ಬೆಂಗಳೂರು: ರಿಷಬ್ ಶೆಟ್ಟಿ ತಮ್ಮ ಚೊಚ್ಚಲ ನಿರ್ದೇಶನದ ಚಲನಚಿತ್ರ 'ರಿಕ್ಕಿ' ಚಿತ್ರೀಕರಣಕ್ಕೆ ಜಮ್ಮು ಕಾಶ್ಮೀರದತ್ತ ಮುಖ ಮಾಡಿದ್ದಾರೆ. ಮೇ ೧೫ ರಿಂದ ೧೦ ದಿನಗಳ ಕಾಲ ತಮ್ಮ ಪಾತ್ರವರ್ಗ ಮತ್ತು ತಾಂತ್ರಿಕ ವರ್ಗದೊಂದಿಗೆ ಕೆಲವು ದೃಷ್ಯಗಳ ಹಾಗೂ ಹಾಡುಗಳ ಚಿತ್ರೀಕರಣಕ್ಕೆ ಕಣಿವೆಗೆ ತೆರಳಲಿದ್ದಾರೆ. "ನಾನು ಲೊಕೇಶನ್ ಹುಡುಕಲು ಮೊದಲು ಹೋಗಲಿದ್ದೇನೆ. ನಮ್ಮ ತಂಡ ನನ್ನನ್ನು ಮೇ ೧೮ ರಂದು ಸೇರಲಿದೆ. ಒಂದು ಡ್ಯುಯೆಟ್, ಪ್ರಯಾಣದ ಹಾಡು ಮತ್ತು ಕೆಲವು ಭಾವನಾತ್ಮಕ ದೃಷ್ಯಗಳನ್ನು ಚಿತ್ರೀಕರಣ ಮಾಡಲಿದ್ದೇವೆ" ಎನ್ನುತ್ತಾರೆ ರಿಷಬ್.
ಜಮ್ಮು ಕಾಶ್ಮೀರದ ಆಯ್ಕೆ ಏಕೆ ಎಂದು ವಿವರಿಸುವ ರಿಷಬ್ "ಇದು ನಮ್ಮ ಸ್ಕ್ರಿಪ್ಟ್ ಗೆ ಪಕ್ಕಾ ಜಾಗ. ಚಿತ್ರದ ನಾಯಕ ರಕ್ಷಿತ್ ಶೆಟ್ಟಿ ಉತ್ತರದಿಂದ ದಕ್ಷಿಣಕ್ಕೆ ಬರುವ ವನ್ಯಜೀವಿ ಸಂರಕ್ಷಕನ ಪಾತ್ರ ನಿರ್ವಹಿಸಿದ್ದಾರೆ. ಈ ಜಾಗ ರಮಣೀಯವಾಗಿದ್ದು ಸ್ಕ್ರಿಪ್ಟ್ ಗೆ ಸೂಕ್ತವಾಗಿದೆ" ಎನ್ನುತ್ತಾರೆ ರಿಷಬ್.
ಈಗಾಗಲೇ ಕಾರ್ಕಳದಲ್ಲಿ ಬಹಳಷ್ಟು ಚಿತ್ರೀಕರಣ ಮುಗಿಸಿರುವ ರಿಷಬ್ ಜೊತೆಜೊತೆಯಲ್ಲೇ ಚಿತ್ರೀಕರಣ ನಂತರದ ಕೆಲಸಗಳನ್ನೂ ಪ್ರಾರಂಭಿಸಿದ್ದಾರೆ.
ಚಲನಚಿತ್ರಕ್ಕೆ ಅರ್ಜುನ್ ಜನ್ಯ ಅವರ ಸಂಗೀತ ಇದ್ದು, ವೆಂಕಟೇಶ್ ಅನುರಾಗ್ ಸಿನೆಮ್ಯಾಟೋಗ್ರಾಫರ್. ರಕ್ಷಿತ್ ಶೆಟ್ಟಿ ಮತ್ತು ಹರಿಪ್ರಿಯಾ ಮುಖ್ಯ ಭೂಮಿಕೆಯಲ್ಲಿದ್ದಾರೆ.