ಬಾಲಿ (ಇಂಡೋನೇಷ್ಯಾ): ಬಾಲಿವುಡ್‌ನ ಖ್ಯಾತ ನಟಿ ನುಸ್ರತ್ ಭರುಚಾ ಅವರ ಅಭಿಮಾನಿಗಳಿಗೆ ಆಘಾತಕಾರಿ ಸುದ್ದಿಯೊಂದು ಎದುರಾಗಿದೆ. ಇಂಡೋನೇಷ್ಯಾದ ಬಾಲಿಯಲ್ಲಿ ನಡೆದ ಭೀಕರ ಅಪಘಾತವೊಂದರಲ್ಲಿ ನುಸ್ರತ್ ಭರೂಚಾ ಅವರು ಬೆನ್ನುಮೂಳೆ ಮುರಿತಕ್ಕೆ ಒಳಗಾಗಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಏನಿದು ಘಟನೆ?
ನಟ ಟೈಗರ್ ಶ್ರಾಫ್ ನಟನೆಯ ಮುಂದಿನ ಬಹುನಿರೀಕ್ಷಿತ ಆ್ಯಕ್ಷನ್ ಸಿನಿಮಾದ ಶೂಟಿಂಗ್‌ಗಾಗಿ ನುಸ್ರತ್ ಬಾಲಿಗೆ ತೆರಳಿದ್ದರು. ಚಿತ್ರೀಕರಣದ ಸಂದರ್ಭದಲ್ಲೇ ಅವರಿಗೆ ಈ ಗಾಯವಾಗಿದೆ ಎಂದು ತಿಳಿದುಬಂದಿದೆ. ಈ ಚಿತ್ರದಲ್ಲಿ ಪಶ್ಮಿನಾ ರೋಷನ್, ಅಭಿಷೇಕ್ ಬ್ಯಾನರ್ಜಿ ಮತ್ತು ಎಲ್ವಿಶ್ ಯಾದವ್ ಕೂಡ ಪ್ರಮುಖ ಪಾತ್ರಗಳಲ್ಲಿದ್ದಾರೆ.
ನುಸ್ರತ್ ಅವರ ಸಿನಿಮಾ ತಂಡದ ಪ್ರಚಾರಕಿ ಸಂಚಿತಾ ತ್ರಿವೇದಿ ನೀಡಿರುವ ಮಾಹಿತಿ ಪ್ರಕಾರ, ವೈದ್ಯರು ನುಸ್ರತ್ ಅವರಿಗೆ ಬೆನ್ನುಮೂಳೆಯ ಶಸ್ತ್ರಚಿಕಿತ್ಸೆ ಮಾಡಲು ನಿರ್ಧರಿಸಿದ್ದು, ಹೆಚ್ಚಿನ ಮತ್ತು ಸುಧಾರಿತ ಚಿಕಿತ್ಸೆಗಾಗಿ ಅವರನ್ನು ಬಾಲಿಯಿಂದ ಮುಂಬೈಗೆ ಏರ್ ಅಂಬುಲೆನ್ಸ್ ಮೂಲಕ ಕರೆತರಲು ಸಿದ್ಧತೆಗಳು ಭರದಿಂದ ನಡೆದಿವೆ. ಅದರಂತೆ, ಮುಂಬೈ ತಲುಪಿದ ತಕ್ಷಣವೇ ಅವರಿಗೆ ಸರ್ಜರಿ ಮಾಡಲಾಗುವುದು.
ಮುಂದುವರೆದು, ಗಾಯದ ತೀವ್ರತೆ ಮತ್ತು ಮುಂಬರುವ ಪ್ರಮುಖ ಸರ್ಜರಿಯ ಕಾರಣದಿಂದಾಗಿ ನುಸ್ರತ್ ಅವರಿಗೆ ವೈದ್ಯರು ದೀರ್ಘಕಾಲದ ಸಂಪೂರ್ಣ ವಿಶ್ರಾಂತಿಗೆ ಸೂಚಿಸಿದ್ದಾರೆ. ಇದರಿಂದಾಗಿ ಮುಂಬರುವ ಕೆಲವು ವಾರಗಳ ಕಾಲ ಅವರ ಎಲ್ಲಾ ಸಿನಿಮಾ ಶೂಟಿಂಗ್ ಮತ್ತು ಕೆಲಸದ ಬದ್ಧತೆಗಳು ಸಂಪೂರ್ಣವಾಗಿ ಸ್ಥಗಿತಗೊಳ್ಳಲಿವೆ. ಇದರ ನಡುವೆಯೇ, ನಟಿಯ ಪಿಆರ್ ತಂಡವು "ಪ್ರಸ್ತುತ ನುಸ್ರತ್ ಅವರ ಆರೋಗ್ಯ ಮತ್ತು ವೈದ್ಯಕೀಯ ಆರೈಕೆ ಮಾತ್ರ ನಮ್ಮ ಮೊದಲ ಆದ್ಯತೆಯಾಗಿದೆ. ಈ ಕಷ್ಟದ ಸಮಯದಲ್ಲಿ ಅಭಿಮಾನಿಗಳು ಮತ್ತು ಮಾಧ್ಯಮಗಳು ಅವರ ವೈಯಕ್ತಿಕ ಗೌಪ್ಯತೆಯನ್ನು ಗೌರವಿಸಬೇಕು" ಎಂದು ಮನವಿ ಮಾಡಿಕೊಂಡಿದೆ.
ಏತನ್ಮಧ್ಯೆ, ಚಿತ್ರೀಕರಣದ ವೇಳೆ ನುಸ್ರತ್ ಗಾಯಗೊಳ್ಳುತ್ತಿರುವುದು ಇದೇ ಮೊದಲಲ್ಲ. 2023 ರಲ್ಲಿ ಅಕೇಲಿ ಚಿತ್ರದ ಓಡುವ ದೃಶ್ಯದಲ್ಲಿ ಅಮೃತಶಿಲೆ ನೆಲದ ಮೇಲೆ ಬಿದ್ದು ತೀವ್ರ ನೋವಿನಿಂದ ಬಳಲಿದ್ದರು. ಅದೇ ವರ್ಷ ಛೋರಿ 2 ಚಿತ್ರದ ಸಾಹಸ ದೃಶ್ಯದಲ್ಲಿ ಮುಖಕ್ಕೆ ಗಾಯವಾಗಿ ಹುಬ್ಬಿಗೆ ಹೊಲಿಗೆ ಹಾಕಲಾಗಿತ್ತು. 2021 ರಲ್ಲಿ ಲವ್ ರಂಜನ್ ಸಿನಿಮಾ ಶೂಟಿಂಗ್ ವೇಳೆ ವಿಪರೀತ ಕೆಲಸದ ಒತ್ತಡದಿಂದ ತೀವ್ರ ತಲೆತಿರುಗುವಿಕೆ ಉಂಟಾಗಿ ರಕ್ತದೊತ್ತಡ ಇಳಿದು ಆಸ್ಪತ್ರೆ ಸೇರಿದ್ದರು.