ಮುಂಬೈ: ಬಾಲಿವುಡ್ ನ ಖ್ಯಾತ ತಾರೆ ಮತ್ತು ನೃತ್ಯಗಾರ್ತಿ ಮಾಧುರಿ ದೀಕ್ಷಿತ್ ಅವರು ಸೋಮವಾರ ೫೦ನೆಯ ವಸಂತಕ್ಕೆ ಕಾಲಿಟ್ಟಿದ್ದಾರೆ. ಹಿರಿಯ ನಟರಾದ ಅನಿಲ್ ಕಪೂರ್, ಜಾಕಿ ಶ್ರಾಫ್, ಜೂಹಿ ಚಾವ್ಲಾ ಮುಂತಾದವರು ನಟಿಗೆ ಹುಟ್ಟುಹಬ್ಬದ ಶುಭಾಶಯ ಕೋರಿದ್ದಾರೆ. 

ಮೇ ೧೫, ೧೯೬೭ರಲ್ಲಿ ಜನಿಸಿದ್ದ ಮಾಧುರಿ, ೧೯೮೪ ರಲ್ಲಿ 'ಅಬೋಧ್' ಮೂಲಕ ಚಿತ್ರರಂಗ ಪ್ರವೇಶಿಸಿದ್ದರು. ನಂತರ ಜನಪ್ರಿಯ ಸಿನೆಮಾಗಳಾದ 'ರಾಮ್ ಲಖನ್', 'ದಿಲ್', 'ಬೇಟಾ', 'ಹ್ಯಾಮ್ ಆಪ್ಕೆ ಹೈ ಕೌನ್', 'ದಿಲ್ ತೊ ಪಾಗಲ್ ಹೈ', 'ದೇವದಾಸ್' ಮುತಾಂದ ಸಿನೆಮಾಗಳಲ್ಲಿ ನಟಿಸಿ ಬಾಲಿವುಡ್ ರಾಣಿಯಾಗಿ ಮೆರೆದವರು. ನಟನೆಯಲ್ಲಷ್ಟೇ ಅಲ್ಲದೆ ತಮ್ಮ ನೃತ್ಯ ಕೌಶಲ್ಯಕ್ಕೂ ಮನೆಮಾತಾದವರು ಮಾಧುರಿ. 

ಮಾಧುರಿ ೧೯೯೯ರಲ್ಲಿ ಲಾಸ್ ಏಂಜಲೀಸ್ ವೈದ್ಯ ಶ್ರೀರಾಮ್ ಮಾಧವ್ ನೆನೆ ಅವರನ್ನು ವರಿಸಿದ್ದರು.  ಈ ದಂಪತಿಗೆ ಅರಿನ್ ಮತ್ತು ರಯಾನ್ ಎಂಬ ಇಬ್ಬರು ಪುತ್ರರಿದ್ದಾರೆ. 

ಈ ಸಂದರ್ಭದಲ್ಲಿ ಬಾಲಿವುಡ್ ತಾರೆಯರಾದ ಅನಿಲ್ ಕಪೂರ್, ಜಾಕಿ ಶ್ರಾಫ್, ಜೂಹಿ ಚಾವ್ಲಾ, ರಿತೇಶ್ ದೇಶಮುಖ್, ಅದಿತಿ ರಾವ್ ಹೈದರಿ, ಕರಣ್ ವಹಿ, ರಾಗಿಣಿ ಖನ್ನಾ, ಮನೀಶ್ ಪಾಲ್ ಮುಂತಾದವರು ಟ್ವಿಟ್ಟರ್ ಮೂಲಕ ಶುಭಾಶಯ ಕೋರಿದ್ದಾರೆ.