ಬೆಂಗಳೂರು: 100ಕ್ಕೂ ಹೆಚ್ಚು ಸಿನೆಮಾಗಳಲ್ಲಿ ನಟಿಸಿರುವ ಜನಪ್ರಿಯ ನಟ ಶಿವರಾಜ್ ಕುಮಾರ್ ಅವರ ವೈಶಿಷ್ಟ್ಯ ವಾಣಿಜ್ಯ ಸಿನೆಮಾಗಳಿಂದಾಚೆಗೂ ತಮ್ಮನ್ನು ಒಡ್ಡಿಕೊಳ್ಳುವ ಅವರ ಪ್ರಯೋಗಾತ್ಮಕ ಬದ್ಧತೆ. 

ಈಗ ಶಿವಣ್ಣ ನಟಿಸಿರುವ 'ಸಂತೆಯಲ್ಲಿ ನಿಂತ ಕಬೀರ' ಶುಕ್ರವಾರ ಬಿಡುಗಡೆಗೆ ಸಿದ್ಧವಾಗಿದ್ದು "ಇದು ವಿಭಿನ್ನ ಸಿನೆಮಾ. ಈ ಪ್ರಾಕಾರದ ಸಿನೆಮಾಗಳು ಇತ್ತೀಚಿಗೆ ವಿರಳ. ಅಪ್ಪಾಜಿ (ರಾಜಕುಮಾರ್) ಅಂತಹ ಸಿನೆಮಾಗಳಲ್ಲಿ ನಟಿಸಿದ್ದರು ಹಾಗು ಅವುಗಳಲ್ಲಿ 'ಭಕ್ತ ಕುಂಬಾರ', 'ಸಂತ ತುಕಾರಾಮ್', 'ಮಹಿಷಾಸುರ ಮರ್ಧಿನಿ' ಮುಂತಾದವು ಭಾರಿ ಯಶಸ್ಸನ್ನು ತಂದುಕೊಟ್ಟವು. ಒಂದು ಸಿನೆಮಾದಲ್ಲಿ ಅವರು ಕಬೀರನಾಗಿಯೂ ನಟಿಸಿದ್ದಾರೆ. ಆದುದರಿಂದ ನಾನು ಈ ಸಿನೆಮಾದಲ್ಲಿ ಪ್ರಯೋಗ ಮಾಡುತ್ತಿದ್ದೇನೆ ಎಂದಷ್ಟೇ ಹೇಳಬಹುದು. ಆದರೆ ಇಂತಹ ಪಾತ್ರಗಳು ನನ್ನ ತಂದೆಯವರೊಂದಿಗೆ ಹೋಲಿಸುವ ಭಯವಂತೂ ಇದ್ದೆ ಇದೆ" ಎನ್ನುತ್ತಾರಷ್ಟೇ ನಟ ಶಿವರಾಜ್ ಕುಮಾರ್. 

ಈ ಸಿನೆಮಾದ ಬಗ್ಗೆ ಅಪಾರ ನಿರೀಕ್ಷಿಗಳು ಹುಟ್ಟಿರುವುದನ್ನು ಒಪ್ಪಿಕೊಳ್ಳುವ ನಟ "ವಿವಿಧ ಬಗೆಯ ಸಿನೆಮಾಗಳ ಪ್ರಯೋಗಗಳಲ್ಲಿ ತೊಡಗಿಸಿಕೊಳ್ಳುವುದಕ್ಕೆ ಭಯವೇ ಸಹಕಾರಿ. ಈ ಸಿನೆಮಾ ನನಗೆ ಸಿಕ್ಕಿದ್ದಕ್ಕೆ ಖುಷಿಯಿದೆ" ಎನ್ನುತ್ತಾರೆ ಶಿವಣ್ಣ. 

14 ನೇ ಶತಮಾನದಲ್ಲಿ ನಡೆದ ಈ ಕಥೆ ಇಂದಿಗೂ ಪ್ರಸ್ತುತ ಎನ್ನುವ ನಟ "ನಾವು 14 ನೇ ಶತಮಾನಕ್ಕೆ ಪ್ರೇಕ್ಷಕರನ್ನು ಕೊಂಡೊಯ್ಯಲು ಪ್ರಯತ್ನಿಸಿದ್ದೇವೆ" ಎನ್ನುವ ಶಿವರಾಜ್ ಕುಮಾರ್ ಇಂತಹ ಸಿನೆಮಾಗಳನ್ನು ನಿರ್ಮಿಸಲು ಮುಂದಾದ ನಿರ್ಮಾಪಕ ಕುಮಾರಸ್ವಾಮಿ ಪಥಿಕೊಂಡ ಅವರನ್ನು ಪ್ರಶಂಸಿಸುತ್ತಾರೆ. 

'ಕಬ್ಬಡಿ' ಸಿನೆಮಾ ಖ್ಯಾತಿಯ ಇಂದ್ರಬಾಬು ಈ ಸಿನೆಮಾದ ನಿರ್ದೇಶಕ.