2026ರ ಕೇಂದ್ರ ಬಜೆಟ್ಗೆ ಹಣಕಾಸು ಸಚಿವಾಲಯ ಸಜ್ಜಾಗುತ್ತಿದ್ದು, ಸಿಐಐ, ಅಸ್ಸೋಚಮ್, ಪಿಹೆಚ್ ಡಿಸಿಸಿಐ, ಎಫ್ ಐಸಿಸಿಐನಂತಹ(CII, ASSOCHAM, PHDCCI, FICCI) ಕೈಗಾರಿಕಾ ಮಂಡಳಿಗಳು ವ್ಯವಹಾರ ಸ್ನೇಹಿ ನೇರ ತೆರಿಗೆ ಪದ್ಧತಿಯನ್ನು ರೂಪಿಸಲು ಕರೆ ನೀಡಿವೆ. ಇದು ತ್ವರಿತ ವಿವಾದ ಪರಿಹಾರ ಮತ್ತು ಉದ್ಯೋಗ ಹೆಚ್ಚಳದತ್ತ ಹೆಚ್ಚಿನ ಗಮನ ಹರಿಸುತ್ತದೆ.
ಕಂದಾಯ ಇಲಾಖೆಗೆ ಮಂಡಳಿಗಳು ನೀಡಿರುವ ಕೆಲವು ಸಾಮಾನ್ಯ ಸಲಹೆಗಳಲ್ಲಿ ಸಣ್ಣ ಸಂಸ್ಥೆಗಳಿಗೆ ತೆರಿಗೆ ದರಗಳನ್ನು ಕಡಿಮೆ ಮಾಡುವುದು, ಉತ್ಪಾದನೆ ಮತ್ತು ಸಂಶೋಧನೆಗೆ ಪ್ರೋತ್ಸಾಹಕಗಳನ್ನು ಪುನರುಜ್ಜೀವನಗೊಳಿಸುವುದು ಮತ್ತು ತೆರಿಗೆ ಆಡಳಿತದಲ್ಲಿನ ವಿಳಂಬವನ್ನು ಕಡಿತಗೊಳಿಸುವುದು ಸೇರಿವೆ.
ಹೊಸ ಉತ್ಪಾದನಾ ಕಂಪನಿಗಳಿಗೆ ಸೆಕ್ಷನ್ 115 ಬಿಎಬಿ ಅಡಿಯಲ್ಲಿ ಈ ಹಿಂದೆ ಲಭ್ಯವಿದ್ದ ಶೇಕಡಾ 15ರಷ್ಟು ಕಾರ್ಪೊರೇಟ್ ತೆರಿಗೆ ದರವನ್ನು ಪುನಃಸ್ಥಾಪಿಸಲು ಕೈಗಾರಿಕಾ ಸಂಸ್ಥೆಗಳು ಸರ್ಕಾರವನ್ನು ಒತ್ತಾಯಿಸಿವೆ. ರಿಯಾಯಿತಿ ದರವು ದೇಶೀಯ ಮತ್ತು ವಿದೇಶಿ ಹೂಡಿಕೆದಾರರನ್ನು ಆಕರ್ಷಿಸುತ್ತದೆ. ಉದ್ಯೋಗ ಸೃಷ್ಟಿಯನ್ನು ಹೆಚ್ಚಿಸುತ್ತದೆ ಮತ್ತು ಜಾಗತಿಕ ಉತ್ಪಾದನಾ ಕೇಂದ್ರವಾಗಿ ಭಾರತ ತನ್ನ ಸ್ಥಾನವನ್ನು ಬಲಪಡಿಸಲು ಸಹಾಯ ಮಾಡುತ್ತದೆ ಎಂದು ಅದು ಹೇಳಿದೆ.
ಭಾರತವು ಹೊಸ ಬಂಡವಾಳ ಹೂಡಿಕೆ ಮಾಡಲು ಆಕರ್ಷಕವಾಗಿ ಉಳಿಯಲು ಅನುವು ಮಾಡಿಕೊಡುತ್ತದೆ, ದೇಶೀಯ ಆರ್ಥಿಕತೆಗೆ ಉತ್ತೇಜನ ನೀಡುತ್ತದೆ ಮತ್ತು ರಫ್ತುಗಳನ್ನು ಪ್ರೋತ್ಸಾಹಿಸುತ್ತದೆ ಎಂದು ASSOCHAM ಸೂಚಿಸಿದೆ.
ಕಾರ್ಪೊರೇಟ್ಗಳನ್ನು ಮೀರಿ ಎಲ್ಲಾ ರೀತಿಯ ವ್ಯವಹಾರ ಪುನಾರಚನೆಗಳಿಗೆ, ಪರಿವರ್ತನೆಗಳು ಮತ್ತು ವಿಲೀನಗಳಿಗೆ - ತೆರಿಗೆ ತಟಸ್ಥತೆಯನ್ನು ವಿಸ್ತರಿಸಲು ಕೈಗಾರಿಕಾ ಸಂಸ್ಥೆಗಳು ಪ್ರಸ್ತಾಪಿಸಿವೆ. ಮಾಲೀಕತ್ವದ ನಿರಂತರತೆ ಮತ್ತು ಇತರ ಮೂಲಭೂತ ಷರತ್ತುಗಳನ್ನು ಪೂರೈಸಿದರೆ ವಿಲೀನಗಳಲ್ಲಿ ಭಾಗಿಯಾಗಿರುವ ವಿದೇಶಿ ಸಂಸ್ಥೆಗಳ ಭಾರತೀಯ ಷೇರುದಾರರಿಗೂ ಇದೇ ರೀತಿಯ ಪರಿಹಾರ ಅನ್ವಯಿಸಬೇಕು.
ಭಾರತದಲ್ಲಿ ಹೊಸ ಉತ್ಪಾದನಾ ಘಟಕಗಳ ಸ್ಥಾಪನೆಯನ್ನು ಉತ್ತೇಜಿಸಲು, ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 115ಬಿಎಬಿಯನ್ನು ಪುನಃ ಪರಿಚಯಿಸಲು ಚೇಂಬರ್ಗಳು ಸೂಚಿಸಿವೆ, ಇದರಲ್ಲಿ ಕೆಲವು ಷರತ್ತುಗಳನ್ನು ಅನುಸರಿಸುವ ಹೊಸ ಉತ್ಪಾದನಾ ಘಟಕಗಳಿಗೆ 15 ಶೇಕಡಾದಷ್ಟು ರಿಯಾಯಿತಿ ಕಾರ್ಪೊರೇಟ್ ತೆರಿಗೆ ಮತ್ತು ಹೆಚ್ಚುವರಿ ಶುಲ್ಕವನ್ನು ಪರಿಚಯಿಸಲಾಗಿದೆ. ಮತ್ತು ನಾವೀನ್ಯತೆಯನ್ನು ಉತ್ತೇಜಿಸಲು, ಭಾರತೀಯ ಸಂಸ್ಥೆಗಳನ್ನು ಜಾಗತಿಕವಾಗಿ ಸ್ಪರ್ಧಾತ್ಮಕವಾಗಿಸಲು ಸೆಕ್ಷನ್ 35 ರ ಅಡಿಯಲ್ಲಿ ಸಂಶೋಧನೆ ಮತ್ತು ಅಭಿವೃದ್ಧಿ ವೆಚ್ಚದ ಮೇಲೆ 150% ತೂಕದ ಕಡಿತವನ್ನು ಶಾಶ್ವತವಾಗಿ ಮರುಸ್ಥಾಪಿಸಲು ಚೇಂಬರ್ಗಳು ಕೋರಿವೆ.
ಉದ್ಯೋಗವನ್ನು ಉತ್ತೇಜಿಸಲು, ನೇಮಕಾತಿ ಆಧಾರಿತ ಕಡಿತದ ಅಡಿಯಲ್ಲಿ ಅರ್ಹರಾಗಿರುವ ಹೊಸ ಉದ್ಯೋಗಿಗಳಿಗೆ ವೇತನ ಮಿತಿಯನ್ನು ತಿಂಗಳಿಗೆ 25,000 ದಿಂದ 50,000 ಕ್ಕೆ ಹೆಚ್ಚಿಸಲು ಚೇಂಬರ್ಗಳು ಪ್ರಸ್ತಾಪಿಸಿವೆ. ಒಪ್ಪಂದದ ಸಿಬ್ಬಂದಿಯನ್ನು ನಿಬಂಧನೆಯ ಅಡಿಯಲ್ಲಿ ಒಳಗೊಳ್ಳುವಂತೆ ಮತ್ತು ಕಡಿತದ ಅವಧಿಯನ್ನು ಮೂರರಿಂದ ಎರಡು ವರ್ಷಗಳಿಗೆ ಇಳಿಸಲು ಬಯಸಿದ್ದಾರೆ.