ಬೆಂಗಳೂರು: 'ಟೈಗರ್' ಸಿನೆಮಾದ ನಟ ಪ್ರದೀಪ್ ಇಂದು ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿದ್ದು, ಚಿತ್ರತಂಡ ಅವರಿಗೆ ಟೀಸರ್ ಹಾಡಿನ ಉಡುಗೊರೆ ನೀಡಿದೆ. ನಿರ್ದೇಶಕ ನಂದ ಕಿಶೋರ್ ಮತ್ತು ಅವರ ಸಹೋದರ ತರುಣ್ ಸುಧೀರ್, ಸುದೀಪ್ ಹಾಡಿರುವ ಈ ಸಿನೆಮಾದ ಶೀರ್ಷಿಕೆ ಗೀತೆಯನ್ನು ಬಿಡುಗಡೆ ಮಾಡಲಿದ್ದಾರೆ. 

"ಸಾಮಾಜಿಕ ಅಂತರ್ಜಾಲದಲ್ಲಿ ಬಿಡುಗಡೆಯಾಗಲಿರುವ ಒಂದು ನಿಮಿಷದ ಟೀಸರ್ ನಲ್ಲಿ ಈ ಹಾಡಿನ ಮತ್ತು ಸಿನೆಮಾದ ಚಿತ್ರೀಕರಣದ ಕೆಲವು ದೃಶ್ಯಗಳು ಇರಲಿವೆ" ಎನ್ನುವ ತರುಣ್ "ನಮ್ಮ ಹೀರೋನ ಹುಟ್ಟುಹಬ್ಬವನ್ನು ವಿಶೇಷವಾಗಿಸುವ ಯೋಜನೆ ಇಟ್ಟುಕೊಂಡಿದ್ದೆವು" ಎಂದಿದ್ದಾರೆ. 

ಅರ್ಜುನ್ ಜನ್ಯ ಸಂಗೀತ ನೀಡಿರುವ ಈ ಹಾಡನ್ನು ಕನ್ನಡದ ಜನಪ್ರಿಯ ನಟ ಸುದೀಪ್ ಹಾಡಿರುವುದು ವಿಶೇಷ. 

"'ಅಧ್ಯಕ್ಷ' ಸಿನೆಮಾಗೆ ಪುನೀತ್ ಶೀರ್ಷಿಕೆ ಗೀತೆಯನ್ನು ಹಾಡಿದ್ದರು. ಅದು ಬಹಳ ಜನಪ್ರಿಯವಾಗಿತ್ತು. ಈ ಸಿನೆಮಾದಲ್ಲಿ ಸುದೀಪ್ ಹಾಡಿದ್ದಾರೆ" ಎನ್ನುತ್ತಾರೆ ತರುಣ್.

ನಂದಕಿಶೋರ್ ನಿರ್ದೇಶನದ ಈ ಸಿನೆಮಾದ ಆಡಿಯೋ ಗಣೇಶ ಚತುರ್ಥಿಗೆ ಬಿಡುಗಡೆಯಾಗಲಿದೆ. "ಚಿತ್ರೀಕರಣದ ನಂತರದ ಕೆಲಸಗಳು ಕೂಡ ಜಾರಿಯಲ್ಲಿದ್ದು ಸಿನೆಮಾ ಅಕ್ಟೊಬರ್ ನಲ್ಲಿ ಬಿಡುಗಡೆ ಮಾಡುವ ಭರವಸೆಯಿದೆ" ಎನ್ನುತ್ತಾರೆ ತರುಣ್. 

ನಟ ಪ್ರದೀಪ್ ಅವರ ಮಾವ ಕೆ ಶಿವರಾಮು ಇಂಚರ ಫಿಲಂಸ್ ಅಡಿ ಈ ಸಿನೆಮಾವನ್ನು ನಿರ್ಮಿಸುತ್ತಿದ್ದಾರೆ. 

ಮಧುರಿಮಾ ಬ್ಯಾನರ್ಜಿ ನಾಯಕನಟಿಯಾಗಿದ್ದು, ರಂಗಾಯಣ ರಘು ಮತ್ತು ರವಿಶಂಕರ್ ತಾರಾಗಣದ ಭಾಗವಾಗಿದ್ದಾರೆ.