ಮುಂಬೈ: ಕಳೆದ ಕೆಲ ತಿಂಗಳುಗಳಿಂದ ಭಾರಿ ಏರಿಳಿತ ಕಂಡಿದ್ದ ಭಾರತೀಯ ಷೇರುಮಾರುಕಟ್ಟೆ ಮಂಗಳವಾರ ಅತ್ಯಲ್ಪ ಕುಸಿತಕಂಡಿದ್ದು, ಸೆನ್ಸೆಕ್ಸ್ ಮತ್ತು ನಿಫ್ಟಿ ಎರಡೂ ರೆಡ್ ನಲ್ಲಿ ವಹಿವಾಟು ಅಂತ್ಯಗೊಳಿಸಿವೆ.

ಇಂದಿನ ವಹಿವಾಟಿನಲ್ಲಿ ಸೆನ್ಸೆಕ್ಸ್ ಶೇ.0.011ರಷ್ಟು ಇಳಿಕೆ ಕಂಡಿದ್ದರೆ, ನಿಫ್ಟಿ ಕೂಡ ಶೇ.0.015ರಷ್ಟು ಕುಸಿತ ದಾಖಲಿಸಿದೆ. ಸೆನ್ಸೆಕ್ಸ್ ಇಂದು 8.08ಅಂಕಗಳ ಕುಸಿತದೊಂದಿಗೆ 73,598.67 ಅಂಕಗಳಿಗೆ ಇಳಿಕೆಯಾಗಿದ್ದರೆ, ನಿಫ್ಟಿ 3.45 ಅಂಕಗಳ ಇಳಿಕೆಯೊಂದಿಗೆ 22,749.75 ಅಂಕಗಳಿಗೆ ಇಳಿಕೆಯಾಗಿ ದಿನದ ವಹಿವಾಟು ಅಂತ್ಯಗೊಳಿಸಿದೆ.

ಇಂದಿನ ವಹಿವಾಟಿನಲ್ಲಿ ಐಟಿ ವಲಯದ ಷೇರುಗಳ ಮೌಲ್ಯದಲ್ಲಿ ಕುಸಿತವಾಗಿದ್ದರೆ, ಫಾರ್ಮಾ, ರಿಯಾಲಿಟಿ ಕ್ಷೇತ್ರದ ಷೇರುಗಳು ಏರಿಕೆ ದಾಖಲಿಸಿದವು. ಜಾಗತಿಕ ಅನಿಶ್ಚಿತತೆ, ಕಚ್ಚಾ ತೈಲ ಬೆಲೆ ಏರಿಕೆ ಹಾಗೂ ಹೂಡಿಕೆದಾರರ ಎಚ್ಚರಿಕೆಯ ನಡೆ ಮಾರುಕಟ್ಟೆಯ ಮೇಲೆ ಪರಿಣಾಮ ಬೀರಿದವು.

ಫಾರ್ಮಾ, ರಿಯಾಲ್ಟಿ ಷೇರುಗಳಿಗೆ ಬೇಡಿಕೆ

ಪ್ರಮುಖ ಸೂಚ್ಯಂಕಗಳು ಅಲ್ಪ ಕುಸಿತ ಕಂಡರೂ ವಿಶಾಲ ಮಾರುಕಟ್ಟೆಯಲ್ಲಿ ಖರೀದಿ ಆಸಕ್ತಿ ಕಂಡುಬಂತು. ನಿಫ್ಟಿ ಸ್ಮಾಲ್‌ಕ್ಯಾಪ್‌ 100 ಸೂಚ್ಯಂಕ ಶೇ.2ಕ್ಕಿಂತ ಹೆಚ್ಚು ಏರಿಕೆ ಕಂಡರೆ, ನಿಫ್ಟಿ ಮಿಡ್‌ಕ್ಯಾಪ್‌ 100 ಸೂಚ್ಯಂಕ ಶೇ.1ಕ್ಕಿಂತ ಹೆಚ್ಚು ಲಾಭ ಗಳಿಸಿತು.

ವಲಯವಾರು ವಹಿವಾಟಿನಲ್ಲಿ ಫಾರ್ಮಾ, ರಿಯಲ್‌ ಎಸ್ಟೇಟ್‌, ಆಟೊಮೊಬೈಲ್‌, ಲೋಹ ಮತ್ತು ಮಾಧ್ಯಮ ವಲಯದ ಷೇರುಗಳು ಏರಿಕೆ ಕಂಡವು. ನಿಫ್ಟಿ ಫಾರ್ಮಾ ಸೂಚ್ಯಂಕ ಶೇ.1.9ರಷ್ಟು ಹಾಗೂ ಆಟೊ ಸೂಚ್ಯಂಕ ಶೇ.1.5ರಷ್ಟು ಏರಿಕೆ ದಾಖಲಿಸಿದವು. ಇದಕ್ಕೆ ವಿರುದ್ಧವಾಗಿ ಐಟಿ ಮತ್ತು ಖಾಸಗಿ ಬ್ಯಾಂಕಿಂಗ್‌ ಷೇರುಗಳಲ್ಲಿ ಮಾರಾಟದ ಒತ್ತಡ ಕಂಡುಬಂತು. ಐಟಿ ಸೂಚ್ಯಂಕ ಶೇ.0.3ರಷ್ಟು ಹಾಗೂ ಹಣಕಾಸು ವಲಯದ ಸೂಚ್ಯಂಕ ಶೇ.0.6ರಷ್ಟು ಕುಸಿದವು.

ಭಾರ್ತಿ ಏರ್‌ಟೆಲ್‌ ಷೇರುಗಳಿಗೆ ಲಾಭ

ಸೆನ್ಸೆಕ್ಸ್‌ನ ಪ್ರಮುಖ ಲಾಭ ಗಳಿಸಿದ ಷೇರುಗಳಲ್ಲಿ ಭಾರ್ತಿ ಏರ್‌ಟೆಲ್‌ ಮೊದಲ ಸ್ಥಾನದಲ್ಲಿತ್ತು. ಕಂಪನಿಯ ಷೇರು ಶೇ.3.18ರಷ್ಟು ಏರಿಕೆ ಕಂಡಿತು. ಟ್ರೆಂಟ್‌ ಶೇ.2.40ರಷ್ಟು ಹಾಗೂ ಮಾರುತಿ ಸುಜುಕಿ ಶೇ.2.28ರಷ್ಟು ಏರಿಕೆ ದಾಖಲಿಸಿದವು. ಮತ್ತೊಂದೆಡೆ, ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ (ಎಸ್‌ಬಿಐ) ಷೇರು ಶೇ.1.55ರಷ್ಟು ಕುಸಿದರೆ, ಆಕ್ಸಿಸ್‌ ಬ್ಯಾಂಕ್‌ ಶೇ.1.53ರಷ್ಟು ಇಳಿಕೆ ಕಂಡಿತು. ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್‌ (ಟಿಸಿಎಸ್‌) ಶೇ.1.42ರಷ್ಟು ಹಾಗೂ ಏಷ್ಯನ್‌ ಪೇಂಟ್ಸ್‌ ಶೇ.1.40ರಷ್ಟು ಕುಸಿದವು.

ಕಚ್ಚಾ ತೈಲ ಬೆಲೆ ಏರಿಕೆ ಆತಂಕ

ಮಧ್ಯಪ್ರಾಚ್ಯದಲ್ಲಿನ ಭೌಗೋಳಿಕ ರಾಜಕೀಯ ಉದ್ವಿಗ್ನತೆ ಮತ್ತು ಕಚ್ಚಾ ತೈಲ ಬೆಲೆ ಏರಿಕೆ ಹೂಡಿಕೆದಾರರ ಆತಂಕಕ್ಕೆ ಕಾರಣವಾದವು. ಬ್ರೆಂಟ್‌ ಕಚ್ಚಾ ತೈಲ ಬೆಲೆ ಪ್ರತಿ ಬ್ಯಾರೆಲ್‌ಗೆ 116 ಡಾಲರ್‌ ಸಮೀಪ ವಹಿವಾಟು ನಡೆಸಿದ್ದು, ಆರು ತಿಂಗಳ ಗರಿಷ್ಠ ಮಟ್ಟದ ಹತ್ತಿರದಲ್ಲಿತ್ತು.

ಕಚ್ಚಾ ತೈಲ ಬೆಲೆ ಹೆಚ್ಚಳವು ಹಣದುಬ್ಬರ, ಕಂಪನಿಗಳ ಲಾಭದ ಪ್ರಮಾಣ ಮತ್ತು ಭಾರತದ ಆಮದು ವೆಚ್ಚದ ಮೇಲೆ ಪರಿಣಾಮ ಬೀರಬಹುದು ಎಂಬ ಆತಂಕ ಮಾರುಕಟ್ಟೆಯ ಮೇಲೆ ಒತ್ತಡ ಹೇರಿತು. ಅಮೆರಿಕದ ಫೆಡರಲ್‌ ರಿಸರ್ವ್‌ನ ಮುಂಬರುವ ಬಡ್ಡಿದರ ನಿರ್ಧಾರ ಹಾಗೂ ಕಂಪನಿಗಳ ತ್ರೈಮಾಸಿಕ ಫಲಿತಾಂಶಗಳ ಮೇಲೂ ಹೂಡಿಕೆದಾರರು ಗಮನಹರಿಸಿದ್ದಾರೆ.

ತಿಂಗಳ ಡೆರಿವೇಟಿವ್ಸ್‌ ಎಕ್ಸ್‌ಪೈರಿಯಿಂದಾಗಿ ವಹಿವಾಟಿನಲ್ಲಿ ಏರಿಳಿತ ಕಂಡುಬಂದರೂ, ಫಾರ್ಮಾ, ರಿಯಾಲ್ಟಿ ಹಾಗೂ ವಿಶಾಲ ಮಾರುಕಟ್ಟೆಯ ಕೆಲವು ಷೇರುಗಳ ಏರಿಕೆ ಪ್ರಮುಖ ಸೂಚ್ಯಂಕಗಳ ಕುಸಿತವನ್ನು ಮಿತಿಗೊಳಿಸಿತು. ಅಂತಿಮವಾಗಿ ಸೆನ್ಸೆಕ್ಸ್‌ ಮತ್ತು ನಿಫ್ಟಿ ಅಲ್ಪ ಇಳಿಕೆಯೊಂದಿಗೆ ದಿನದ ವಹಿವಾಟು ಮುಗಿಸಿದವು.