ನವದೆಹಲಿ: ಖ್ಯಾತ ಕ್ರಿಕೆಟ್ ಆಟಗಾರ ಯುವರಾಜ್ ಸಿಂಗ್ ತಮ್ಮ ಮದುವೆಗೆ ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರನ್ನು ಆಹ್ವಾನಿಸಲು ನಿನ್ನೆ ಸಂಸತ್ತಿಗೆ ಭೇಟಿ ನೀಡಿದ್ದು ಮಾಧ್ಯಮಗಳಲ್ಲಿ ಸುದ್ದಿಯಾಗಿದೆ.
ಇದೇ 30ರಂದು ಬಾಲಿವುಡ್ ನಟಿ ಹಜೆಲ್ ಕೀಚ್ ಅವರನ್ನು ಮದುವೆಯಾಗಲಿರುವ ಯುವರಾಜ್ ಸಿಂಗ್ ಪ್ರಧಾನಿಯವರಿಗೆ ನೀಡಿದ ಆಹ್ವಾನ ಪತ್ರಿಕೆಯಲ್ಲಿ ಅವರ ಹೆಸರನ್ನು ತಪ್ಪಾಗಿ ನರೇಂದರ್ ಮೋದಿ ಎಂದು ಪ್ರಿಂಟಿಸಿದ್ದಾರೆ.
ಇದು ಬೇರೆ ಯಾರೋ ಟೈಪ್ ಮಾಡುವಾಗ ಆದ ತಪ್ಪಾದರೂ ಕೂಡ ಸೆಲೆಬ್ರಿಟಿಗಳ ಹೈ ಪ್ರೊಫೈಲ್ ಮದುವೆಯಾಗಿರುವುದರಿಂದ ಸಾಮಾಜಿಕ ಜಾಲತಾಣಗಳಲ್ಲಿ ನಗೆಪಾಟಲಿಗೀಡಾಗಿದೆ.
ಯುವರಾಜ್ ಸಿಂಗ್ ಅವರು ಚಂಡೀಗಢದ ಗುರುದ್ವಾರದಲ್ಲಿ ನವೆಂಬರ್ 30ರಂದು ಹಜೆಲ್ ಅವರನ್ನು ವರಿಸಲಿದ್ದು ನಂತರ ಡಿಸೆಂಬರ್ 2ರಂದು ಹಿಂದೂ ಸಂಪ್ರದಾಯದ ಪ್ರಕಾರ ಗೋವಾದಲ್ಲಿ ಮದುವೆಯಾಗಲಿದ್ದಾರೆ. ದೆಹಲಿಯಲ್ಲಿ ಡಿಸೆಂಬರ್ 5 ಮತ್ತು 7ರಂದು ಸಂಗೀತ ಮತ್ತು ಆರತಕ್ಷತೆ ನೆರವೇರಲಿದೆ.
ಯುವರಾಜ್ ಸಿಂಗ್ ಮತ್ತು ಹಜೆಲ್ ಕೀಚ್ ಅವರು ಫರಾನ್ ಖಾನ್ ಅವರ ಸಂಗೀತಕ್ಕೆ ಹೆಜ್ಜೆ ಹಾಕಲಿದ್ದಾರಂತೆ. ಇತ್ತೀಚೆಗೆ ಫರಾನ್ ಖಾನ್ ಸಾನಿಯಾ ಮಿರ್ಜಾ ಅವರ ಸೋದರಿಯ ಮದುವೆಗೆ ನೃತ್ಯಕ್ಕೆ ಸಂಗೀತ ಸಂಯೋಜಿಸಿದ್ದರು.