ಬೆಂಗಳೂರು: ಕರ್ನಾಟಕದಾದ್ಯಂತ ಅಚ್ಚರಿಯ ಯಶಸ್ವಿ ಪ್ರದರ್ಶನ ಕಾಣುತ್ತಿರುವ 'ನೀರ್ ದೋಸೆ' ಈಗ ವಿಶ್ವದಾದ್ಯಂತ ಬಿಡುಗಡೆಗೆ ಸಜ್ಜಾಗಿದೆ. ಬೆವಿನ್ ಎಕ್ಸ್ಪೋರ್ಟ್ಸ್ ಇಂಡಿಯಾ ಈ ಸಿನೆಮಾವನ್ನು ಹೊರದೇಶಗಳಲ್ಲಿ ಬಿಡುಗಡೆ ಮಾಡುತ್ತಿದೆ. ಪ್ರಾದೇಶಿಕ ಕನ್ನಡ ಚಿತ್ರಗಳನ್ನು ವಿದೇಶಗಳಲ್ಲಿ ಬಿಡುಗಡೆ ಮಾಡುವ ಛಾತಿಯ ಜೋಯೆಲ್ ಸಮಂತ್ ಜೆ ಈ ಸುದ್ದಿಯನ್ನು ಧೃಢೀಕರಿಸಿದ್ದಾರೆ.    

ಆಸ್ಟ್ರೇಲಿಯಾ, ಸಿಂಗಾಪುರ, ಹಾಂಕಾಂಗ್, ನ್ಯೂಜಿಲ್ಯಾಂಡ್, ಕೆನಡಾ, ಅಮೆರಿಕಾ, ಯುರೋಪ್, ನೆದರ್ ಲ್ಯಾಂಡ್ಸ್, ಐರ್ ಲ್ಯಾಂಡ್, ಸ್ವೀಡನ್, ಫಿನ್ ಲ್ಯಾಂಡ್, ಸ್ವಿಟ್ಸರ್ ಲ್ಯಾಂಡ್, ಜಪಾನ್, ಮಲೇಷಿಯಾ ಮತ್ತು ಬ್ಯಾಂಗ್ಕಾಕ್ ನಲ್ಲಿ ಈ ಸಿನೆಮಾ ಬಿಡುಗಡೆಯಾಗಲಿದೆಯಂತೆ. 

ವಿಜಯ್ ಪ್ರಸಾದ್ ನಿರ್ದೇಶನದ 'ನೀರ್ ದೋಸೆ' ಬಿಡುಗಡೆಗೆ ಮುಂಚಿತವಾಗಿಯೇ ಹಲವಾರು ವಿವಾದಗಳಿಂದ ಭಾರಿ ಪ್ರಚಾರ ಪಡೆದು, ಬಿಡುಗಡೆಯ ನಂತರ ಅತ್ಯುತ್ತಮ ಗಳಿಕೆಯಿಂದ ಮುನ್ನುಗ್ಗಿ ಹೆಚ್ಚೆಚ್ಚು ಪ್ರದರ್ಶನಗಳನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿತ್ತು. 

ಈ ಸಿನೆಮಾದಲ್ಲಿ ಜಗ್ಗೇಶ್, ಹರಿಪ್ರಿಯಾ, ಸುಮನ್ ರಂಗನಾಥ್ ಮತ್ತು ದತ್ತಣ್ಣ ನಟಿಸಿದ್ದು, ಅನೂಪ್ ಸೀಳಿನ್ ಅವರ ಸಂಗೀತ ಇದೆ.