ಬೆಂಗಳೂರು: ದೇಶದಾದ್ಯಂತ ಬಿಡುಗಡೆ ಕಂಡ ಹೇಮಂತರಾವ್ ನಿರ್ದೇಶನದ 'ಗೋಧಿ ಬಣ್ಣ ಸಾಧಾರಣ ಮೈಕಟ್ಟು' ಸಿನೆಮಾ ಒಳ್ಳೆಯ ಪ್ರದರ್ಶನ ಕಾಣುತ್ತಿದ್ದು ಈಗ ಅಂತಾರಾಷ್ಟ್ರೀಯ ಪ್ರೇಕ್ಷಕರಿಗೂ ಕಾಣಿಸಿಕೊಳ್ಳಲು ಸಿದ್ಧವಾಗಿದೆ. ಜುಲೈ 1 ಕ್ಕೆ ನೆದರ್ಲ್ಯಾಮ್ಡ್ಸ್, ಜರ್ಮನಿ ಮತ್ತು ಇಂಗ್ಲೆಂಡಿನಲ್ಲಿ ಸಿನೆಮಾ ಬಿಡುಗಡೆಯಾಗಲಿದೆ.

"ನಂತರ ಇತರ ಯುರೋಪಿಯನ್ ದೇಶಗಳಲ್ಲಿ ಬಿಡುಗಡೆ ಮಾಡಲಿದ್ದು ತದನಂತರ ಅಮೆರಿಕಾ ಮತ್ತು ಇತರ ದೇಶಗಳಲ್ಲಿ ಸಿನೆಮಾ ಪ್ರದರ್ಶಿಸಲಿದ್ದೇವೆ. ಜಗದಗಲ ಹೆಚ್ಚೆಚ್ಚು ಪ್ರೇಕ್ಷಕರಿಗೆ ನಮ್ಮ ಚಿತ್ರ ತಲುಪಿಸಬೇಕೆಂಬ ಆಸೆ" ಎನ್ನುತ್ತಾರೆ ನಿರ್ದೇಶಕ ಹೇಮಂತ್.

ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚೆಚ್ಚು ಸಿನೆರಸಿಕರಿಂದ ಪ್ರಚಾರ ಪಡೆದುಕೊಂಡ ಈ ಸಿನೆಮಾವನ್ನು ತಾರೆಯರು ಕೂಡ ಮೆಚ್ಚಿ ಹೊಗಳುತ್ತಿರುವುದು ವಿಶೇಷ. ಇತ್ತೀಚಿಗೆ ನಟ ಪ್ರಕಾಶ್ ರಾಜ್ ಮತ್ತು ಪುನೀತ್ ರಾಜಕುಮಾರ್ ಈ ಸಿನೆಮಾ ವೀಕ್ಷಿಸಿ ಹೇಮಂತ್ ರಾವ್ ಅವರ ನಿರ್ದೇಶನ ಮತ್ತು ಅನಂತ ನಾಗ್ ಅವರ ನಟನೆಯನ್ನು ಮನಸಾರೆ ಪ್ರಶಂಸಿಸಿದ್ದಾರೆ.

ಈ ಸಿನೆಮಾದಲ್ಲಿ ಶ್ರತಿ ಹರಿಹರನ್ ಮತ್ತಿ ರಕ್ಷಿತ್ ಶೆಟ್ಟಿ ಕೂಡ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.