ಬಿಎಸ್4 ಸ್ಟ್ಯಾಂಡರ್ಡ್ ಹೊಂದಿರುವ ಡೀಸೆಲ್ ಅಂಬಾಸಿಡರ್ ಮುಂದಿನ ತಿಂಗಳು ಮಾರುಕಟ್ಟೆಗೆ ಬರಲಿದ್ದು, 17 ಮಹಾನಗರಗಳಲ್ಲಿ ಮತ್ತೆ ನೆಲೆಯೂರಲು ಇದರಿಂದ ಸಾಧ್ಯವಾಗಲಿದೆ.
ಮಾಲಿನ್ಯ ನೀತಿಗಳ ಅನ್ವಯ ಬಿಎಸ್ 3 (ಭಾರತ್ ಸ್ಟೇಜ್ 3) ಮಾಲಿನ್ಯ ನಿಯಂತ್ರಣ ಹೊಂದಿರುವ ವಾಹನಗಳನ್ನು ದಿಲ್ಲಿ, ಕೋಲ್ಕತಾ, ಮುಂಬೈ, ಬೆಂಗಳೂರು ಸೇರಿದಂತೆ ಒಟ್ಟು 17 ನಗರಗಳಲ್ಲಿ ಮಾರಾಟ ಮತ್ತು ನೋಂದಣಿ ಮಾಡಿಸುವಂತಿಲ್ಲ. ಈ ನಗರಗಳಲ್ಲಿ ಮಾರಾಟ ಮಾಡುವ ಮತ್ತು ನೋಂದಣಿ ಮಾಡಿಸುವ ವಾಹನಗಳು ಬಿಎಸ್4 ಸ್ಟೇಜ್ ನಿಯಮಗಳಿಗೆ ಒಳಪಟ್ಟಿರಬೇಕು. ಈ ಕಾರಣದಿಂದಾಗಿಯೇ ಮಾರುತಿ 800, ಅಂಬಾಸಿಡರ್ ಮುಂತಾದ ಕಾರುಗಳು ಮಹಾನಗರಗಳಿಂದ ಮಾಯವಾಗಿದ್ದು.
ಆದರೆ ಈಗ ಅಂಬಾಸಿಡರ್ ಡೀಸೆಲ್ ಕಾರು ಬಿಎಸ್4 ಮಾನ್ಯತೆಯೊಂದಿಗೆ ರಸ್ತೆಗಿಳಿಯಲು ಸಿದ್ಧವಾಗಿದೆ. ಇದರಿಂದಾಗಿ ದೇಶದ 17 ನಗರಗಳಲ್ಲಿ ಅಂಬಾಸಿಡರ್ ಮತ್ತೆ ಕಾಣಿಸಿಕೊಳ್ಳಲಿದೆ. ವಿಶೇಷವಾಗಿ ಕೋಲ್ಕತಾದಲ್ಲಿ ಬಾಡಿಗೆ ಕಾರುಗಳಲ್ಲಿ ಸಿಂಹಪಾಲು ಅಂಬಾಸಿಡರ್‌ನದ್ದು. 2010 ಏಪ್ರಿಲ್‌ನಿಂದ ಅಲ್ಲಿ ಅಂಬಾಸಿಡರ್ ಕಾರು ಮಾರಾಟ ಸ್ಥಗಿತವಾಗಿತ್ತು.
ಮಾಲಿನ್ಯ ನಿಯಂತ್ರಣಗಳಲ್ಲದೇ ಇತರೆ ರೀತಿಯಲ್ಲೂ ಹೊಸ ಅಂಬಾಸಿಡರ್ ಕಾರು ಹಿಂದಿನ ಕಾರುಗಳಿಗಿಂತ ಉತ್ತಮವಾಗರಲಿದೆ ಎಂದು ಕಂಪನಿ ಹೇಳಿದೆ. ಆದರೆ ಹೊಸ ಕಾರಿನಲ್ಲಿ ಇನ್ನೂ ಯಾವ ಯಾವ ಬದಲಾವಣೆಗಳನ್ನು ಮಾಡಲಾಗಿದೆ ಎಂಬುದು ಇನ್ನೂ ಬಹಿರಂಗಗೊಂಡಿಲ್ಲ.