ನವದೆಹಲಿ: ಭಾರತದ ಒಟ್ಟು ದೇಶೀಯ ಉತ್ಪನ್ನ(ಜಿಡಿಪಿ) ಕಳೆದ ಮೂರು ವರ್ಷಗಳಲ್ಲಿಯೇ ಈ ವರ್ಷ ಅತ್ಯಂತ ಕಡಿಮೆ ಶೇಕಡಾ 7ಕ್ಕೆ ಇಳಿಕೆಯಾಗುವ ಸಾಧ್ಯತೆಯಿದೆ ಎಂದು ಡಿಬಿಎಸ್ ವರದಿ ಮಾಡಿದೆ.

ಜಾಗತಿಕ ಹಣಕಾಸು ಸೇವಾ ಸಂಸ್ಥೆಯಾದ ಡಿಬಿಎಸ್ ಪ್ರಕಾರ, ಕಳೆದ ವರ್ಷ ನವೆಂಬರ್ ತಿಂಗಳಲ್ಲಿ ಜಾರಿಗೆ ಬಂದ ನೋಟು ಅನಾಣ್ಯೀಕರಣ ಮತ್ತು ಈ ವರ್ಷ ಜುಲೈ ತಿಂಗಳಲ್ಲಿ ಜಾರಿಗೆ ಬಂದ ಸರಕು ಮತ್ತು ಸೇವಾ ತೆರಿಗೆ ದೇಶದ ಆರ್ಥಿಕ ಚಟುವಟಿಕೆ ಮೇಲೆ ಅಲ್ಪಾವಧಿಯ ಪರಿಣಾಮವನ್ನುಂಟುಮಾಡಿದ್ದು ಮಂದಗತಿಯ ಆರ್ಥಿಕ ಬೆಳವಣಿಗೆಗೆ ಮತ್ತಷ್ಟು ಕಾರಣವಾಗಿದೆ ಎಂದು ಹೇಳಿದೆ.

ಉತ್ಪಾದನೆ ಮತ್ತು ಹೂಡಿಕೆ ವಲಯದಲ್ಲಿ ಕ್ಷೀಣ ಬೆಳವಣಿಗೆಗೆಯಿಂದಾಗಿ ಕಳೆದ ಆರ್ಥಿಕ ವರ್ಷದ ಮೊದಲಾರ್ಧದಲ್ಲಿ ಜಿಡಿಪಿ ಶೇಕಡಾ 5.9ರಷ್ಟಾಗಿತ್ತು ಎಂದು ಡಿಬಿಎಸ್ ಹೇಳಿದೆ.

2017-18ನೇ ಆರ್ಥಿಕ ವರ್ಷದಲ್ಲಿ ಜೂನ್ ಮೊದಲಾರ್ಧದಲ್ಲಿ ಆರ್ಥಿಕತೆ ಕುಂಠಿತವಾಗಿ ಪ್ರಗತಿ ಕಂಡಿತ್ತು. ಜುಲೈಯಿಂದ ಸೆಪ್ಟೆಂಬರ್ ತಿಂಗಳಲ್ಲಿ ಮಾತ್ರ ಸ್ವಲ್ಪ ಮಟ್ಟಿಗೆ ಬೆಳವಣಿಗೆಯಾಗಿತ್ತು. ಈ ವರ್ಷ ಜಿಡಿಪಿ ಶೇಕಡಾ 6.8ರಷ್ಟು ಸರಾಸರಿ ಬೆಳವಣಿಗೆಯಾಗುತ್ತದೆ ಎಂದು ನಿರೀಕ್ಷಿಸಲಾಗಿದೆ ಎಂದು ಡಿಬಿಎಸ್ ಸಂಶೋಧನೆಯ ವರದಿ ತಿಳಿಸಿದೆ.