ವಿಡಿಯಾ ಮುಖ್ಯಸ್ಥರೊಂದಿಗಿನ ವೈಯಕ್ತಿಕ ಸಂಬಂಧವು ಆಲಿಸ್ ಹುವಾಂಗ್ ಅವರಿಗೆ ಬೇರೆಡೆ ಸುಲಭವಾಗಿ ಸಿಗದ ಚಿಪ್‌ಗಳನ್ನು ಪಡೆಯುವ ಅವಕಾಶ ಕಲ್ಪಿಸಿತ್ತು.
ಆಲಿಸ್ ಹುವಾಂಗ್ ಅವರನ್ನು ಬಲ್ಲವರು ದಿ ಇನ್ಫರ್ಮೇಷನ್ ಜೊತೆ ಮಾತನಾಡಿ, ಎನ್‌ವಿಡಿಯಾ ಸಿಇಒ ಜೊತೆಗಿನ ತಮ್ಮ ನಿಕಟ ಸಂಪರ್ಕದ ಬಗ್ಗೆ ಅವರು ಬಹಿರಂಗವಾಗಿಯೇ ಹೆಮ್ಮೆಪಟ್ಟುಕೊಳ್ಳುತ್ತಿದ್ದರು ಎಂದು ತಿಳಿಸಿದ್ದಾರೆ. ತಮ್ಮ ವಿಶ್ವಾಸಾರ್ಹತೆಯನ್ನು ಸ್ಥಾಪಿಸಲು ಜೆನ್ಸನ್ ಹುವಾಂಗ್ ಅವರೊಂದಿಗಿನ ಛಾಯಾಚಿತ್ರಗಳನ್ನು ವೀಚಾಟ್ ಖಾತೆಯಲ್ಲಿ ನಿಯಮಿತವಾಗಿ ಹಂಚಿಕೊಳ್ಳುತ್ತಿದ್ದರು. ಜೆನ್ಸನ್ ಹುವಾಂಗ್ ತಮ್ಮ ಜನ್ಮದಿನದಂದು ಆಗಾಗ್ಗೆ ಊಟದ ಔತಣ ಏರ್ಪಡಿಸಿ ಉಡುಗೊರೆಗಳನ್ನು ನೀಡುತ್ತಿದ್ದರು ಎಂದೂ ಅವರು ಹೇಳಿಕೊಂಡಿದ್ದರು ಎನ್ನಲಾಗಿದೆ.
ಎನ್‌ವಿಡಿಯಾದ ಚೀನಾ ಮಾರಾಟ ವಿಭಾಗದ ಉದ್ಯೋಗಿಯೊಬ್ಬರು ಪತ್ರಿಕೆಗೆ ತಿಳಿಸಿರುವಂತೆ, ಸ್ಥಳೀಯ ಚೀನೀ ಪಾಲುದಾರರಿಗಾಗಿ ಕಂಪನಿ ಆಯೋಜಿಸುತ್ತಿದ್ದ ವಾರ್ಷಿಕ ಕಾರ್ಯಕ್ರಮಗಳಲ್ಲಿ ಆಲಿಸ್ ಹುವಾಂಗ್ ಪರಿಚಿತ ಮುಖವಾಗಿದ್ದರು. ಎಐ ಚಿಪ್‌ಗಳ ಸಾಗಣೆಯಲ್ಲಿ ವಿಳಂಬವಾದಾಗ ಅಥವಾ ಸಮಸ್ಯೆಗಳು ಎದುರಾದಾಗ, ಪೂರೈಕೆ ಸರಪಳಿಯ ಮೂಲಕ ಅವುಗಳ ಸಾಗಣೆಯನ್ನು ಮತ್ತೆ ಸುಗಮಗೊಳಿಸಲು ಅವರು ಮಧ್ಯಪ್ರವೇಶಿಸುತ್ತಿದ್ದರು ಎನ್ನಲಾಗಿದೆ.
ಎನ್‌ವಿಡಿಯಾ ಮತ್ತು ಅದರ ಪೂರೈಕೆದಾರರೊಂದಿಗಿನ ನಿಕಟ ಸಂಬಂಧವೇ ಕಂಪನಿಯ ಎಐ ಚಿಪ್‌ಗಳನ್ನು ತಮಗೆ ಯಾವಾಗಲೂ ದೊರೆಯುವಂತೆ ಮಾಡುತ್ತದೆ ಎಂದು ಮೆಗಾಸ್ಪೀಡ್ ಕಾರ್ಯನಿರ್ವಾಹಕಿ ಆಗಾಗ್ಗೆ ಹೇಳಿಕೊಳ್ಳುತ್ತಿದ್ದರು ಎಂದು ಮತ್ತೊಂದು ಮೂಲ ತಿಳಿಸಿದೆ.
ಅಂದಾಜಿನ ಪ್ರಕಾರ, 2023ರಿಂದ 2025ರ ಅವಧಿಯಲ್ಲಿ ಮೆಗಾಸ್ಪೀಡ್ ಮೂಲಕ ಸುಮಾರು 4.6 ಬಿಲಿಯನ್ ಡಾಲರ್ ಮೌಲ್ಯದ ಎಐ ಚಿಪ್‌ಗಳನ್ನು ಆಮದು ಮಾಡಿಕೊಳ್ಳಲಾಗಿದೆ. ಮತ್ತೊಂದು 2 ಬಿಲಿಯನ್ ಡಾಲರ್ ಮೌಲ್ಯದ ಚಿಪ್‌ಗಳನ್ನು ಸ್ಪೀಡ್‌ಮ್ಯಾಟ್ರಿಕ್ಸ್ ಮೂಲಕ ಸಾಗಿಸಲಾಗಿದೆ. ಶಾಂಘೈ ಸೆಂಚುರಿ ಲಿಟಾಂಗ್ ಸುಮಾರು 7.5 ಬಿಲಿಯನ್ ಡಾಲರ್ ಮೌಲ್ಯದ ಜಿಪಿಯುಗಳನ್ನು ಖರೀದಿಸಿದ್ದು, ಆಲಿಸ್ ಹುವಾಂಗ್ ಸುಮಾರು 2.4 ಲಕ್ಷ ನಿಷೇಧಿತ ಚಿಪ್‌ಗಳನ್ನು ಚೀನಾಕ್ಕೆ ಸಾಗಿಸಲು ನೆರವಾಗಿದ್ದಾರೆ ಎಂದೂ ವರದಿಯಾಗಿದೆ.
