ನವದೆಹಲಿ: ನಟ-ನಿರ್ಮಾಪಕ ಕಮಲ್ ಹಾಸನ್ ತನ್ನ ಮುಂದಿನ ಚಿತ್ರದ ಹೆಸರನ್ನು ಶನಿವಾರ ಬಹಿರಂಗಪಡಿಸಿದ್ದಾರೆ. ತಮಿಳು ಮತ್ತು ತೆಲುಗು ಭಾಷೆಯಲ್ಲಿ ತೆರೆ ಕಾಣಲಿರುವ ಈ ಚಿತ್ರದ ಹೆಸರು ತೂಂಗಾವನಂ. ಪ್ರಸ್ತುತ ಚಿತ್ರದ ನಿರ್ಮಾಣ ಮೇ 24ರಂದು ಹೈದ್ರಾಬಾದ್‌ನಲ್ಲಿ ಆರಂಭವಾಗಲಿದೆ.

ತೂಂಗಾವನಂ- ಅಂದರೆ ನಿದ್ದೆ ಮಾಡದೇ ಇರುವ ಕಾಡು. ಈ ಸಿನಿಮಾ ಏಕಕಾಲಕ್ಕೆ ತೆಲುಗು ಮತ್ತು ತಮಿಳಿನಲ್ಲಿ ನಿರ್ಮಾಣವಾಗಲಿದೆ. ರಾಜೇಶ್ ಎಂ. ಸೆಲ್ವಾ ಅವರು ಚಿತ್ರ ನಿರ್ದೇಶನ ಮಾಡಲಿದ್ದು, ನಿರ್ಮಾಣ ತಮ್ಮದೇ ಸಂಸ್ಥೆಯಾದ ರಾಜ್ ಕಮಲ್ ಫಿಲಂಸ್ ನದ್ದು ಎಂದು ಕಮಲ್ ಹೇಳಿದ್ದಾರೆ.

 ಹೈದ್ರಾಬಾದ್ ಮತ್ತು ಚೆನ್ನೈನಲ್ಲಿ ಮೂರು ತಿಂಗಳುಗಳ ಕಾಲ ಶೂಟಿಂಗ್ ನಡೆಯಲಿದೆ. ಅದೇ ವೇಳೆ ಈ ಸಿನಿಮಾದ ತಾರಾಗಣದ ಬಗ್ಗೆ ಕಮಲ್ ಹಾಸನ್ ಏನೂ ಹೇಳಿಲ್ಲ.

ಆದರೆ ತೂಂಗಾವನಂನಲ್ಲಿ ತ್ರಿಷಾ ಕೃಷ್ಣನ್ ಮತ್ತು ಪ್ರಕಾಶ್ ರಾಜ್ ಅವರು ನಟಿಸಲಿದ್ದಾರೆ ಎಂದು ಕೆಲವೊಂದು ಮೂಲಗಳು ಸುದ್ದಿ ಮಾಡಿವೆ. ಅದೇ ವೇಳೆ ಬಾಲಿವುಡ್ ನಟಿ ಮನೀಷಾ ಕೊಯಿರಾಲಾಗೆ ಕಮಲ್ ಹಾಸನ್‌ರ ಪತ್ನಿ ಪಾತ್ರದಲ್ಲಿ ನಟಿಸುವಂತೆ ಆಫರ್ ನೀಡಲಾಗಿದೆ ಎನ್ನುತ್ತಿವೆ ಸಿನಿಮಾ ಮೂಲಗಳು.