ಸ್ಟಾರ್ ನಟರು ತಮ್ಮ ಸಿನಿಮಾಗಳ ಹೊರತಾಗಿಯೂ ಇತರೆ ನಟರ ಚಿತ್ರಗಳಲ್ಲಿ ಹಾಡುವುದು ಟ್ರೆಂಡ್ ಆಗಿದೆ. ಈ ಪರಂಪರೆಗೆ ಈಗ ನಟಿಯರೂ ಸೇರಿಕೊಳ್ಳುತ್ತಿದ್ದಾರೆ. ಪುನೀತ್ ರಾಜ್‍ ಕುಮಾರ್ ಅಭಿನಯಿಸಿರುವ `ಚಕ್ರವ್ಯೂಹ'ದಲ್ಲಿ ಕಾಜಲ್ ಅಗರವಾಲ್ ಒಂದು ಹಾಡಿಗೆ ದನಿಯಾದ ಬೆನ್ನಲ್ಲೇ ಮತ್ತೊಬ್ಬ ಸ್ಟಾರ್ ನಟಿ ಹಾಡಿಗೆ ಕೊರಳು ನೀಡಿದ್ದಾರೆ.
ಹೌದು, ಬಹುಭಾಷಾ ನಟಿ ಪ್ರಿಯಾಮಣಿ ಈಗ ಸಿಂಗರ್ ಕೂಡ! ಪ್ರಿಯಾಮಣಿ ಹಾಡಿರುವುದು ಅಕುಲ್ ಬಾಲಾಜಿ ಅಭಿನಯದ ಚಿತ್ರಕ್ಕೆ. ಅಂದಹಾಗೆ ಈ ಚಿತ್ರದ ಹೆಸರು `ದೇವರವ್ನೆ ಬಿಡು ಗುರು' ಎನ್ನುವುದು. ರಾಜೇಶ್ ರಾಮ್ ನಾಥ್ ಸಂಗೀತ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ ಈ ಚಿತ್ರದ ಹಾಡುಗಳಲ್ಲಿ ಒಂದು ಹಾಡಿಗೆ ಪ್ರಿಯಾಮಣಿ ಕಂಠ ನೀಡಿದ್ದಾರೆ. ಆ ಮೂಲಕ ಇದೇ ಮೊದಲ ಬಾರಿಗೆ ಪ್ರಿಯಾಮಣಿ ಹಾಡುಗಾರ್ತಿಯಾಗಿಯೂ ಸೈ ಎನಿಸಿಕೊಂಡಿದ್ದಾರೆ.
ಸಂಗೀತ ನಿರ್ದೇಶಕ ರಾಜೇಶ್ ರಾಮ್ ನಾಥ್ ಅವರ ಸ್ಟುಡಿಯೋದಲ್ಲಿ ಸದರಿ ಹಾಡಿನ ರೆಕಾರ್ಡಿಂಗ್ ನಡೆದಿದೆ. ಮೈಸೂರಿನ ಪ್ರಥಮ್ ಎಂಬವರು ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಇವರಿಗೆ ಇದೇ ಮೊದಲ ನಿರ್ದೇಶನದ ಚಿತ್ರ. ವಿಶೇಷ ಅಂದರೆ ಇದೇ ಚಿತ್ರದಲ್ಲಿ ಅಕುಲ್ ಬಾಲಾಜಿ ಹಾಗೂ ಪುನೀತ್ ರಾಜ್‍ಕುಮಾರ್ ಕೂಡ ಒಂದೇ ಹಾಡಿಗೆ ಧ್ವನಿಯಾಗಿರುವುದು! ಇಷಾ ರಂಗನಾಥ್ ಈ ಚಿತ್ರದ ನಾಯಕಿ. ಇವರಿಗೂ ಇದು ಮೊದಲ ಕನಸು ನನಸಾಗುತ್ತಿರುವ ಪ್ರಯತ್ನ. ಅಲ್ಲದೆ ಪತ್ರಕರ್ತ ರವಿ ಬೆಳಗೆರೆ ಅವರೂ ಈ ಚಿತ್ರದಲ್ಲಿ ಮುಖ್ಯ ಪಾತ್ರಧಾರಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.