ನಟನೆಯೊಂದಿಗೆ ಹಿನ್ನೆಲೆ ಗಾಯನದಲ್ಲೂ ಗುರುತಿಸಿಕೊಂಡಿರುವ ನಟ ಪುನೀತ್ ರಾಜ್ ಕುಮಾರ್ ಈವರೆಗೂ 45 ಚಿತ್ರಗೀತೆಗಳನ್ನು ಹಾಡಿದ್ದಾರೆ. ಇತ್ತೀಚಿನ ದಿನಗಳಲ್ಲಿ ಪುನೀತ್ ರಾಜ್ ಕುಮಾರ್ ನಿರ್ಮಾಪಕರ ಲಕ್ಕಿ ವಾಯ್ಸ್ ಆಗಿದ್ದು, ಸ್ಯಾಂಡಲ್ ವುಡ್ ನಲ್ಲಿ ಪುನೀತ್ ಹಿನ್ನೆಲೆ ಗಾಯನಕ್ಕೆ ಬೇಡಿಕೆ ಹೆಚ್ಚುತ್ತಿದೆ.

ಹಿನ್ನೆಲೆ ಗಾಯನದಿಂದ ಬರುವ ಹಣವನ್ನು ಪುನೀತ್ ರಾಜ್ ಕುಮಾರ್ ಸಾಮಾಜಿಕಕಾರ್ಯಗಳಿಗೆ ನೀಡುತ್ತಿದ್ದಾರೆ. " ಪುನೀತ್ ರಾಜ್ ಕುಮಾರ್ ಅವರ ಹಿನ್ನೆಲೆ ಗಾಯನದ ಆದಾಯವನ್ನು ರಾಜ್ ಕುಮಾರ್ ಅವರ ಹೆಸರಿನಲ್ಲಿ ನಡೆಯುತ್ತಿರುವ ಚಾರಿಟಬಲ್ ಟ್ರಸ್ಟ್ ಗೆ ನೀಡಲಾಗುತ್ತಿದ್ದು ನೆರವಿನ ಅಗತ್ಯವಿರುವ ಮಕ್ಕಳ ವಿದ್ಯಾಭ್ಯಾಸಕ್ಕಾಗಿ ಬಳಸಲಾಗುತ್ತಿದೆ.

ಚಾರಿಟಬಲ್ ಟ್ರಸ್ಟ್ ನಿಂದ ನೆರವು ಪಡೆದಿರುವ ಓರ್ವ ವಿದ್ಯಾರ್ಥಿ ಈಗಾಗಲೇ ಡಾಕ್ಟರ್ ಆಗಿದ್ದು, ಈ ವರ್ಷ ಓರ್ವ ಯುವತಿ ಎಂ.ಟೆಕ್ ಗೆ ಸೇರಲು ಟ್ರಸ್ಟ್ ನೆರವಾಗಿದೆ ಎಂದು ಪುನೀತ್ ರಾಜ್ ಕುಮಾರ್ ಅವರ ಕಾರ್ಯದರ್ಶಿ ಮಾಹಿತಿ ನೀಡಿದ್ದಾರೆ.