ಪುಣೆ: ಜರ್ಮನಿಯ ಅಟೋಮೊಬೈಲ್ ಉತ್ಪಾದಕ ಮರ್ಸಿಡೀಸ್ ಬೆನ್ಜ್ ಕಂಪನಿ ಭಾರತದ ಘಟಕಕ್ಕೆ ನೂತನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮುಖ್ಯ ಕಾರ್ಯನಿರ್ವಾಹಕರನ್ನು ನೇಮಿಸಿದೆ. ರೊನಾಲ್ಡ್ ಎಸ್. ಫೋಲ್ಜರ್ ಅಕ್ಟೋಬರ್.1 ರಿಂದ ಮರ್ಸಿಡೀಸ್ ಬೆನ್ಜ್ ನ ಭಾರತದ ಶಾಖೆಯ ವ್ಯವಸ್ಥಾಪಕ ನಿರ್ದೇಶಕರಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.
ರೊನಾಲ್ಡ್ ಎಸ್. ಫೋಲ್ಜರ್, ಮರ್ಸಿಡಿಸ್ ಬೆನ್ಜ್ ನ ಮಲೇಷಿಯಾ ಶಾಖೆಯ ಹಾಲಿ ಅಧ್ಯಕ್ಷ ಹಾಗೂ ಮುಖ್ಯ ಕಾರ್ಯನಿರ್ವಾಹಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.ಭಾರತದ ಹಾಲಿ ಎಂಡಿ ಎಬರ್ಹಾರ್ಡ್ ಕೆರ್ನ್ ಅವರಿಗೆ ಯುರೋಪ್ ನ ಮಾರುಕಟ್ಟೆಯ ವ್ಯವಸ್ಥಾಪಕರನ್ನಾಗಿ ನೇಮಿಸಲಾಗಿದೆ.
2012 ರಿಂದ 2015 ರಲ್ಲಿ ಕಾರುಗಳ ಮಾರಾಟ ದ್ವಿಗುಣವಾಗಿದ್ದು ಭಾರತದಲ್ಲಿ ಮರ್ಸಿಡೀಸ್ ಬೆನ್ಜ್ ನ ಅಪಾರ ಅಭಿವೃದ್ಧಿ ಸಮಾಧಾನಕರವಾಗಿದೆ ಎಂದು ಭಾರತದ ಎಂಡಿಯಾಗಿ ಸದ್ಯದಲ್ಲೇ ನಿರ್ಗಮಿಸಲಿರುವ ಕೆರ್ನ್ ಹೇಳಿದ್ದಾರೆ.
ಕೆರ್ನ್ ಅಧಿಕಾರಾವಧಿಯ ಮೂರು ವರ್ಷಗಳಲ್ಲಿ ಉತ್ಪಾದನಾ ಸಾಮರ್ಥ್ಯ, ಸ್ಥಳೀಯ ನೆಟ್ವರ್ಕ್, ಹಾಗೂ ಉತ್ಪನ್ನಗಳ ಮಾರಾಟ ಹೆಚ್ಚಾಗಿವೆ ಎಂದು ಮರ್ಸಿಡೀಸ್ ಬೆನ್ಜ್ ತಿಳಿಸಿದೆ. 2014 ರಲ್ಲಿ ಕಂಪನಿಯ ಕಾರುಗಳ ಮಾರಾಟ 5 ಅಂಕಿಗಳನ್ನು ದಾಟಿ ಇತಿಹಾಸ ನಿರ್ಮಿಸಿತ್ತು.